قازاقپارات كۇنتىزبەسى: 30- شىلدە
اتاۋلى كۇندەر
حالىقارالىق دوستىق كۇنى
كۇنتىزبەدەگى ەڭ جاس مەرەكەلەردىڭ ءبىرى. ونى اتاپ ءوتۋ تۋرالى شەشىمدى ب ۇ ۇ باس اسسامبلەياسى 2011-جىلدىڭ 27- ساۋىرىندە وتكەن 65- سەسسياسىندا قابىلدادى.
جاڭا داتانى بەكىتۋگە يدەولوگيالىق نەگىز - مادەنيەت جانە بەيبىتشىلىك سالاسىنداعى ءىس-قيمىل دەكلاراتسياسى مەن باعدارلاماسى، سونداي-اق 2001-2010-جىلداردى قامتىعان بۇكىل عالامشاردىڭ مۇددەسى ءۇشىن بەيبىتشىلىك مادەنيەتى مەن زورلىق-زومبىلىقسىز حالىقارالىق ونجىلدىق بولدى.
ب ۇ ۇ مەملەكەتتىك قۇرىلىمدارعا، سونداي-اق حالىقارالىق جانە وڭىرلىك ۇيىمدارعا بۇل كۇندى ءار ەلدىڭ ءداستۇرى نەگىزىندە اتاپ ءوتۋدى ۇسىندى.
ب ۇ ۇ- نىڭ قارارىندا ءارتۇرلى حالىقتار اراسىنداعى دوستىقتى نىعايتۋ اسا ەرەكشە اتاپ وتىلگەن.
دۇنيەجۇزىلىك ادام ساۋداسىمەن كۇرەس كۇنى
2013-جىلى بىرىككەن ۇلتتار ۇيىمىنىڭ باس اسسامبلەياسى بەكىتتى. نەگىزگى مىندەت - ادام ساۋداسى قۇرباندارىنىڭ باسىنا تۇسكەن جاعداي تۋرالى اقپاراتتاردى ارتتىرۋ، ولاردىڭ قورعاۋ جانە قۇقىقتارىن قامتاماسىز ەتۋ.
ەستە قالار وقيعالار
1925 -جىلى پاۆلودار وبلىستىق اتقارۋ كوميتەتىنىڭ شتاتىنا مۇراعاتشى لاۋازىمىنىڭ ەنگىزىلۋىمەن پاۆلودار وبلىسىندا ارحيۆ مەكەمەلەرىنىڭ تاريحى باستاۋ الدى. وبلىس ارحيۆتەرىندە وبلىستىڭ ءتۇرلى مەكەمەلەرىنە جانە جەكە تۇلعالارعا قاتىستى 1 ميلليون 100 مىڭعا جۋىق قۇجات ساقتاۋلى. جەكە تۇلعالارعا قاتىستى قۇجاتتار 1823-2007-جىلدار ارالىعىن قامتيدى.
1937 -جىلى شىعىس قازاقستاندا «رۋبتسوۆسك- ريددەر» تەمىرجول ۋچاسكەسى بويىنشا قوزعالىس اشىلدى. 1992 -جىلى قازاقستان رەسپۋبليكاسى مەن كابو- ۆەردە رەسپۋبليكاسىنىڭ اراسىندا ديپلوماتيالىق قارىم- قاتىناس ورنادى. 1993 -جىلى قازاقستان رەسپۋبليكاسى مەن شىعىس ۋرۋگۆاي رەسپۋبليكاسىنىڭ اراسىندا ديپلوماتيالىق قارىم-قاتىناس ورنادى.
2012 -جىلى استانالىق «تۇمار» ءانسامبلى يتالياداعى حالىقارالىق كونكۋرس- فەستيۆالدە ءبىرىنشى ورىندى يەلەندى. 2016-جىلى قازاقستان مالايزيادا وتەتىن «جاسىل تەحنولوگيالار» حالىقارالىق كورمەسىنە شاقىرىلدى. وندا استانادا وتەتىن «ەكسپو-2017» حالىقارالىق كورمەسىن كەڭىنەن ناسيحاتتاۋ جانە قاتىسۋشىلاردى تارتۋ ءۇشىن قازاقستان تاراپىنا قاجەتتى كورمە جانە جارنامالىق قوندىرعىلارمەن قامتاماسىز ەتىلگەن الاڭ تەگىن بەرىلدى.
2017 -جىلى تۇركيانىڭ سامسۋن قالاسىندا XIII سۋردليمپيادا ويىندارى ءوتتى. وعان الەمنىڭ 97 ەلىنەن 3105 سپورتشى قاتىستى. قازاقستاندىق تاەكۆوندوشى ايان ءابدىراش 58 كەلىگە دەيىنگى سالماق دارەجەسىندە ونەر كورسەتىپ، التىن مەدال يەلەندى. فينالدا ول ۋكرايندىق سپورتشىدان باسىم ءتۇستى.
2017 -جىلى «ەكسپو-2017» باعدارلاماسى اياسىندا Astana Opera مەملەكەتتىك وپەرا جانە بالەت تەاترىندا «وپەراليا» دۇنيەجۇزىلىك وپەرا ونەرى كونكۋرسى ءوتتى.
اتالعان بايقاۋدا ءۇشىنشى جۇلدە مەن 10 مىڭ دوللار كولەمىندە سىياقىنى قازاقستاندىق ءانشى ماريا مۋدرياك يەلەندى.
2018 -جىلى پاتتايادا (تايلاند) تاي بوكسىنان FISU الەم چەمپيوناتىندا قازاق سپورتشىسى ەلامان ساياساتوۆ 54 كەلى سالماق ساناتىندا التىن مەدال الدى. بۇدان تىس، قازاقستان قۇراماسى سول چەمپيوناتتا ەكى كۇمىس، ءتورت قولا مەدال ەنشىلەدى.