الماتىدا ءيىستى گازدان 30 ادام ۋلانعان
«جىل باسىنان بەرى 10 توتەنشە جاعداي تىركەلدى. 30 ادام گازدان جانە جانعان زاتتاردىڭ تۇتىنىنەن ۋلاندى. ونىڭ 19 ى - بالالار. وقيعالاردىڭ بىرىندە تابيعي گاز تارالىپ، اۋا- گاز قوسپاسى جارىلعان. سالدارىنان ەكى ادامنىڭ دەنەسىن (%80-100) كۇيىك شالىپ، كوز جۇمدى. ءۇش جاعدايدا 8 ادام اۋىر جاعدايدا اۋرۋحاناعا جەتكىزىلدى، قالعان 7 جاعدايدا - 27 ادام ورتاشا جانە جەڭىل دارەجەدە جاراقات الدى»، - دەيدى الماتى قالالىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى ايزات مولداعاسىموۆا.
ون توتەنشە جاعدايدىڭ، ۇشەۋى 2019 -جىلدىڭ قاڭتار- مامىرىندا بولدى. وندا 6 ادام زارداپ شەكتى. جەتى جاعداي 1 -قازان - 14 -قاراشا ارالىعىندا تىركەلدى. بۇل كەزدە 24 ادامعا كومەك كورسەتىلدى.
«بۇل رەتتە، 4 جاعدايدا ادامدار ءيىستى گازعا قاتتى وتىنمەن جاناتىن پەشتەردىڭ اقاۋىنان، 4 جاعدايدا گاز قازاندىقتارىنان گازدىڭ شىعۋىنان جانە 1 جاعدايدا ءۇي يەسىنىڭ نەمقۇرايلىلىعىنان باللوننان پروپان گازىنىڭ شىعۋىنان ۋلانعان»، - دەپ حابارلادى دەپارتامەنتتەن.
تابيعي گازدىڭ تارالۋىنان ەكى توتەنشە جاعداي ورىن الدى. بىرەۋىندە اۋا- گاز قوسپاسى جارىلىپ، ءبىر ادام مەرت بولدى. ەكىنشى جاعدايدا - ۇيدەن ءورت شىعىپ، تۇرعىندار ىستان ۋلاندى.
اۆتور: الما مۇقانوۆا