اتىراۋ تۇرعىنىنىڭ پاتەرىنەن 30 توننا قوقىس شىعارىلدى

 اتىراۋ. قازاقپارات - اتىراۋدا كوممۋنالدىق قىزمەتتەر جەرگىلىكتى تۇرعىننىڭ پاتەرىنەن ءۇش كاماز قوقىس شىعاردى، دەپ حابارلايدى قازاقپارات ءتىلشىسى قالا اكىمىنىڭ باسپا ءسوز قىزمەتىنە سىلتەمە جاساپ.

 «ايەلدىڭ پاتەرىندەگى قوقىس 20 جىل بويى جينالعان. ايەل ەشقايدا جۇمىس ىستەمەيدى، جالعىز تۇرادى، كۇنكورىسكە جۇمسار قاراجاتى مۇلدە جوق. ەكى جىل بۇرىن كورشىلەرى ۇيدە ەگەۋقۇيرىقتار كوبەيە باستاعانىن اڭعارعان. زيانكەستەر مەكەن ەتكەن ورىن 60 جاستاعى ازاماتشانىڭ پاتەرى بولىپ شىقتى» ، - دەپ مالىمدەدى قالالىق اكىمدىكتىڭ باسپا ءسوز قىزمەتى.

 «پاتەردە ەكى بولمە بار، سونىڭ ەكەۋى دە قوقىسقا تولعان. ونىڭ ءبارىن ايەل اينالا ماڭداعى جۋىندى توگەتىن ورىننان اكەلگەن. پاتەردەگى قوقىستار ءشىري باستاعان. ەگەۋقۇيرىقتار ءبىزدىڭ پاتەرلەرگە جۇگىرىپ كىرىپ، بالالاردى شوشىتىپ جاتىر. وسى ماسەلەنى ايتىپ اتىراۋ وبلىستىق اكىمدىگىنىڭ Tەlegram داعى ارناسىنا جۇگىندىك. قالا بيلىگى جىلدام كەلىپ ماسەلەنى شەشتى» ، - دەيدى ءۇيدىڭ تۇرعىنى الەكساندرا پاك.

 اتىراۋ اكىمىنىڭ تاپسىرماسىمەن كوميسسيا قۇرىلدى. جۇمىس توبىنىڭ مۇشەلەرى ايەلدىڭ پاتەرىنە بارىپ، جاعدايمەن تانىستى.

«انىقتالعانداي، 1959 -جىلى تۋعان ازاماتشا ن. -نىڭ تۇلعاسىن كۋالاندىراتىن قۇجاتى جوق، تەك كەڭەس وكىمەتى تۇسىندا العان ءتولقۇجاتى عانا بار بولىپ شىقتى. وسى كۇنگە شەيىن جاسىنا بايلانىستى زەينەتاقى الماي كەلگەن. جەرگىلىكتى پوليسەيلەر ايەلدى اۋىر ومىرلىك جاعدايدا قالعان تۇلعالاردى الەۋمەتتىك بەيىمدەۋ ورتالىعىنا ورنالاستىردى. وندا ماماندار ايەلگە مەديتسينالىق جانە پسيحولوگيالىق كومەك كورسەتىپ، قۇجاتتارىن قالپىنا كەلتىرۋ جانە زەينەتاقى راسىمدەۋمەن اينالىسادى» ، - دەيدى قالا اكىمدىگىنىڭ الەۋمەتتىك باعدارلامالاردى ۇيلەستىرۋ ءبولىمىنىڭ باسشىسى نۇرلى حابيەۆا.

 ونىڭ ايتۋىنشا، ايەلدىڭ پاتەرىن سانيتارلىق تازارتۋمەن «ارنايى اۆتو بازا» ج ش س 10 قىزمەتكەرى ەكى كۇن بويى اينالىسقان. جۇمىسشىلار ايەلدىڭ پاتەرىنەن جالپى 30 توننا قوقىس شىعارعان. ونى تاسىمالداۋ ءۇشىن ءۇش «كاماز» كولىگى قاجەت بولعان.

اۆتور: ا. سوكولوۆ