قازاقپارات كۇنتىزبەسى: 30- قاراشا
اتاۋلى كۇندەر
دۇنيەجۇزىلىك ءۇي جانۋارلارى كۇنى
يدەيا 1931-جىلى فلورەنتسيادا (يتاليا) وتكەن تابيعاتتى قورعاۋ قوزعالىسىن جاقتايتىنداردىڭ حالىقارالىق كونگرەسىندە العاش رەت ايتىلدى. كوپتەگەن ەكولوگيالىق ۇيىمدار، تابيعاتتى قورعاۋ قوعامدارى حايۋاناتتاردى، سونىڭ ىشىندە ءۇي جانۋارلارىن ايالاۋعا شاقىراتىن جاپپاي شارا ۇيىمداستىرۋعا دايىن ەكەنىن ءبىلدىردى.
حيميالىق قارۋ قۇرباندارىن ەسكە الۋ كۇنى
بۇرىن حيميالىق قارۋ قۇرباندارىن ەسكە الۋ كۇنى 29 - ساۋىردە تويلاناتىن. ويتكەنى 1997-جىلعى ءساۋىردىڭ 29 ىندا حيميالىق قارۋدى ازىرلەۋ، ءوندىرۋ، جيناۋ جانە قولدانۋعا تىيىم سالۋ جانە ونى جويۋ تۋرالى كونۆەنتسيا كۇشىنە ەنگەن بولاتىن.
حيميالىق قارۋعا تىيىم سالاتىن كونۆەنتسياعا الەمدەگى بارشا ەل قوسىلدى دەۋگە بولادى. 2015-جىلى حيميالىق قارۋعا تىيىم سالۋ ۇيىمىنىڭ كەزەكتى سەسسياسىندا 29- ءساۋىردى ح ق ت ۇ قۇرىلعان كۇن رەتىندە تويلاپ، حيميالىق قارۋ قۇرباندارىن ەسكە الۋ كۇنىن 30- قاراشاعا كوشىرۋ تۋرالى شەشىم قابىلداندى.
حالىقارالىق اقپاراتتى قورعاۋ كۇنى (كوپيۋتەرلىك قاۋىپسىزدىك كۇنى)
بۇل مەرەكەنى العاش رەت 1988-جىلى امەريكانىڭ كومپيۋتەرلىك جابدىقتار قاۋىمداستىعى جاريالاعان. بۇل جىلى قۇرۋشىسى مورريستىڭ اتاۋىن العان «ۆيرۋستىڭ» ءبىرىنشى جاپپاي ەپيدەمياسى تىركەلگەن. كومپيۋتەرلىك قاۋىپسىزدىك كۇنىنىڭ ماقساتى - پايدالانۋشىلارعا ءوز كومپيۋتەرلەرى مەن وندا ساقتاۋلى اقپاراتتى قورعاۋ قاجەتتىلىگى تۋرالى ەسكە سالۋ.
مىندەتى - كومپيۋتەرلىك قاۋىپسىزدىك ماسەلەلەرىنە قاتىستى اقپاراتتى تاراتۋ.
ەستە قالار وقيعالار
1970 -جىلى ەكىباستۇزدا (پاۆلودار وبلىسى) «بوگاتىر» رازرەز كەشەنى پايدالانۋعا بەرىلدى. الەمدەگى ەڭ ءىرى دەپ تانىلعان «بوگاتىر كومىر» كومپانياسىنىڭ رازرەزى ەنەرگەتيكالىق شيكىزاتتىڭ سەنىمدى جەتكىزۋشىسى. ونىڭ كومىرىمەن قازاقستاننىڭ - 11، رەسەيدىڭ - 6 ەلەكتر ستانساسى جۇمىس ىستەيدى.
1970 -جىلى «اتاماننىڭ اقىرى» كينوكارتينكاسى پروكاتقا شىقتى. فيلم 1920-جىلدارى قازاقستاندا بولعان شىنايى تاريحي وقيعا جەلىسىمەن تۇسىرىلگەن. «اتاماننىڭ اقىرى» - اتى اڭىزعا اينالعان رەجيسسەر شاكەن ايمانوۆتىڭ تۋىندىسى.
1972 -جىلى فيلمنىڭ سەناري اۆتورى اندرەي ميحالكوۆ- كونچالوۆسكي، ەدۋارد تروپين جانە اكتەر ءاسانالى ءاشىموۆ قاز ك س ر مەملەكەتتىك سىيلىعىنا يە بولدى.
