الماتىدا وتەتىن «الەم بارىسىنا» 30 ەلدەن بالۋاندار كەلەدى

الماتى. قازاقپارات - بۇگىن، 2 -جەلتوقساندا الماتى قالاسى، «بالۋان شولاق» سپورت سارايىندا ق ر تۇڭعىش پرەزيدەنتى كۇنىنە ورايلاستىرىلعان قازاق كۇرەسىنەن ابسوليۋتتىك «الەم بارىسى» الەم چەمپيوناتى وتەدى، دەپ حابارلايدى قازاقپارات «Qazaqstan Barysy» قازاق كۇرەسىن دامىتۋ جانە قولداۋ قورىنىڭ باسپا ءسوز قىزمەتىنە سىلتەمە جاساپ.

چەمپيونات قازاقستاننىڭ تاريحي جانە مادەني مۇراسىن دامىتۋ، شەت ەلدەردە قازاق كۇرەسىن دامىتۋ بارىسىنداعى ىنتىماقتاستىق پەن ءوزارا بايلانىسىن نىعايتۋ، قازاق كۇرەسىن حالىقارالىق دەڭگەيدە ودان ءارى جەتىلدىرۋ، ناسيحاتتاۋ جانە بەدەلىن كوتەرۋ، قازاق كۇرەسىنەن «الەم بارىسىن» انىقتاۋ ماقساتىن جۇزەگە اسىرادى.

ءتورتىنشى رەت وتەتىن باسەكەگە 30 ەلدەن 33 بالۋان قاتىسادى. «الەم بارىسى» اتانۋعا ا ق ش، اۋستراليا، ازەربايجان، برازيليا، گرەكيا، گرۋزيا، ءۇندىستان، يران، يسپانيا، يتاليا، كامەرۋن، كونگو، كورەيا، كۋبا، قىرعىزستان، ليتۆا، موڭعوليا، نيدەرلاندى، پاكىستان، پولشا، رەسەي، سلوۆەنيا، تاجىكستان، تۇرىكمەنستان، تۇركيا، وزبەكستان، ۋكراينا، ەستونيا، ياپونيا سەكىلدى ەلدەردىڭ جانە قازاقستاننىڭ اتاقتى بالۋاندارى قاتىسادى.

بۇل سىندا ەلىمىزدىڭ نامىسىن ا. نۇعىماروۆ (ش ق و)، ر. ءابدىرازاقوۆ (الماتى قالاسى)، م. يساعابىلوۆ ( قىزىلوردا وبلىسى)، ن. جارىلعاپوۆ (ماڭعىستاۋ وبلىسى) سىندى بالۋاندار قورعايدى.

«الەم بارىسى» چەمپيوناتى 2 جەلتوقساندا 13:00-دە بالۋانداردىڭ جەرەبە تارتۋ راسىمىنەن باستالماق. شارا اياسىندا كورەرمەندەرگە سپورتتىق سايىستارمەن قاتار قازاقستاندىق ەسترادا جۇلدىزدارىنىڭ قاتىسۋىمەن كونتسەرتتىك باعدارلاما ۇسىنىلادى.

«الەم بارىسى» چەمپيوناتىنىڭ بيىلعى جۇلدە قورى 20 ميلليون تەڭگەنى قۇرايدى. جەڭىمپاز اتانعان بالۋانعا 10 ميلليون تەڭگە جانە التىن بەلبەۋ، ەكىنشى ورىن يەگەرىنە 6 ميلليون تەڭگە جانە ءۇشىنشى ورىن يەگەرىنە 3 ميلليون تەڭگە، سايكەسىنشە كۇمىس جانە قولا بەلبەۋلەرمەن ماراپاتتالادى. ال، «جەڭىسكە دەگەن جىگەرى ءۇشىن» اتانعان سپورتشىعا 1 ميلليون تەڭگە بەرىلەدى.

سونداي-اق، جىلداعى داستۇرگە ساي جانكۇيەرلەر اراسىندا اۆتوكولىك ويناتىلادى. بيلەتتەر zakazbiletov.kz سايتىندا ساتىلۋدا. باعاسى 500 تەڭگە مەن 2000 تەڭگە ارالىعىندا.

چەمپيوناتتى الماتى قالاسى اكىمدىگىنىڭ قولداۋىمەن، ق ر مادەنيەت جانە سپورت مينيسترلىگىنىڭ سپورت جانە دەنە شىنىقتىرۋ ىستەرى كوميتەتى، ق ر قازاق كۇرەسى فەدەراتسياسى جانە «Qazaqstan Barysy» قازاق كۇرەسىن دامىتۋ جانە قولداۋ قورى ۇيىمداستىرۋدا. سونىمەن قاتار، «قازاقتەلەكوم» اق، «ORDA- INVEST» كورپوراتسياسى جانە «ءساتتى جۇلدىز» ا ق دەمەۋشىلىك جاسايدى.

چەمپيوناتتىڭ اقپاراتتىق سەرىكتەستەرى Qazaqstan, Qazsport تەلەارناسى. چەمپيوناتتىڭ رەسمي اقپاراتتىق رەسۋرسى qazaqstanbarysy.kz سايتى، قوسىمشا اقپارات «قازاقستان بارىسى» قازاق كۇرەسىن دامىتۋ قورىنىڭ الەۋمەتتىك جەلىلەردەگى رەسمي وكىلدىكتەرىندە تاراتىلادى.