الماتى زووباعىندا 30 جىلدا العاش رەت تاپير تولدەدى

الماتى. قازاقپارات - الماتى زووباعىندا ءۇش جانۋار تولدەدى، دەپ حابارلايدى قازاقپارات ءتىلشىسى.

اتاپ ايتقاندا، الا تاپير جانۋارى مەن قوس وركەشتى تۇيە، كەنگۋرۋدىڭ سانى ارتتى. ونىڭ ىشىندە تاپيردىڭ تولدەۋى سوڭعى رەت 80-جىلداردىڭ سوڭىندا تىركەلگەن.

تاپيردىڭ اتالىعى - جەتى جاسار مارتين 2013-جىلى كالينينگرادتان اكەلىنگەن. انالىعى - ءتورت جاسار دۋنياشا 2017-جىلى نوۆوسيبيرسك قالاسىنان جەتكىزىلدى.

«تاپير 26- اقپان كۇنى تاڭعى ساعات 7:00 دە تولدەدى. ەنەسى مەن ءتولىن كارانتين بولىمىنە ورنالاستىردىق. كۇن جىلىنعاندا ولار ورتاق ۆولەرگە شىعارىلادى»، - دەدى زووباق فوتوگرافى ميحايل سوروكوۋموۆ.

زووباق كەلۋشىلەرى ەندى كىشكەنتاي تاپيردى عانا ەمەس، قوس وركەشتى تۇيەنىڭ بوتاسى مەن كەنگۋرۋدىڭ بالاسىن دا كورەتىن بولادى. تۇيە 27- اقپان كۇنى تولدەدى. جانۋاردىڭ اتالىعى مەن انالىعى 11 جاستا.

«قوس وركەشتى تۇيەلەر ايازدى كليماتقا جاقسى بەيىمدەلگەن. جۇك تاسۋعا ءتوزىمدى. ال نار تۇيەلەر ءشولدى كليماتقا، ۇزاق جۇرىسكە شىدامدى كەلەدى. ونىمەن قوسا، امەريكالىق وركەشسىز تۇيەلەردىڭ 4 ءتۇرى بار (لاما، الپاكا، گۋاناكو مەن ۆيكۋنيا). قازاق ءۇشىن تۇيە مالى ەرەكشە قاسيەتتى. تۇيە - مولشىلىق پەن بايلىقتىڭ بەلگىسى»، - دەيدى زووباق وكىلدەرى.

كەنگۋرۋ بالاسى بىلتىر قاراشا ايىندا تۋعان ەكەن. ءبىراق زووباق قىزمەتكەرلەرى ول تۋرالى جاقىندا بىلگەن. ونىڭ سەبەبى - ەنەسى بالاسىن سومكەسىندە تىعىپ كەلگەن.

«كەنگۋرۋ بالالارى ەمبريون كۇيىندە تۋىلاتىنى بەلگىلى. سوسىن ەنەسىنىڭ تەرىسىمەن جورعالاپ وتىرىپ، سومكەگە جەتەدى. سوندا جەتىلەدى. جاقىندا جاس كەنگۋرۋ سومكەدەن تۇمسىعىن شىعاردى. ول سومكەدە ءالى 7 اي ءومىر سۇرەدى. دەگەنمەن، ونىڭ انالىعى مەن اتالىعى جازعى ۆولەرگە شىعا بەرەدى»، - دەدى ميحايل سوروكوۋموۆ.

قالالىق زووباق ديرەكتورىنىڭ مىندەتىن اتقارۋشى ايگۇل تۋلەيەۆا كەلۋشىلەردىڭ تاپير تولىنەن باسقاسىن كورە الاتىنىن ايتتى.

جاڭا تۋعان تولدەرگە ءالى ەسىم بەرىلگەن جوق.