بەيجىڭدە ق ر تاۋەلسىزدىگىنىڭ 30 جىلدىعىنا ارنالعان ونلاين كونفەرەنسيا ءوتتى
بۇل تۋرالى قازاقستان رەسپۋبليكاسى تاۋەلسىزدىگىنىڭ 30 جىلدىعىنا ارنالعان حالىقارالىق پراكتيكالىق ونلاين كونفەرەنسيا بارىسىندا ق ح ر ۇكىمەتىنىڭ ارنايى وكىلى لي حۋەي ايتتى، دەپ حابارلايدى قازاقپارات.
كونفەرەنسيانى اشقان ق ر سىرتقى ىستەر ءمينيسترىنىڭ ءبىرىنشى ورىنباسارى شاحرات نۇرىشيەۆ: «بيىلعى جىل قازاقستان ءۇشىن تاۋەلسىزدىكتىڭ 30 جىلدىعىمەن تۇسپا-تۇس كەلدى. وسى جىلدار ىشىندە جاس مەملەكەتتىڭ قالىپتاسۋىنان سەنىمدى دامىپ كەلە جاتقان زاماناۋي ەكونوميكاسى، تۇراقتى ىشكى جانە سىرتقى ساياساتى بار حالىقارالىق قوعامداستىقتىڭ بەدەلدى مۇشەسىنە دەيىنگى جولدى قازاقستان ابىرويمەن ءجۇرىپ ءوتتى»، - دەدى.
قازاقستاندىق ديپلومات 2022-جىلدىڭ قاڭتارىندا قازاقستان مەن قىتاي اراسىنداعى ديپلوماتيالىق قارىم-قاتىناستار 30 جىلدىق مەجەدەن وتەتىنىن ەسكە سالىپ، ەلدەر اراسىندا ب ۇ ۇ، ش ى ۇ جانە ا و س ش ك اياسىندا تىعىز ءوزارا ءىس-قيمىل جۇزەگە اسىرىلىپ جاتقانىن اتاپ ءوتتى.
ق ح ر ۇكىمەتىنىڭ ەۋرازيا ىستەرى جونىندەگى ارنايى وكىلى لي حۋەي ءوز سوزىندە قازىرگى قازاقستاننىڭ ەكونوميكاسى قارقىندى دامىپ كەلە جاتقانىن، سونداي-اق ەلدىڭ حالىقارالىق بەدەلى ىلگەرىلەپ كەلە جاتقانىن ايتتى.
«قازاقستان بۇگىندە ەۋرازيا قۇرلىعىندا جانە الەمدىك ارەنادا ماڭىزدى ءرول اتقاراتىن ەڭ بەلسەندى مەملەكەتكە اينالدى»، - دەپ اتاپ ءوتتى قىتاي ديپلوماتى.
سونداي-اق، ءىس-شارا بارىسىندا قاتىسۋشىلار قازاقستان-قىتاي ىنتىماقتاستىعىنىڭ قازىرگى جاعدايى مەن دامۋ پەرسپەكتيۆالارىن تالقىلادى.
قازاقستان رەسپۋبليكاسى تاۋەلسىزدىگىنىڭ 30 جىلدىعىنا ارنالعان حالىقارالىق پراكتيكالىق ونلاين كونفەرەنسيانى ق ر- نىڭ ق ح ر- داعى ەلشىلىگى قىتاي قوعامدىق عىلىمدار اكادەمياسىمەن بىرلەسىپ ۇيىمداستىردى.
حالىقارالىق ونلاين كونفەرەنسياعا ق ر مەن ق ح ر جەتەكشى عىلىمي-زەرتتەۋ ورتالىقتارىنىڭ باسشىلىعى مەن ساراپشىلارى قاتىستى.