ايماعامبەتوۆ 30 جىلداعى ءبىلىم سالاسى جەتىستىكتەرىن اتادى

نۇر-سۇلتان. قازاقپارات - ق ر ءبىلىم جانە عىلىم ءمينيسترى اسحات ايماعامبەتوۆ تاۋەلسىزدىكتىڭ 30 جىلى ىشىندەگى ءبىلىم سالاسى جەتىستىكتەرىن اتادى، دەپ حابارلايدى قازاقپارات ءتىلشىسى. «بيىل - ەرەكشە جىل، تاۋەلسىزدىگىمىزدىڭ 30 جىلدىعى.

30 جىلدىق بولعاننان كەيىن وسى 30 جىلداعى جەتىستىكتەرىمىزدى ايتپاساق بولمايدى. 2000 -جىلداردىڭ باسىندا ەلىمىزدە 2 مىڭنان استام اپاتتى جاعدايداعى مەكتەپ بولعان. سول پروبلەمالار نەگىزىنەن شەشىلدى. ەندى بىرەن- ساران مەكتەپ قالدى. تاۋەلسىزدىك جىلدارىندا قازاقستاندا 2 مىڭنان استام جاڭا مەكتەپ سالىندى. بالالاردى بالاباقشامەن قامتۋ كورسەتكىشى الدەقايدا ءوستى. مەملەكەتتىك تىلدە ءبىلىم بەرۋ ماسەلەلەسىن الاتىن بولساق، 1991 -جىلى 2 مىڭ بالاباقشادا مەملەكەتتىك تىلدە تاربيە، ءبىلىم الۋعا مۇمكندىك بولسا، بۇگىنگى كۇنى 7,5 مىڭ بالاباقشادا وسىنداي مۇمكىندىك بەرىلىپ وتىر. بالالاردىڭ جوو- لاردا ءبىلىم الۋ قۇقىعىن ايتار بولساق، بۇل ماسەلە بويىنشا دا سوڭعى 3 جىلدىڭ ىشىندە گرانتتاردىڭ سانى 2 ەسەگە ارتتى دەپ ايتا الامىز. شاكىرتاقى دا 2-3 جىلدىڭ ىشىندە 2 ەسە ارتىپ وتىر. سوندىقتان قاي سالانى الساق تا العا جىلجۋ بار. مەملەكەت ءوزىنىڭ ءبىلىم سالاسىندا بەرگەن، كونستيتۋتسيادا بەكىتىلگەن مىندەتتەمەلەرىن ورىنداپ وتىر»، - دەدى مينيستر ق ر پرەزيدەنتى جانىنداعى ادام قۇقىقتارى جونىندەگى كوميسسيا وتىرىسى الدىندا ب ا ق وكىلدەرىنە بەرگەن سۇحباتىندا.

سونىمەن قاتار ول بۇگىنگى وتىرىستا ەل ازاماتتارىنىڭ ءبىلىم بەرۋ سالاسى بويىنشا قۇقىقتارىنىڭ جۇزەگە اسۋى قارالاتىندىعىن اتاپ ءوتتى.

«ءبىزدى ورتا ءبىلىم بەرۋ، باسقا دا ماسەلەلەر بويىنشا كونستيتۋتسيادا بەكىتىلگەن ءتيىستى كەپىلدىكتەر بار. وسى كەپىلدىكتەر قازىر قالاي جۇزەگە اسىرىلىپ جاتىر دەگەن ماسەلەنى قارايمىز»، - دەدى اسحات ايماعامبەتوۆ.

اۆتور: مارلان جيەمباي