+7 (701) 759 90 19
USD 431.07 EUR 485.51
RUB 5.69 CNY 67.47
جاڭالىقتار

يران ساراپشىلارى قازاقستاننىڭ تاۋەلسىزدىكتىڭ 30 جىلىنداعى جەتىستىكتەرىن تالقىلادى

18 قازان 19:20
:ءبولىسۋ
يران ساراپشىلارى قازاقستاننىڭ تاۋەلسىزدىكتىڭ 30 جىلىنداعى جەتىستىكتەرىن تالقىلادى

تەگەران. قازاقپارات - قازاقستان رەسپۋبليكاسىنىڭ يرانداعى ەلشىلىگى ەكونوميكالىق ىنتىماقتاستىق ۇيىمىنىڭ (ە ى ۇ) مادەنيەت ينستيتۋتىمەن بىرلەسىپ، قازاقستان رەسپۋبليكاسى تاۋەلسىزدىگىنىڭ 30 جىلدىعىنا وراي دوڭگەلەك ۇستەل ۇيىمداستىردى.

وعان يراننىڭ ساراپشىلىق جانە تالداۋ ورتالىقتارى وكىلدەرىنىڭ، ىسكەر توپتاردىڭ، كورنەكى مادەنيەت قايراتكەرلەرى، سونداي-اق قازاقستان دوستارى قاتىستى.

دوڭگەلەك ۇستەلدىڭ نەگىزگى بايانداماشىلارى قازاقستان رەسپۋبليكاسىنىڭ يران يسلام رەسپۋبليكاسىنداعى ەلشىسى ا. ورازباي، ە ى ۇ مادەنيەت ينستيتۋتىنىڭ پرەزيدەنتى س. باحتي، يراننىڭ قازاقستان رەسپۋبليكاسىنداعى ەكس-ەلشىسى م. داميرچيلۋ، ت م د مەن ورتالىق ازيا بويىنشا جەتەكشى ساراپشىلار - اللامە تاباتاباي ۋنيۆەرسيتەتىنىڭ حالىقارالىق عىلىمي ىنتىماقتاستىق دەپارتامەنتىنىڭ باسشىسى پروفەسسور م. تيشەيار مەن تەگەران ۋنيۆەرسيتەتىنىڭ پروفەسسورى ە. كولاي بولدى.

ەلشى ا. ورازباي ءىس-شاراعا قاتىسۋشىلارعا قازاقستاننىڭ ەگەمەندىك العان كۇننەن بەرگى نەگىزگى جەتىستىكتەرى، ەلىمىزدە جۇرگىزىلگەن جانە جۇزەگە اسىرىلىپ جاتقان رەفورمالار، سىرتقى ساياسي باستامالاردى جۇزەگە اسىرۋداعى تابىستارى تۋرالى ەگجەي-تەگجەيلى باياندادى.

ق ر تۇڭعىش پرەزيدەنتى - ەلباسى ن. ءا. نازاربايەۆتىڭ رەسپۋبليكانىڭ قالىپتاسۋى مەن دامۋىنا قوسقان ءرولى مەن قوسقان ۇلەسى ەرەكشە اتاپ ءوتىلدى، سونىمەن قاتار قازىرگى مەملەكەت باسشىسى ق. ك. توقايەۆتىڭ ساياساتى مەن باسىمدىقتارى تۋرالى تولىق اقپارات بەردى.

قازاقستان تاۋەلسىزدىگىنىڭ تاڭىندا ديپلوماتيالىق قارىم-قاتىناس ورناعاننان بەرى قازاقستان-يران ىنتىماقتاستىعىنىڭ دامۋىنداعى تابىستارعا ەرەكشە نازار اۋدارىلدى.

ە ى ۇ مادەني ورتالىعىنىڭ پرەزيدەنتى س. باحتي قازاقستاننىڭ تاۋەلسىز دامۋى جىلدارىنداعى باستى تابىسى رەتىندە ەلدىڭ ءوز ءوڭىرىنىڭ كوشباسشىسى رەتىندە تانىلۋىن اتادى.

وعان دالەل رەتىندە قازاقستان رەسپۋبليكاسىنىڭ جوعارى ەكونوميكالىق كورسەتكىشتەرىن جانە 350 ميلليارد دوللاردان استام تارتىلعان ينۆەستيتسيا كولەمىن كەلتىردى. ول مەملەكەتتىڭ عىلىمي جانە ءبىلىم بەرۋ سالاسىنداعى جەتىستىكتەرى ەرەكشە اتاپ ءوتىپ، پرەزيدەنت ق. توقايەۆتىڭ «500 عالىم» جوباسىنا جوعارى باعا بەردى.

تاعى ءبىر ماڭىزدى جەتىستىك دەپ ول قازاقستان رەسپۋبليكاسىنىڭ استاناسى - نۇر-سۇلتان ەلدىڭ باستى قالاسى رەتىندە عانا ەمەس، سونىمەن قاتار بەيبىتشىلىكتى نىعايتۋعا قاۋىپسىزدىك، الەمدىك مادەنيەتتىڭ بىرىگۋىنە قوسقان ۇلەسى ءۇشىن يۋنەسكونىڭ «بەيبىتشىلىك قالاسى» سىيلىعىن العانىن اتادى.

