شىعىس قازاقستاندا ءيىسشىل يتتەردىڭ كومەگىمەن 30 دان استام قىلمىس اشىلدى
ش ق و پوليتسيا دەپارتامەنتى باسپا ءسوز قىزمەتىنىڭ مالىمەتىنشە، ءوڭىر پوليتسياسىندا 80 نەن استام ءيت بار. ونىڭ ىشىندە 41 ءيت ىزگە ءتۇسۋ جۇمىسىنا، 14 ءيت ەسىرتكى زاتتارىن تابۋعا، 13 ءيت جارىلعىش زاتتاردى ىزدەۋگە تارتىلادى. سونىمەن قاتار شابۋىلعا شىعاتىن - 2، كۇزەتتە - 5، يىستەردى وتە جاقسى اجىراتاتىن - 4 ءيت ساقشىلارعا كومەك كورسەتۋدە.
ءتورت اياقتى «پوليتسەيلەر» قىلمىس بولعان جەرلەرگە بىرگە بارىپ، قىلمىسكەردى جىلدام تابۋعا، جارىلعىش زاتتاردى، ەسىرتكىلەر مەن وق-دارىلەردى ىزدەۋگە اتسالىسادى.
«سونىمەن قاتار يتتەر ءارتۇرلى كوپشىلىك ءىس-شارالار وتكىزىلەتىن جەرلەردە ءتارتىپتى قامتاماسىز ەتەدى. جەدەل تەرگەۋ توبىنىڭ قۇرامىندا وبلىس بويىنشا ءىز كەسۋ جۇمىسىنا شىعادى. جەدەل- ىزدەستىرۋ ءىس-شارالارىن جۇرگىزۋ كەزىندە سەمەي جانە شەمونايحا بەكەتتەرىندە تاۋلىك بويى كەزەكشىلىكتە بولادى»، - دەلىنگەن حابارلامادا.
2021-جىلى ينسپەكتور- كينولوگتار قىزمەتتىك-ىزدەستىرۋ يتتەرىمەن بىرگە 900 دەن استام وقيعا ورنىنا بارعان. ونىڭ ىشىندە ەسىرتكى قىلمىسىنا قارسى ءىس-قيمىل باعىتى بويىنشا - 43، جارىلعىش زاتتاردى ىزدەۋگە - 345 رەت تارتىلدى.
«جىل باسىنان بەرى قىزمەتتىك يتتەردىڭ كومەگىمەن 32 قىلمىس اشىلدى. ونىڭ ىشىندە ەسىرتكى زاتتاردىڭ زاڭسىز اينالىمىنا بايلانىستى 16 قىلمىس بولدى. ارنايى وپەراتسيالاردى وتكىزۋ كەزىندە زاڭسىز اينالىمنان شامامەن 500 گرام ەسىرتكى تاركىلەنگەن»، - دەدى ش ق و پ د كينولوگيالىق قىزمەت ورتالىعىنىڭ باستىعى ءومىرزاق قاسايىنوۆ.