+7 (701) 759 90 19
USD 425.78 EUR 494.08
RUB 5.98 CNY 66.23
جاڭالىقتار

تاۋەلسىزدىكتىڭ  30 جىلدىعىنا ارنالعان ءمۇشايرادا باس جۇلدە العان ولەڭ

25 تامىز 20:14
:ءبولىسۋ
تاۋەلسىزدىكتىڭ  30 جىلدىعىنا ارنالعان ءمۇشايرادا باس جۇلدە العان ولەڭ

نۇر-سۇلتان. قازاقپارات - قازاقستان رەسپۋبليكاسى تاۋەلسىزدىگىنىڭ 30 جىلدىق مەرەيتويىن اتاپ ءوتۋ ماقساتىندا «Jas Otan» جاستار قاناتى مەن جازۋشىلار وداعى سەمەي قالالىق فيليالىنىڭ ۇيىمداستىرۋىمەن «تاۋەلسىزدىك - ءتاڭىر بەرگەن ءتاتتى سىي» اتتى جاس اقىنداردىڭ وبلىستىق ءمۇشايراسى ءوتتى.

تالانتتى جاس اقىنداردى ءمۇشايراعا تارتا وتىرىپ، شىعارماشىلىق جولدارىن ايقىنداپ، ناسيحاتتاۋ، ادەبيەتىمىزدىڭ دامۋىنا ۇلەس قوسۋىنا قولداۋ كورسەتۋ، ولەڭ ءسوزدىڭ ەل رۋحىنا سەرپىلىس بەرىپ، تاۋەلسىزدىگىمىزدىڭ نىعايۋىنا، جىگەرلى، تاباندى ۇرپاقتىڭ تاربيەلەنۋىنە ىقپالىن سەزىندىرۋ جانە پاتريوتتىق، گۋمانيستىك باعىتتاعى پوەزيانى دامىتۋ.

جاس اقىنداردىڭ ونەرىنە قوعام قايراتكەرى، الاشتانۋشى، اقىن نۇرعالىم قۇسميلا جىرعالىم ۇلى جانە «دارىن» مەملەكەتتىك جاستار سىيلىعىنىڭ يەگەرى، «جازۋشىلار وداعى» سەمەي قالالىق فيليالىنىڭ ءتوراعاسى قارت مەرەي تورەلىك ەتتى.

ءمۇشايرا بارىسىندا «Nur Otan» پارتياسى جانىنداعى «Jas Otan» ج ق شىعىس قازاقستان وبلىستىق فيليالىنىڭ ءتوراعاسى ا. ايمۇقاش:

«ءبىز بۇل ءىس-شارانى وتكىزۋ ارقىلى جاستاردىڭ بويىندا رۋحاني كەمەلدەنۋدى، قايسارلى كۇش پەن شالقار شابىتتى شىڭدايتىن بولامىز. سونداي-اق، ەلباسىمىز، «Nur Otan» پارتياسىنىڭ ءتوراعاسى ن. نازارباۆتىڭ «بولاشاشقا باعدار: رۋحاني جاڭعىرۋ!» ماقالاسىنداعى باسىمدىقتى جۇزەگە اسىرۋدامىز. بۇل مادەني ءىس-شارا ۇلى اباي، كەمەڭگەر شاكارىم، مۇحيت ويلى مۇحتاردىڭ جەرىندە وتكىزىلۋى قۇباپ-قۇپ دەپ ويلايمىن»، - دەپ اتاپ ءوتتى.

ءمۇشايراعا وبلىسىمىزداعى 18 بەن 35 جاس ارالىعىنداعى 30 جاس اقىن قاتىستى.

ء ادىل-قازىلاردىڭ تورەلىگىمەن بايقاۋدىڭ باس جۇلدەسىن باۋىرجان يگىلىك جەڭىپ السا، 2 - ورىندى جاسۇلان ماقايەۆ جانە تولەۋتاي دينارا، 3-ورىندى ەركىن ۇلى قۋانىش، جاقسىلىقوۆ اسقاربەك جانە عالىمبەك ديلناز يەلەندى. ال بايقاۋعا قاتىسقان بارلىق قاتىسۋشىلار ارنايى سىيلىقتارمەن ماراپاتتالدى.