2004 -جىلى قوستاناي وبلىسىنىڭ ارقا ستانساسىندا قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆتىڭ قاتىسۋىمەن «حرومتاۋ - التىنسارين» جاڭا تەمىر جول جەلىسى بويىنشا قوزعالىس باستالۋىنىڭ سالتاناتتى ءراسىمى بولىپ ءوتتى. بۇل جول ەلىمىزدىڭ سولتۇستىگىنەن باتىسىنا كولىك قاتىناۋى قاشىقتىعىن 2 مىڭ شاقىرىمعا دەيىن قىسقارتىپ، تاسىمالداناتىن جۇكتەردىڭ باعاسىنداعى كولىكتىك قوسىمشالاردى ازايتادى، استىق، مۇناي، مەتال جانە اقتاۋ تەڭىز ايلاعى ارقىلى وتەتىن حالىقارالىق قاتىناستاعى باسقا دا جۇكتەردى ەكسپورتتىق تاسىمالداۋداعى جول ۇزاقتىعىن شەكتەيدى، تيىسىنشە، سول جەردەن جان-جاققا قيىستىرىلعان كولىكتىك دالىزبەن ازياعا، كاۆكاز ەلدەرىنە، شىعىس جانە ورتالىق ەۋروپاعا جول اشىلادى.
جولدىڭ جالپى ۇزىندىعى - 403,9 شاقىرىم. «حرومتاۋ- التىنسارين» جوباسىنىڭ قۇنى شامامەن 30 ميلليارد تەڭگەگە باعالانعان. بۇل سومانىڭ 25,5 ميلليارد تەڭگەسىن - رەسپۋبليكالىق بيۋدجەت، ال قالعان 4 ميلليارد تەڭگەدەن استامىن - «قازاقستان تەمىر جولى» ۇلتتىق كومپانياسى سالدى.
2011 -جىلى الماتى رەسمي تۇردە 2017 -جىلعى 28-بۇكىل الەمدىك قىسقى ۋنيۆەرسيادا استاناسى بولىپ جاريالاندى.
2012 -جىلى قازاقستان ەلورداسى - استانا تۇركى الەمىنىڭ مادەني استاناسى ەستافەتاسىن تۇرىكتىڭ ەسكيشەحير قالاسىنا تابىستادى.
2014 -جىلى داڭقتى بالۋان، 1980-جىلعى گرەك-ريم كۇرەسىنەن وليمپيادا چەمپيونى جاقسىلىق ۇشكەمپىروۆ «الەمنىڭ ۇزدىك بالۋانى» اتاعىنا يە بولدى. بۇل ماراپاتتى ايگىلى سپورتشىعا «بىرلەسكەن كۇرەس الەمى» دەپ اتالاتىن حالىقارالىق كۇرەس فەدەراتسياسى تابىستادى.
2014 -جىلى Astana Opera تەاترىنىڭ سوليسى سالتانات احمەتوۆا پ. چايكوۆسكي اتىنداعى ماسكەۋ كونسەرۆاتورياسىنىڭ ۇلكەن زالىندا وتكەن «ۇلكەن وپەرا» جوباسىنىڭ فينالىندا ءبىرىنشى ورىندى جەڭىپ الدى.
2015 -جىلى سەربيا رەسپۋبليكاسى بەلگراد قالاسىندا جىل سايىنعى «كاريچ قورى» سىيلىعىن تابىستاۋ ءراسىمى ءوتتى. قازاقستان مەن سەربيا حالىقتارى اراسىنداعى بەيبىتشىلىكتى، ىنتىماقتاستىقتى، دوستىقتى نىعايتۋعا قوسقان ۇلەسى ءۇشىن قر پرەزيدەنتى جوعارى ناگراداعا لايىق دەپ تانىلدى.
2015 -جىلى استانادا 1992-جىلى شىعارىلعان قازاقستاننىڭ پوچتا ماركالارىنىڭ كورمەسى ءوتتى.
2015 -جىلى قازاقستان ۇلتتىق بانكى نومينالى 20000 تەڭگەلىك بانكنوتتى اينالىمعا شىعاردى. جاڭا بانكنوت قازاقستاندىق تەڭگەنىڭ ەڭ قورعالعان اقشا بەلگىسى، الەمدەگى ەڭ قورعالعان بانكنوتتاردىڭ ءبىرى.
2016 -جىلى استانادا قازاقستاننىڭ اربيتراجدىق پالاتاسى قۇرىلدى.
2017 -جىلى الماتىداعى فۋرمانوۆ كوشەسىنە جاڭا اتاۋ بەرىلدى. كوشە ەندىگىدە قازاقستان رەسپۋبليكاسىنىڭ تۇڭعىش پرەزيدەنتى - ەلباسى نۇرسۇلتان نازاربايەۆ اتىنداعى داڭعىل دەپ اتالادى.
2017 -جىلى تانىمال قازاق ءانشىسى ديماش قۇدايبەرگەنگە Fashion night gala ماراپاتتاۋ سالتاناتىندا «يننوۆاتسيا زامانىنىڭ ليدەرى» سىيلىعى بەرىلدى.