سونىمەن قاتار، يراننىڭ قازاقستانداعى بۇرىنعى ەلشىسى م. داميرچيلۋ قازاقستاننىڭ دامۋى تۋرالى ءوز اسەرىمەن ءبولىستى، ول قازاقستان رەسپۋبليكاسىنداعى يران ەلشىلىگىن باسقارا وتىرىپ، ونىڭ جەكەلەگەن كەزەڭدەرىن ەل ىشىنەن جەكە باقىلاۋدىڭ تاريحي مۇمكىندىگىن اتاپ ءوتتى.

ول ەكىجاقتى قاتىناستاردىڭ بەرىك نەگىزىن قالاعان جانە ولاردىڭ ودان ءارى دامۋىنا قۋاتتى سەرپىن بەرگەن مەملەكەتتەر جانە سىرتقى ىستەر ۆەدومستۆولارى باسشىلارىنىڭ العاشقى ءوزارا ساپارلارى تۋرالى ايتتى.

ول مەملەكەتارالىق قاتىناستاردى نىعايتۋدا يرانداعى قازاق دياسپوراسىنىڭ ەرەكشە ءرولىن اتاپ ءوتتى.

تەگەران ۋنيۆەرسيتەتىنىڭ پروفەسسورى ە. كولاي قازاقستاندىق دامۋ جولىن مەملەكەتتىك دامۋ ستاندارتى جانە ءوز حالقىنىڭ لايىقتى ءومىر ءسۇرۋ دەڭگەيىن قامتاماسىز ەتۋدىڭ ەتالونى دەپ باعالاپ، قازاقستان تاۋەلسىزدىگىنىڭ العاشقى كۇندەرىنەن باستاپ قابىلدانعان كوپۆەكتورلى سىرتقى ساياساتتىڭ پاراساتتىلىعىن اتاپ كورسەتتى.

ونىڭ سوزىندە جاس مەملەكەت تابىسىنىڭ كىلتى ەتنوسارالىق كەلىسىم مەن ءدىنارالىق ديالوگتىڭ قازاقستاندىق بۇرىن-سوڭدى بولماعان ۇلگىسى ەكەنى ەرەكشە نازار اۋدارۋعا تۇرارلىق جانە ونى تەرەڭىرەك زەرتتەۋدى قاجەت ەتەتىندىگى باسا ايتىلدى.

تاباتاباي ۋنيۆەرسيتەتىنىڭ دەپارتامەنت باسشىسى، پروفەسسور م. تيشەيار قازاقستاننىڭ عىلىمي جانە ءبىلىم بەرۋ سالاسىنداعى جەتىستىكتەرىنە توقتالدى.

پروفەسسور عىلىم مەن ءبىلىم سالاسىنداعى ىنتىماقتاستىق دەڭگەيىن جوعارى باعالاپ، قازاقستان مەن يراننىڭ وقۋ ورىندارى اراسىنداعى بايلانىستاردى، ستۋدەنت الماسۋ، سونىمەن قاتار قازاق جانە پارسى تىلدەرىن ءوزارا وقىتۋ سالاسىنداعى بايلانىستى دامىتۋدىڭ ماڭىزىن اتاپ ءوتتى.

دوڭگەلەك ۇستەل قاتىسۋشىلارىنىڭ نازارىنا قازاقستاننىڭ تاۋەلسىزدىك جىلدارىنداعى جەتىستىكتەرى تۋرالى بەينەروليك، سونىمەن قاتار مەملەكەتتىڭ نەگىزگى دامۋ كەزەڭدەرى مەن ق ر تۇڭعىش پرەزيدەنتى - ەلباسىنىڭ ءرولى تۋرالى پارسى تىلىندەگى كىتاپتار، ەلباسى ن. ن. نازاربايەۆ، پرەزيدەنت ق. ك. توقايەۆ جولداۋلارىنىڭ نەگىزگى تەزيستەرى مەن قازاق اقىنى اباي ولەڭدەرىنىڭ ءماتىنى ۇسىنىلدى.

دوڭگەلەك ۇستەل اياسىندا تاۋەلسىزدىكتىڭ باستى بەلەستەرى مەن ماڭىزدى وقيعالاردى، سونىمەن قاتار قازاقستاننىڭ تاريحي ەسكەرتكىشتەرى مەن كوركەم جەرلەرىن تانىستىرۋعا ارنالعان فوتوكورمە اشىلدى.

قوناقتاردىڭ تاماشالاۋى ءۇشىن قازاق مۋزىكالىق كومپوزيتسيالارى مەن ۇلتتىق كادەسىي ەكسپوناتتارى ۇسىنىلدى. سونداي-اق، قازاقستان ەلشىسى يران يسلام رەسپۋبليكاسىنىڭ يرنا ۇلتتىق اقپارات اگەنتتىگىنە جەكە سۇحبات بەردى.


:ءبولىسۋ
پئكئر قالدئرؤ
+7
جئبةرؤ
سونداي-اق... وقىڭىز
ونلاين قىزمەتكەرلەر

مۇراعات