+7 (701) 759 90 19
1 °С : نۇر-سۇلتان
13 °С : الماتى
USD 423.91 EUR 497.37
RUB 5.82 CNY 65.59
جاڭالىقتار

تاۋەلسىزدىكتىڭ 30 جىلدىعى: ۇلتتىق مۋزەيدە «ۇلىق  ۇلىس» زالى اشىلدى

28 مامىر 20:24
:ءبولىسۋ
تاۋەلسىزدىكتىڭ 30 جىلدىعى: ۇلتتىق مۋزەيدە «ۇلىق  ۇلىس» زالى اشىلدى

نۇر-سۇلتان. قازاقپارات - بۇگىن ەلورداداعى ق ر ۇلتتىق مۋزەيىندە التىن وردا كەزەڭىنەن سىر شەرتەتىن «ۇلىق ۇلىس» اتتى جاڭا زال اشىلدى، دەپ حابارلايدى قازاقپارات ءتىلشىسى.

«ءبىز ءاردايىم كەڭ بايتاق جەرىمىز بەن تەرەڭ تاريحىمىزدى ماقتانىشپەن ايتا الامىز. سونىڭ ءبىرى - التىن وردا كەزەڭىندەگى تاريح. وزدەرىڭىز بىلەتىندەي، وتكەن جىلى مەملەكەت باسشىسىنىڭ باستاماسىمەن التىن وردانىڭ مەرەيتويىن ەل بولىپ اتاپ وتتىك.

التىن وردا كەزەڭى مەن تاريحى بىرنەشە ۇلت وكىلدەرىمەن بايلانىستى ەكەنى ايان. ءبىراق التىن وردانىڭ قاي جەردە قۇرىلعانى جانە ونى كىمدەر قۇرعانى تاريحتان بەلگىلى. ونىڭ ۇستىنە تاريحى تەرەڭ وسىناۋ ورتاعاسىرلىق مەملەكەتتىڭ مەرەيتويىن مەملەكەتتىك دەڭدەيدە العاش ءبىز اتاپ ءوتىپ وتىرمىز. بۇگىنگى كورمەگە ءبىراز قۇندى دۇنيەلەر قويىلعان»، - دەدى ق ر ۇلتتىق مۋزەيدىڭ ديرەكتورى ارىستانبەك مۇحامەدي ۇلى زالدىڭ اشىلۋ سالتاناتىندا.

كورمەنى ۇيىمداستىرۋشىلاردىڭ ايتۋىنشا، مۋزەيدىڭ عىلىمي قىزمەتكەرلەرى جاڭا زالعا قوياتىن جادىگەرلەردى ىزدەپ، ۇلىتاۋعا ارنايى عىلىمي ساپارمەن بارعان.

«التىن وردانىڭ نەگىزىن قالاۋشى - قازاق ۇلتى ەكەنى انىق. بۇل مەملەكەتتىڭ ءالى دە بولسا اشىلماعان سىرلارى كوپ. التىن ورداعا قاتىستى كوپتەگەن قۇندى دەرەكتەر سىرتتا ەكەنى دە راس. سوندىقتان الداعى ۋاقىتتا ءبىزدىڭ تاريحشىلار مەن عالىمدار زەرتتەيتىن دۇنيە جەتكىلىكتى»، - دەيدى ول.

جاڭا زالدا ۇلىق ۇلىس كەزەڭىنىڭ مادەنيەتىن، تۇرمىس-تىرشىلىگىمەن تانىستىراتىن ورتاعاسىرلىق قالالاردان تابىلعان ارحەولوگيالىق ارتەفاكتىلەر، نۋميزماتيكالىق توپتامالار، ءدىني-ءمىناجاتتىق عيمارات ماكەتى مەن باسقا دا قۇندى جادىگەرلەر قويىلعان.

ودان بولەك، ەكسپوزيتسيالار اراسىندا شەتەل مۇراعاتتارىنان تابىلعان حانداردىڭ رەسمي جازبالارىنىڭ كوشىرمەلەرى، مەملەكەتتىڭ ءرامىزى بولىپ تابىلاتىن ۇلىق ۇلىس تۋىنىڭ قايتا جاڭعىرتىلعان نۇسقاسى (ەۋروپالىق تەڭىز كارتالارىنداعى مالىمەتتەرگە سۇيەنىپ) ورىن العان.

سونىمەن بىرگە ۇلىق ۇلىس حاندارىنىڭ ەلشىلەرگە، ساۋداگەر-كوپەستەرگە بەرگەن نەگىزگى سەنىم قۇجاتتارى - پايزىلاردىڭ كوشىرمەسى، جوشى ۇرپاقتارىنىڭ شەجىرەسى (سول قانات) كوپشىلىكتىڭ نازارىنا ۇسىنىلىپ وتىر.

«تاۋەلسىزدىكتىڭ 30 جىلدىعىنا وراي وسىنداي ايتۋلى تاريحي ساتكە كۋا بولعانىمىز قۋانتادى. بۇل - تاريحي ادىلەتتىلىك. سەبەبى، وزدەرىڭىز بىلەسىزدەر، كەزىندە التىن ورداعا قاتىستى ءبىرشاما جاڭساق پىكىرلەر بولدى، ءتىپتى بۇل تاقىرىپتى قوزعاۋعا تىيىم دا سالدى. ەندى، مىنە، تاريحي شىندىقتى جاڭعىرتىپ وتىرمىز. سوناۋ التىن وردانىڭ كەزىندەگى ۇلتتار، بۇگىنگى قىرىم، تاتار، باشقۇرتتار بىزگە قىزىعا دا قىزعانا قارايدى. سوندىقتان ءبىز باي تاريحىمىزدى ماقتان تۇتۋىمىز كەرەك. جانە وسى باعىتتاعى جۇمىستى توقتاتپاي، جاس زەرتتەۋشى عالىمداردى تارتىپ، جالعاستىرۋىمىز كەرەك»، - دەدى ق ر پارلامەنتى ءماجىلىسىنىڭ دەپۋتاتى بەرىك ءابدىعالي ۇلى.


:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ
ونلاين قىزمەتكەرلەر

مۇراعات