ادىلبەك قابا قازاق ءتىلىن ۇيرەنۋگە قاتىستى: «ءبىز كىنالى ەمەسپىز» دەۋمەن 30 جىل ءوتتى

نۇر- سۇلتان. قازاقپارات - قازاق ءتىلىن ۇيرەنۋگە كەلگەندە «كىنالى ەمەسپىز» دەۋمەن 30 جىل ءوتىپ بارادى.

بۇل تۋرالى «ءتىل تۇتاستىعى - ەل تۇتاستىعى» اتتى ونلاين- كونفەرەنسياسىندا ق ر مادەنيەت جانە سپورت مينيسترلىگى ءتىل ساياساتى كوميتەتىنىڭ ءتوراعاسى ادىلبەك قابا ايتتى، دەپ حابارلايدى قازاقپارات ءتىلشىسى.

«قازىرگى ۋاقىتتا ءتىل ءۇشىن ەڭ ءبىر قاۋىپتى كەزەڭ باستالدى دەپ ايتۋعا بولادى. نەگە؟ بۇرىن الدىڭعى ۇرپاق: «وداق قۇرامىندا بولدىق، ول كەزدە تىلدىك ورتا بولعان جوق. ءتىلدى ۇيرەنبەدىك، كىنامىز جوق» دەيتىن. بۇگىن ءالى دە سول «كىنالى ەمەسپىز» دەۋمەن، مىنە 30 جىل ءوتىپ بارادى. بىلاي الىپ قاراساق، 30 جىلدىڭ 11 جىلىندا بالا مەكتەپكە بارىپ، بۇكىل مەكتەپتىڭ ءپانىن ۇيرەنىپ شىعادى. 5 جىلدا ستۋدەنت اتانىپ، ماماندىقتىڭ قىر- سىرىن مەڭگەرەدى. ال 30 جىلدا 30 اۋىز ءسوز ۇيرەنبەۋ مەنىڭشە، جاقسى ەمەس. سوندىقتان دا بۇل ءبىر جاعىنان مەملەكەتتىك تىلگە قاجەتتىلىكتىڭ جوقتىعىنان دەپ تە ويلايمىن»، - دەدى كوميتەت ءتوراعاسى.

وسى رەتتە ول ءتىل ءۇشىن ەڭ ءبىر قاۋىپتى كەزەڭ باستالدى دەۋىنىڭ سىرىن دا ءتۇسىندىرىپ بەردى. «قاۋىپتى كەزەڭ» دەپ وتىرعانىمىز نە؟ ول بۇگىنگى كۇنگى قوعامدىق كولىكتە، دۇكەندە، باسقا ورىنداردا - قىزمەت كورسەتۋ نەمەسە قىزمەت جاساۋدىڭ بارلىعىندا ءبىز وزگە تىلگە جۇگىنىپ ءجۇرمىز. ول مەملەكەتتىڭ، ۇكىمەتتىڭ نەمەسە بيلىكتىڭ كىناسى ەمەس قوي. بۇعان قوسا، اتا- اناسى قازاقشا سويلەيتىن وتباسىلاردىڭ وزىندە كىشكەنتاي بالالارىنىڭ ءتىلى ورىسشا شىعىپ جاتىر. نەگە؟ ويتكەنى، ولاردىڭ كىشكەنتايىنان، كوزىن اشقانىنان كورەتىنى ورىسشا مۋلتفيلمدەر. بالالارىمىزدىڭ مەملەكەتتىك ءتىلدى ءبىلۋى اقساپ جاتىر»، - دەدى ول.

سونىمەن قاتار كوميتەت ءتوراعاسى بۇل رەتتە، مەملەكەت ارەكەتسىز وتىر، ەشتەڭە جاسامايدى دەۋگە بولمايتىندىعىن باسا ايتتى.

«30 جىلدىڭ ىشىندە ايماقتارداعى ءتىل وقىتۋ ورتالىقتارىندا قانشاما ادام ءتىل ۇيرەنىپ شىقتى. زامانعا لايىق ارەكەت ەتۋ ءۇشىن ءتىل الەمى، تەرمينكوم. ك ز، ەملە، اتاۋ. ك ز، ءتىل قۇرالى، سوزدىك قور سياقتى 15-تەن استام پلاتفورمالار بار. سولار ارقىلى دا ءتىلىمىزدى ىلگەرىلەتۋگە مۇمكىندىك جاسالعان. 2011-2019 -جىلدارى ەلىمىزدەگى 99 وقىتۋ ورتالىعىندا 514 مىڭنان استام ادامعا قازاق ءتىلى وقىتىلعان. ءبىراق ولاردىڭ بارلىعى ۇيرەنگەن ءتىلىن پايدالانىپ جاتىر ما؟ قاجەتتىلىك بار ما؟ ماسەلە وسىندا. وسى قاجەتتىلىكتى تۋعىزۋ ءۇشىن نە ىستەيمىز؟ مىنە وسى ماسەلەلەردى تالقىلاۋ ءۇشىن بۇگىن باس قوسىپ وتىرمىز»، - دەدى ادىلبەك قابا.

اۆتور: مارلان جيەمباي