قازاقستاننىڭ حالىقارالىق قورى 30 ميلليارد دوللارعا جۋىقتادى

نۇر-سۇلتان. قازاقپارات - 2020 -جىلعى اقپان ايىنىڭ سوڭىندا قازاقستاننىڭ حالىقارالىق قورى 29,9 ميلليارد دوللاردى قۇرادى.

بۇل وتكەن جىلدىڭ وسىنداي كەزەڭىمەن (29,1 ميلليارد دوللار) سالىستىرعاندا 2,6 پايىزعا، وسى جىلدىڭ قاڭتارىنان 1,9 پايىزعا كوپ، دەپ حابارلايدى قازاقپارات ءتىلشىسى Finprom.kz سايتىنا سىلتەمە جاساپ.

قورلاردىڭ ۆاليۋتالىق بولىگى ساۋىردەگى جاعداي بويىنشا ءبىرشاما قىسقارىپ، نە ءبارى 9,6 ميلليارد دوللاردى قۇرادى. ال 2015 -جىلدىڭ اقپانىندا ونىڭ كولەمى 21,3 ميلليارد دوللار بولعان ەدى. حالىقارالىق قوردىڭ قۇرامىنداعى التىن كولەمى قارقىندى ءوسىپ كەلە جاتىر.

ءبىر جىلدىڭ ىشىندە ۇلتتىق بانكتىڭ التىن-ۆاليۋتا قورى قۇرىلىمىنداعى مونەتارلىق التىن كولەمى 33,7 پايىزعا نەمەسە 5,1 ميلليارد دوللارعا ۇلعايىپ، 20,3 ميلليارد دوللارعا جەتىپ وتىر.

سوڭعى 5 جىلدىڭ ىشىندە التىن قورىنىڭ ۇلەسى 26,1 پايىزدان 67,9 پايىزعا دەيىن ارتتى.

تولىقتاي العاندا، حالىقارالىق قورلاردىڭ ءوسىمى التىن ساتىپ الۋ وپەراتسيالارىن جۇرگىزۋ، سونىمەن قاتار ونىڭ الەمدىك نارىقتاعى باعاسىنىڭ كوتەرىلۋى ەسەبىنەن ورىن الدى.

ايتالىق، 2020 -جىلدىڭ 31-ناۋرىزىنداعى جاعدايعا سايكەس، التىننىڭ 1 ۋنتسياسىنىڭ باعاسى 1618,3 دوللاردى قۇراپ، جىل باسىنان بەرى 5,4 پايىز ءوستى.

ايتا كەتەرلىگى، الەمنىڭ كوپتەگەن دامىعان ەلدەرىنە مەملەكەتتىڭ التىن-ۆاليۋتا قورىنداعى التىن ۇلەسى باسىم بولىكتى الادى.

ماسەلەن، ە و ەلدەرىندە مەملەكەت قورىنداعى التىن ۇلەسى ورتاشا ەسەپپەن 58,6 پايىزدى قۇرايدى. وسى جىلدىڭ ناۋرىزىندا الەم ەلدەرى ىشىندە ا ق ش-تىڭ التىن قورى ەڭ كوپ بولدى. بۇل ەلدە 8,1 مىڭ توننا التىن بار.

ال قازاقستان التىن قورى بويىنشا جالپى الەمدىك رەيتينگتە 15-ورىندا تۇر. ەلىمىزدە 386,5 توننا التىن بار.

اۆتور: مارلان جيەمباي