ءبىر اۋىلدا 30 ءۇي مەن عيمارات جانىپ كەتتى

استانا. قازاقپارات - داعىستانداعى ءبىر اۋىلدا 30-عا جۋىق ءۇي مەن قورا ورتەنىپ كەتتى، ەشكىم زارداپ شەككەن جوق.

بۇل تۋرالى ر ف قۇرامىنداعى رەسپۋبليكانىڭ باسشىسى ۆلاديمير ۆاسيلەۆ ءمالىم ەتتى، دەپ حابارلايدى تاسس.

«ماسكەۋ ۋاقىتىمەن 00:45-تەگى جاعداي بويىنشا 17 تۇرعىن ءۇي، 14 قورا جانىپ كەتتى. ەشكىم زارداپ شەككەن جوق. مالدى دا قورادان شىعارىپ ۇلگەردىك»، - دەدى ۆاسيلەۆ.

قازىرگى تاڭدا ءورتتى سوندىرۋگە 1,5 مىڭ ادام جۇمىلدىرىلعان. ايماق باسشىسىنىڭ ايتۋىنشا، سۋ جەتكىزۋ جاعىنان قيىندىقتار بار، سونىمەن قاتار ءورتتى اۋىزدىقتاۋعا جەل مەن اۋىلدىڭ ورنالاسقان جەرى دە كەدەرگى كەلتىرىپ وتىر. ءبىراق جاعداي باقىلاۋعا الىنعان.