نۇر-سۇلتاندا ءۇي ىشىنە گاز كىرگىزۋ قۇنى 30 پايىزعا ارزاندادى
ەلوردا اكىمدىگى مونتاجداۋ جۇمىستارىنىڭ قۇرىلىسىنا ماماندانعان جەكە ۇيىمدارمەن بىرنەشە رەت كەزدەسۋ وتكىزدى، دەپ حابارلايدى قازاقپارات.
قالالىق اكىمدىكتىڭ مالىمەتىنشە، مىسالى، «ءاليا سەرۆيس» ج ش س ءۇي ىشىندە گاز وتكىزۋ قۇنىن 240 مىڭ تەڭگەدەن 150 مىڭ تەڭگەگە دەيىن تومەندەتتى (%37,5 عا)، «قاز ترانس گاز ايماق» ا ق - 123 مىڭ تەڭگەگە جۋىق جانە باسقا دا ءبىرقاتار جەكە ۇيىم ءۇي ىشىنە گاز وتكىزۋ قۇنىن ارزانداتتى.
بۇل سوماعا گاز جابدىعى مەن جيىنتىقتاۋىشتاردىڭ قۇنى كىرمەيدى.
ەستەرىڭىزگە سالا كەتەيىك، تۇرعىن ءۇي الاپتارىندا گاز تاراتۋ جەلىلەرىن، ونىڭ ىشىندە ۇيلەر بويىنداعى ورامىشىلىك جەلىلەردى سالۋمەن نۇر-سۇلتان اكىمدىگى اينالىسادى، ال ءۇي ىشىنە تىكەلەي جەتكىزۋگە جەكە ۇيىمدار جاۋاپتى. تۇرعىندار كەز كەلگەن مامانداندىرىلعان كومپانيانى تاڭداۋعا قۇقىلى.
جوبانىڭ الەۋمەتتىك ماڭىزىن ەسكەرە وتىرىپ، اكىمدىك جەكە ۇيىمدارمەن مونتاجداۋ جۇمىستارىنىڭ قۇنىن تومەندەتۋ بويىنشا كەلىسسوز جۇرگىزۋدە. ەسەپتەگىشتەر ازاماتتارعا تەگىن بەرىلەدى. قالانى گازداندىرۋ ءۇش كەزەڭ بويىنشا جۇرگىزىلەدى.
بيىلعى جىلىتۋ ماۋسىمىندا جەلەزنودوروجنىي، كوكتال-2، اگروقالاشىقتىڭ ءبىر بولىگى گازعا كوشىرىلەدى. سونىمەن قاتار، كوكتال-1، پرومىشلەننىي، وڭتۇستىك-شىعىس تۇرعىن الاپتارىندا قۇرىلىس-مونتاجداۋ جۇمىسى جۇرگىزىلىپ جاتىر.
اتالعان تۇرعىن الاپتارىندا گازبەن جابدىقتاۋدىڭ ىشكى جەلىلەرىن جۇرگىزگەن تۇرعىندار گازعا قوسىلۋ ءۇشىن «قاز ترانس گاز ايماق» ا ق- عا جۇگىنە الادى (رەسپۋبليكا داڭعىلى، 24، «پاراسات» ب و).
بۇل ۇيىم گازبەن جابدىقتاۋدىڭ ىشكى جەلىلەرىنىڭ قاۋىپسىزدىگىمەن جانە تىكەلەي قوسىلۋىن تەكسەرۋمەن اينالىسادى، سونداي-اق ودان ءارى پايدالانۋعا جاۋاپ بەرەدى. ەلوردانى گازداندىرۋ - ەلباسىنىڭ تاريحي جوباسى. ول ەكولوگيانى جاقسارتىپ قانا قويماي، جەكە سەكتور تۇرعىندارىنىڭ ءومىر ءسۇرۋ جاعدايىن ايتارلىقتاي جەڭىلدەتەدى. گازداندىرۋ پروتسەسى مەملەكەت باسشىسىنىڭ باقىلاۋىندا.