اباي شىعارمالارى الەمنىڭ 30 تىلىنە اۋدارىلادى
ق ر سىرتقى ىستەر مينيسترلىگى باسپا ءسوز قىزمەتىنىڭ مالىمەتىنشە، اباي قۇنانباي ۇلىنىڭ شىعارمالارى الەمنىڭ 30 تىلىنە اۋدارىلادى. مۇنان بولەك، رەسەي فەدەراتسياسىندا قولدانىس اياسى كەڭ 10 تىلگە ابايدىڭ «قارا سوزدەرى» مەن ولەڭدەرى اتاقتى جازۋشىلار مەن اۋدارماشىلاردىڭ قاتىسۋىمەن ىجداھاتپەن اۋدارىلىپ، رەسەي باسپالارىندا باسىپ شىعارۋ جوسپارلانعان.
«ەلشىلىكتەر م. اۋەزوۆتىڭ «اباي جولى» رومانىن اراب، تۇرىك، گرەك، ارميان، موڭعول، ۆەتنام تىلدەرىنە اۋدارۋعا اتسالىسۋعا دايىن. كەمبريدج ۋنيۆەرسيتەتىنىڭ باسپاسىندا بريتاندىق كەڭەسپەن بىرلەسىپ، ابايدىڭ ولەڭدەرى مەن قارا سوزدەرى كىرەتىن جيناقتى اعىلشىن جانە قازاق تىلدەرىندە باسىپ شىعارىلادى»، - دەپ اتاپ وتەدى ۆەدومستۆودان.
مۇنان بولەك، ەلىمىزدىڭ سىرتقى ىستەر مينيسترلىگى ق ر تۇڭعىش پرەزيدەنتى - ەلباسى كىتاپحاناسىمەن جانە ۇلتتىق اۋدارما بيۋروسىمەن بىرلەسىپ، شەت تىلدەردە جارىق كورگەن اباي شىعارمالارىنىڭ تۇساۋكەسەرىن گەرمانيا، بەلگيا، ليۋكسەمبۋرگ، قىتاي، تۇركيا، بىرىككەن اراب امىرلىكتەرىندە وتەتىن حالىقارالىق كىتاپ كورمەلەرىندە وتكىزبەك.
ەستەرىڭىزگە سالا كەتسەك، تاياۋدا اقوردادا مەملەكەتتىك حاتشى قىرىمبەك كوشەربايەۆتىڭ توراعالىعىمەن ابايدىڭ 175 جىلدىق مەرەيتويىن دايىنداۋ جانە وتكىزۋ جونىندەگى مەملەكەتتىك كوميسسيا وتىرىسى وتكەن بولاتىن. سول جيىندا 2020 -جىلدىڭ 8 - قاڭتارىندا ەلورداداعى «قازاقستان» ورتالىق كونسەرت زالىندا حاكىم ابايدىڭ 175 جىلدىق مەرەيتويىنىڭ باستالۋىنا ارنالعان سالتاناتتى شارا وتەتىندىگى بەلگىلى بولعان ەدى.