ەلوردادا جىل سايىن 30 دان استام تاستاندى بالا اسىراپ الىنادى
بۇل مەرەكەنى الەم ەلدەرى 70 جىلدان استام اتاپ ءوتىپ كەلەدى. بۇل كۇنى بالالارعا ارنالعان ءتۇرلى مادەني جانە ويىن-ساۋىق شارالارى ۇيىمداستىرىلىپ، سابيلەردىڭ شاتتىققا بولەنەتىن كۇنى.
قازاقپارات ءتىلشىسى ايتۋلى مەرەكە قارساڭىندا نۇر-سۇلتان قالاسىنداعى مامانداندىرىلعان بالالار ءۇيى ديرەكتورىنىڭ ورىنباسارى انارگۇل سماعۇلوۆامەن تىلدەسكەن بولاتىن.
«ەلورداداعى مامانداندىرىلعان بالالار ءۇيى 1933 -جىلى اشىلعان، 90 جىلعا جۋىق تاريحى بار. باسىندا ءبىر قاباتتى ەتىپ اعاشتان تۇرعىزعان. 1987 -جىلى مامانداندىرىلعان بالالار ءۇيى دەپ اتاۋى وزگەرتىلدى. سەبەبى بۇل جەرگە ساۋ سابيلەردەن بولەك، دەنساۋلىعىندا اقاۋى بار نەمەسە تۋا بىتكەن كەمىستىگى بار بالالار دا قابىلدانا باستادى. قازىرگى ۋاقىتتا ورتالىقتا 50 دەن استام ءسابي بار. ولاردىڭ جاس شامالارى - 0-4 جاس اراسى. جانە بىزدە 100 دەن استام قىزمەتكەر ەڭبەك ەتەدى»، - دەدى انارگۇل سماعۇلوۆا.
ونىڭ ايتۋىنشا، بالالار ۇيىندە تەك تۇل جەتىم سابيلەر عانا ەمەس، سونىمەن قاتار اتا-اناسى بار بالالار دا تاربيەلەنۋدە.
«كەيبىر اتا-انالار الەۋمەتتىك جاعدايىنىڭ تومەندىگىنەن وتباسىن اسىراۋ مۇمكىندىگى بولماعاندىقتان، بالالارىن ءبىزدىڭ ورتالىققا اكەلەدى. ولاردىڭ ىشىندە وتباسىلىق جاعدايى تۇزەلگەن سوڭ، بالالارىن قايتا اكەتەتىن اتا-انالار بار، ال كەيبىرى قايتىپ ورالمايدى. ونداي جاعدايدا ءبىز اتا- اناسىن ىزدەستىرەمىز، ال ودان ناتيجە شىقپاعان جاعدايدا قۇزىرلى ورگاندارعا حابارلايمىز. ءبىزدىڭ ورتالىقتا بالالار 4 جاسقا دەيىن بولادى، ودان كەيىن ەرەسەك بالالار ۇيىنە، ال ەرەكشە كۇتىمدى قاجەت ەتەتىن بالالار ارنايى ورتالىقتارعا جىبەرىلەدى، بىزدەگى بالالاردىڭ 20 پايىزى مۇگەدەك نەمەسە ەرەكشە كۇتىمدى قاجەت ەتەدى»، - دەيدى ول.
ودان ءارى بالالار ءۇيى باسشىسىنىڭ ورىنباسارى ءسابي اسىراپ الۋعا قاتىستى اڭگىمە ءوربىتتى.
«سوڭعى جىلدارى بالالاردى تەك قازاقستاندىق وتباسىلار اسىراپ الۋدا. وكىنىشكە قاراي، تاستاندى بالالاردىڭ كوبىسى ءوزىمىزدىڭ قازاق ۇلتىنان. اتاپ ايتساق، بىزدەگى بالالاردىڭ 70 پايىزى قازاقتىڭ قاراكوزدەرى. جىل سايىن 30 دان استام بالانى وتانداستارىمىز ءوز باۋىرىنا باسادى، ال بىلتىر 34 بالانى اسىراپ الدى. بىزدەگى ءار بالانىڭ تاعدىرى ءارتۇرلى: ءبىرىن تاستاپ كەتسە، ەكىنشىسىن اتا-اناسى اسىراي الماعاندىقتان وسىندا اكەلۋگە ءماجبۇر بولعان. وسى ورايدا ءبىزدىڭ ماماندار ولارعا انا ورنىنا انا، اكە ورنىنا اكە بولىپ، جان-جىلۋلارىن ايامايدى. مامانداندىرىلعان بالالار ۇيىندە بارلىعىنا بىردەي ءتيىستى جاعداي جاسالعان، ەشقايسىسى نازاردان تىس قالمايدى. سونىمەن قاتار، بالا تاربيەسى مەن كۇتىمىنە قاجەتتى مامانداردىڭ بارلىعى بار» ، - دەدى ا. سماعۇلوۆا.
ماماننىڭ مالىمدەۋىنشە، ەلدەگى توتەنشە جاعدايعا بايلانىستى بالالار ۇيىندە جۇمىس كەستەسى وزگەرىپ، سانيتارلىق شارالار قاتاڭداتىلعان.
«كارانتيننىڭ العاشقى كۇنىنەن باستاپ، ارنايى بەكىتىلگەن قاۋلىنىڭ نەگىزىندە بارلىق تالارتاردى ساقتاي وتىرىپ جۇمىس ىستەۋدەمىز. بالالارىن ۋاقىتشا اكەلگەن اتا-انالار بىزگە تەلەفون شالىپ نەمەسە ۆيدەو بايلانىس ارقىلى بالالارىنىڭ جاعدايىن قاداعالاۋدا. بۇگىن مەرەكە بولعاندىقتان، سانيتارلىق ەرەجەلەردى ساقتاي وتىرىپ، بالالارعا ارنالعان مەرەكەلىك شارا ۇيىمداستىرۋدامىز. وندا بالالار ءان ايتىپ، بي بيلەپ ءوز ونەرلەرىن ورتاعا سالادى. سوڭىندا ەستەلىك سۋرەتكە ءتۇسىپ، تاتتىلەر تاراتىلاتىن بولادى»، - دەدى ول.
اۆتور: ءالي يبرايەۆ