ەلوردادا 30 مىڭ مەديتسينالىق ماسكا تەگىن تاراتىلۋدا
«مەملەكەت باسشىسى قاسىم-جومارت توقايەۆ حالىقتى ماسكامەن قامتاماسىز ەتۋ كەرەكتىگى تۋرالى ايتقان بولاتىن، سەبەبى ازاماتتاردىڭ قاۋىپسىزدىگى ءبىرىنشى ورىنعا قويىلادى. بۇگىن نۇر-سۇلتان قالاسى بويىنشا 30 مىڭ مەديتسينالىق ماسكا تاراتۋ جوسپارلانىپ وتىر. اكسيا ساۋدا ورتالىقتارى، قوعامدىق كولىكتەردىڭ ءىشى سياقتى قالانىڭ ادامدار كوپ جۇرەتىن 5 نۇكتەسىندە جۇزەگە اسادى. ادام باسىنا 5 ماسكادان بەرىلەدى. كارانتين رەجيمىنىڭ ماقساتى - كوروناۆيرۋستىڭ تارالۋ قاۋپىن ازايتۋ، سول سەبەپتى كارانتين كەزىندە ءبارىڭىزدى ۇيدە وتىرۋعا شاقىرامىز. قالا بويىنشا 24/7 رەجيمىندە جۇمىس ىستەپ جاتقان 200 ۆولونتەر بار. ولار «نۇر وتان» پارتياسىمەن بىرلەسىپ، حالىقتىڭ الەۋمەتتىك از قامتىلعان توبىنا ازىق-تۇلىك، ماسكا تاراتۋعا، سونداي- اق پوليتسيا دەپارتامەنتى وكىلدەرىمەن بىرلەسىپ، ءدامحانا، مەيرامحانالاردىڭ جۇمىسىنا رەيد جاساۋعا، ءتيىستى ورگانعا جەدەل تۇردە حابارلاسىپ، ونىڭ جابىلۋىنا كومەكتەسۋدە»، - دەيدى نۇر-سۇلتان قالاسى جاستار ساياساتى ماسەلەلەرى باسقارماسىنىڭ باسشىسى داۋلەت كارىبەك.
بۇل اكسيا الماتى قالاسىندا جالعاسىن تابادى.
«بۇگىن اكسيانى شىمكەنت قالاسىندا وتكىزۋدى جوسپارلاپ وتىرمىز. شىمكەنتتە شامامەن 40 ۆولونتەر بار. ەكى قالادا شامامەن 60 مىڭ ماسكا تاراتىلادى دەپ جوسپارلانۋدا. وسىنداي اكسيانى الماتى قالاسىندا دا وتكىزۋ بويىنشا كەلىسسوز جۇرگىزىلىپ جاتىر»، - دەيدى Mega pharma كومپانياسىنىڭ پەرسونالدارمەن جۇمىس ىستەۋ بويىنشا مەنەدجەرى ۆلاديسلاۆ اندرەيەۆ.
تەگىن ماسكا العان قالا تۇرعىندارى وسى شارانى ۇيىمداستىرۋشىلارعا العىس ءبىلدىردى.
«وسى شارانى ۇيىمداستىرىپ جاتقان ازاماتتارعا راحمەت. ءقازىر ءدارىحانادان ماسكا تابۋ قيىنداپ كەتكەن ۋاقىتتا بۇل تاماشا كومەك بولدى»، - دەيدى قالا تۇرعىنى قوبىلاندى قۇداكەلدى.
اۆتور: زارينا قاھارمان