پرەزيدەنت بيۋدجەت سالاسىنداعى ايلىعى تومەن قىزمەتكەرلەردىڭ جالاقىسىن 30 پايىزعا ارتتىرۋدى تاپسىردى
«ءبىز اسا اۋقىمدى تەگەۋرىندەر مەن جاھاندىق سىنداردىڭ زامانىندا ءومىر ءسۇرىپ جاتىرمىز. ءبىزدىڭ جيناپ قويعان رەزەرۆتەر كۇردەلى كەزەڭدەردە پايداعا اسۋى ءتيىس. وسى رەزەرۆتەردىڭ ارقاسىندا ءبىز وڭتۇستىك- شىعىس داعدارىسىنان 1997 جانە 2001 -جىلدارداعى قيىن كەزەڭدەردەن وتتىك. ءبىز 2007-2009 -جىلدارداعى داعدارىستان دا امان وتتىك. سول سەبەپتى، رەزەرۆتەر كەرەك. ءبىراق، قاجەت بولعان جاعدايدا بىرگە ەل يگىلىگىنە جاراتاتىن بولامىز»، - دەدى پرەزيدەنت «نۇر وتان» پارتياسىنىڭ كەزەكتى XVIII سەزىندە.
نۇرسۇلتان نازابايەۆ ءوز سوزىندە قازىرگى ۋاقىتتا قازاقستان نارىق زاماندا ءومىر ءسۇرىپ جاتقانىن ەسكە سالدى.
«سول سەبەپتى، مەملەكەتتىڭ باستى مىندەتى - ازاماتتارعا جۇمىس تاۋىپ بەرۋ. كومەك مۇقتاج ساناتتاعى ادامدارعا بەرىلىپ، اتاۋلى سيپاتقا يە بولۋى كەرەك. مەن بۇل ماسەلەنى جەكە باقىلاۋىما الامىن. پارتيالاستاردى دا بولىنگەن قاراجاتتى ءاربىر وتباسىعا جەتكىزۋدە باقىلاۋعا كومەكتەسۋدى سۇرايمىن. مەنىڭ تاپسىرمام بويىنشا بۇگىنگى تاڭدا ازاماتتاردى الاڭداتاتىن ماسەلەلەلەردى انىقتادى. ول ماسەلەلەر - بالاعا بولىنەتىن جاردەماقى، كوپبالالاى وتباسىلاردىڭ جاعدايىن جاقسارتۋ، باسپانامەن قامتۋ. پارتيانىڭ وسى ماسەلەلەردى شەشۋدەگى ماڭىزدى ۇلەسى - الەۋمەتتىك ساياساتتى ءۇش باعىت بويىنشا جۇزەگە اسىرۋ بولىپ تابىلادى. بىرىنشىدەن، حالىقتىڭ از قامتىلعان بولىگىنىڭ كىرىسىن ارتتىرۋ جانە قولداۋ، ەكىنشىدەن، كىرىسى تومەن ازاماتتاردىڭ تۇرعىن ءۇي ماسەلەسىن شەشۋ جانە ءبىلىم، دەنساۋلىق ساقتاۋ سالاسىن جاقسارتۋ، ءۇشىنشىسى ايماقتاردى كەشەندى تۇردە دامىتۋ»، - دەدى نۇرسۇلتان نازاربايەۆ.
پرەزيدەنت قازىرگى تاڭدا قازاقستاندىق وتباسىلاردىڭ جاعدايىن جاقسارتۋعا ماڭىز بەرۋ كەرەكتىگىن اتاپ ءوتتى.
«وسى جىلدان باستاپ قاڭتار ايىندا بازالىق ايلىق مولشەرىن ءبىر جارىم ەسەگە وسىردىك. مۇعالىمدەردىڭ ايلىعىن 30 پايىزعا، بىلىكتىلىگىن ارتتىرعان ۇستازدارعا 50 پايىزعا ارتتىردىق. دەمەك، وسى ساناتتاعى ازاماتتاردىڭ كىرىسى ايتارلىقتاي ءوستى. بۇل باعدارمادا ءبىر ميلليون ازاماتتىق قىزمەتكەردى قامتيدى. وسى جىلدىڭ 1 -شىلدەسىنەن باستاپ بيۋدجەت سالاسىنداعى ايلىعى تومەن قىزمەتكەرلەردىڭ جالاقىسىن 30 پايىزعا ارتتىرۋدى تاپسىرامىن»، - دەدى نۇرسۇلتان نازاربايەۆ.
ەسكە سالا كەتسەك، ەلورداداعى تاۋەلسىزدىك سارايىندا ەلباسى نۇرسۇلتان نازاربايەۆتىڭ توراعالىعىمەن «نۇر وتان» پارتياسىنىڭ كەزەكتى XVIII سەزى وتكىزىلۋدە. سەزد كۇن تارتىبىندە بىرنەشە ماسەلەنى قاراستىرۋ كوزدەلگەن. اتاپ ايتقاندا، الدىمەن «نۇر وتان» پارتياسىنىڭ 2030 -جىلعا دەيىنگى باعدارلاماسى تۋرالى ماسەلە قوزعالادى. ودان كەيىن پارتيانىڭ جارعىسىنا وزگەرىستەر مەن تولىقتىرۋلار قاراستىرىلىپ، پارتيا ساياسي كەڭەسىنىڭ جانە ورتالىق باقىلاۋ- تەكسەرۋ كوميسسياسىنىڭ ەسەپتى كەزەڭ بويىنشا جۇمىسىنىڭ قورىتىندىلارى شىعارىلادى. سونىمەن قاتار پارتيا ساياسي كەڭەسىنىڭ جانە ورتالىق باقىلاۋ- تەكسەرۋ كوميسسياسىنىڭ مۇشەلەرى سايلاناتىن بولادى.
سەزد جۇمىسىنا 2 مىڭعا جۋىق ادام قاتىسۋدا. ولاردىڭ 1200- ءى ەلىمىزدىڭ بارلىق وڭىرلەرىنەن كەلگەن دەلەگاتتار، ال قالعان 800-گە جۋىعى - قوناقتار.
اۆتور: ايان بەكەن ۇلى