اتا-انالاردىڭ جاردەماقىسى 30 پايىزعا ارتادى

استانا. قازاقپارات - مەملەكەت باسشىسى نۇرسۇلتان نازاربايەۆ مۇگەدەك بالالاردى اسىراپ وتىرعان اتا-انالاردىڭ جاردەماقىسىن ارتتىرۋدى تاپسىردى، دەپ حابارلايدى قازاقپارات ءتىلشىسى.

«ۇكىمەتكە مۇگەدەك بالالاردى اسىراپ وتىرعان اتا-انالاردىڭ جاردەماقىسىن 30 پايىزعا كوبەيتۋدى تاپسىرامىن. ءبىزدىڭ ەسەبىمىزگە سايكەس، وسىنىڭ ارقاسىندا 100 مىڭ ادامنىڭ جاردەماقىسى وسەدى. وسى ماقساتتا 2019-2021-جىلدارى قوسىمشا 300 ميلليارد تەڭگەنى ءبولىپ بەرۋىمىز كەرەك»، - دەدى ن. نازاربايەۆ «نۇر وتان» پارتياسىنىڭ XVIII سەزىندە.

پرەزيدەنتتىڭ ايتۋىنشا، ەڭبەككە جارامدى ازاماتتاردى جۇمىسقا تارتۋ قاجەت. بۇگىندە ۇيدە وتىرىپ تا تابىس تابۋعا بولادى.

«جەرگىلىكتى بيۋجەت ەسەبىنەن دە كومەك بەرۋدى كۇشەيتۋ كەرەك. ونداي مۇمكىندىكتەر بار. قارجىنى ۇنەمدەپ، قاجەت جەرگە جۇمساۋ قاجەت. وتكەن جىلى جەرگىلىكتى بيۋجەتتەردىڭ ەسەبىنەن 135 ميلليرد تەڭگە كومەك بەرىلدى. وسىنداي كومەكتى جالعاستىرۋ قاجەت»، - دەپ اتاپ كورسەتتى ن. نازاربايەۆ.

ايتا كەتەيىك، بيىل «نۇر وتان» پارتياسىنىڭ قۇرىلعانىنا 20 جىل تولىپ وتىر. وسى ۋاقىتقا دەيىن رەسپۋبليكا بويىنشا 1 ميلليوننان استام ادامعا پارتيا بيلەتتەرى تابىستالدى. ۇيىمعا مۇشە ازاماتتاردىڭ 62 پايىزى - ايەلدەر. ال 29-40 جاس ارالىعىنداعى مۇشەلەردىڭ سانى 27 پايىزدى قۇرايدى.