ەلوردادا 30 گرادۋس اياز بولادى

نۇر-سۇلتان. قازاقپارات - «قازگيدرومەتتىڭ» قىسقا مەرزىمدى بولجامدار باسقارماسىنىڭ باسشىسى الۋا ساحانوۆا قاڭتار ايىنداعى كليمات تۋرالى ايتىپ بەردى، دەپ حابارلايدى قازاقپارات ءتىلشىسى.

«الداعى تاۋلىكتەردە، ياعني 29-30- قاڭتاردا سولتۇستىك-باتىس انتيتسيكلوننىڭ كەلۋى كۇتىلۋدە. وسىنىڭ سالدارىنان كۇن سۋىتىپ، قاردىڭ ءتۇسۋى توقتايدى. اۋا تەمپەراتۋراسى قاڭتار ايىنداعى قالىپتى دەڭگەيدە بولادى، تۇندە سولتۇستىكتە، شىعىستا جانە ورتالىقتا مينۋس 20-30 گرادۋسقا دەيىن تومەندەيدى»، - دەدى ا. ساحانوۆا ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.

الايدا تەمپەراتۋرانىڭ وسى دەڭگەيدە تومەن بولۋى ۇزاققا سوزىلمايدى.

«اتلانتيكالىق تسيكلون رەسەيدىڭ ەۋروپالىق اۋماعىنا شىعۋعا جاقىندادى. وسىعان بايلانىستى جىلى اۋا ءبىزدىڭ باتىس وڭىرلەرگە جىلجي باستايدى»، - دەدى سپيكەر.

ونىڭ سوزىنە قاراعاندا، قاڭتار ايىنىڭ باسىنان بەرى ەلوردادا 49 ميلليمەتر جاۋىن-شاشىن تۇسكەن، ال ءبىر ايداعى نورما 16 ميلليمەتر. ياعني بۇل كورسەتكىش ءۇش ايدىڭ نورماسىن قامتىپ تۇر.