تاۋەلسىزدىكتىڭ 30 جىلدىعى: اتىراۋدا «تۇيە بالۋاندار» انىقتالدى

اتىراۋ. قازاقپارات - اتىراۋدا ەل تاۋەلسىزدىگىنىڭ 30 جىلدىعىنا وراي «قازاقستان - سپورتتىق ۇلت» جوباسى اياسىندا قازاق كۇرەسىنەن «تۇيە بالۋان» سايىسى ءوتتى، دەپ حابارلايدى قازاقپارات.

سايىستا اۋىر سالماقتا باق سىناعان جەڭىمپازداردى وبلىس اكىمى مااحمبەت دوسمۇحامبەتوۆ ماراپاتتادى.

«سىزدەر ناعىز بىلەكتى، جۇرەكتى بالۋانداردىڭ قۋاتتى كۇرەسى قانداي بولاتىنىن كورسەتتىڭىزدەر. قازاق حالقىنىڭ ءتول كۇرەسىنىڭ تاريحى تەرەڭدە. عاسىرلار بويى ۇرپاققا جالعاسىپ كەلە جاتقان ۇلتتىق كۇرەسىمىزدى دامىتۋ مەن قولداۋ جاستارىمىزعا دا ۇلكەن رۋھ بەرەدى. جاستاردىڭ نامىسىن جانىپ، ناعىز ەر-ازامات بولىپ قالىپتاسۋىنا وڭ ىقپال ەتەدى»، - دەدى ماحامبەت دوسمۇحامبەتوۆ.

اكىمنىڭ ايتۋىنشا، تاۋەلسىزدىكتىڭ ارقاسىندا ۇلتتىق سپورت تۇرلەرى جاندانىپ كەلەدى. وبلىستا سپورتشىلاردى قولداۋعا ايرىقشا كوڭىل ءبولىنىپ وتىر.

«جىل سايىن سپورتتىق كلۋبتار مەن ءىرى كەشەندەر سانى ارتۋدا. وندا دايىندالاتىن جاس بۋىننىڭ قاتارى كوبەيە ءتۇستى. تاۋەلسىزدىكتىڭ 30 جىلىندا سپورتشىلارىمىز تالاي مارتە حالىقارالىق دودالاردا كوك بايراعىمىزدى كوكتە جەلبىرەتتى. ولاردىڭ اراسىندا ەل تاريحىندا عانا ەمەس، الەم تاريحىندا ەسىمىن التىن ارىپپەن جازدىرعان جەرلەستەرىمىز بار. ماسەلەن، بەيجىڭ وليمپياداسىنىڭ قولا جۇلدەگەرى ارمان چيلمانوۆ مەن ريو وليمپياداسىنىڭ چەمپيونى نيدجات راحيموۆتى بارشا قازاقستاندىق ماقتان ەتەدى. ولاردىڭ جەڭىستى جولىن جالعاستىراتىن جاستارعا جاعداي جاساۋ جالعاسادى»، - دەدى وبلىس اكىمى ماحامبەت دوسمۇحامبەتوۆ.

الىپتاردىڭ كۇرەسىن سپورت جانكۇيەرلەرى باستان-اياق الەۋمەتتىك جەلىلەر ارقىلى تاماشالادى. تارتىستى وتكەن سايىس ناتيجەسىندە قارسىلاستارىنىڭ جاۋىرىنىن جەرگە تيگىزگەن ابىلاي اماندىق ءبىرىنشى ورىندى يەلەنىپ، جەڭىمپاز اتاندى. ال، رۋسلان ىزعاليەۆ ەكىنشى، شىنبولات حاسانوۆ ءۇشىنشى ورىندى يەلەندى. جەڭىمپازدارعا ارنايى سىيلىقتار مەن قارجىلاي ماراپات بەرىلدى.

ەسكە سالا كەتەلىك، بۇدان بۇرىن اتىراۋدا ەل تاۋەلسىزدىگىنىڭ 30 جىلدىعىنا وراي «OTAN Life» جوباسى باستالعان بولاتىن.