ءمۇشايرادا باس جۇلدە العان ولەڭ:

وتان

سەلەۋ قاباعى تۇكسيىپ،

سىرعالى تالىن شىق ءسۇيىپ.

كورىنگەن تاستىڭ استىنان

كوڭىلشەك بۇلاق سىقسيىپ.

بۇتا باستارىن جەل سەرپىپ،

جۇپارلى اسپاندى تەڭسەلتىپ.

تاتتىمبەت ساۋساق دۇنيە

تابيعات كۇيىن تەڭ شەرتىپ.

قۇداشاما ۇقساپ قۇبىلعان،

سۇيمەسەم، اۋزىم ۋىلعان.

جىندانىپ ءسۇيدىم سەرىدەي،

ايعىر قىمىزدىڭ بۋى ۇرعان.

بارىڭدى سۇيەم مەن سەنىڭ،

باعىڭدى سۇيەم مەن سەنىڭ.

سۇراپىل ءسۇرىپ سىنباعان،

سورىڭدى سۇيەم مەن سەنىڭ.

وتانىم مەنىڭ ەڭسەلىم،

وتانىم - كۇلكىم، كەمسەڭىم.

بەينەتتىڭ ءبارىن مەن سەنىڭ

قاباعىڭمەنەن ولشەدىم.

و، مەنىڭ اڭقاۋ جاس بالام،

و، مەنىڭ مومىن تاس مولام.

سابيدەي ءسۇيىپ، انامنىڭ

اق بىلەگىندەي جاستانام.

كىندىگىم، جۇلىن-جۇيەممەن،

بوزداعان - قىدىر، كيەممەن

تاڭىرلىگىڭە ءتاۋ ەتىپ،

سابىرلىعىڭدى سۇيەم مەن.

شىرعالاڭ كۇندە ءبىر اعام

قۇل كۇنىن جەرلەپ سىباعان.

يتجەككەن بارىپ يلەنىپ،

يرەلەڭ جولدان شۇبالاڭ.

ءىلميىپ ابدەن جەتكەندە،

ءىلىنىپ ەلگە قۇلاعان.

كۇلدىرەپ كەتكەن ەرنىمەن،

كۇلدىگىن ءسۇيىپ جىلاعان.

كوزىمدى دىمداپ ءبىر رەت،

قۇدىرەت دەگەم…

قۇدىرەت…

تۋعان جەر ول دا تاعدىرىم

ءتاڭىرى بەرگەن نىعمەت.

ءتاۋ ەتەم دۇنيە جاڭىلىپ،

اسپان اياسى تارىلىپ.

ىسرافىل ءمىنىپ كۇشىنە،

تاستان دا تامىر تابىلىپ،

قيامەت تۋىپ، وت-كۇندى

شىعارمايىنشا ءماعۇرۇپ!

***

جىندى ادامداي جىميامىن كەيدە مەن

سەنى ساعىنعاندىقتان...

جۇيەسى جوق سويلەمدەرمەن سويلەنەم

سەنى ساعىنعاندىقتان...

بەلگە سوققان جىلان قۇساپ بۇكتەلەم

سەنى ساعىنعاندىقتان...

تاڭ الدىندا كىرپىگىمنەن شىق تەرەم

سەنى ساعىنعاندىقتان...

قىزعانىشتان قىپ-قىزىل وت كۇرسىندىم

سەنى ساعىنعاندىقتان...

قيىلۋعا دايىن تۇرعان قىرشىنمىن

سەنى ساعىنعاندىقتان...

ءوزىم ءماجنۇن، ءوزىم زارلىق، مۇڭلىقپىن

سەنى ساعىنعاندىقتان...

سارى اۋرۋدان سۇلق تۇسكەن قۇرلىقپىن

سەنى ساعىنعاندىقتان...

شىركەۋدەگى ايسا قۇساپ جىلايمىن

سەنى ساعىنعاندىقتان...

تيبەتتەگى تاس بوپ قاتقان «قۇدايمىن»

سەنى ساعىنعاندىقتان...

ولسەم، سىيمان كورگە مۇلدە سەبەبى —

سەنى ساعىنعاندىقتان...

وسى ومىرگە كەلگەنىم دە سول ەدى

سەنى ساعىنعاندىقتان...

massaget.kz


:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
ريزابەك نۇسىپبەك
ريزابەك نۇسىپبەك
954-049

مۇراعات