قىتايدىڭ اتاقتى بايى مايۇننان 30 پايدالى كەڭەس

None
None
استانا. قازاقپارات - مەزگىلىنەن بۇرىن ءارى ءوز ەركىمەن زەينەتكە شىققان باسشى.. . قۇلاعىڭىزعا تۇرپىدەي ەستىلىپ تۇر ما؟ قىتايدا كومپانيا پرەزيدەنتى 54 جاسىنا زەينەتكە شىعىپ، قالعان ءومىرىن جان تىنىشتىعىنا ارناماق. ول ميللياردتان استام تۇرعىنى بار قىتايدىڭ ەڭ باي ادامى.

 10 - قىركۇيەك Alibaba كومپانياسىنىڭ پرەزيدەنتى دجەك ما 54 جاسقا تولدى. سونىمەن قاتار ول كۇنى قىتايدا «مۇعالىمدەر كۇنىن» تويلايدى ەكەن. Alibaba كومپانياسىنا دەيىن دجەك ما اعىلشىن تىلىنەن ساباق بەرگەن. زەينەتكە شىققاننان كەيىن دە ەندىگى ومىرىندە ۇستازدىق ەتۋگە بەل بۋىپتى. ءارى قايىرىمدىلىقپەن اينالىسۋدى نيەت ەتىپ وتىر. ءدال قىركۇيەكتىڭ 10 ى، ۇستازدار مەرەكەسىندە زەينەتكە شىعىپ، ۇستازدىق جولدى تاڭداۋى دا بەكەر ەمەس بولار. دجەك ما بۇل كۇندى ادەيى تاڭدادى ما الدە سايكەستىك پە، بەلگىسىز، الايدا ۇلى ادامنىڭ ومىرىندە ءساتتى سايكەستىكتەردىڭ ءجيى ورىن الۋىن ءوز باسىم «عاجاپ» دەر ەم.

دەي تۇرعانمەن ميللياردەر ءبىر عاسىردىڭ جارتى عۇمىرىندا بار بايلىعىن، جيعان- تەرگەنىن وزگە بىرەۋگە «وپ- وڭاي» قالدىرىپ كەتكەنىنە ءسىز دە تاڭىرقاپ قالعان بولارسىز. ءوزى بۇل ارەكەتىن تۇسىندىرۋگە تىرىسىپتى. ايتۋىنشا، قايىرىمدىلىق ءىس پەن ۇستازدىق ەتۋدەن وزگە دە سەبەپتەرى بار.

The New York Times باسىلىمىنىڭ دەرەگىنە سۇيەنسەك، ما قىتايداعى ىسكەرلىك ورتاعا كوڭىلى تولمايدى. مەملەكەتتىك كاسىپورىندار جەكە كومپانيالاردىڭ جۇمىسىنا بوگەت كەلتىرەدى. ال ءوزىنىڭ زەينەتكە شىعۋىن دجەك ما «جاڭا ءداۋىردىڭ باستاماسى» دەپ سانايدى.

 Forbes دجەك مانىڭ بايلىعىن $36,6 ميللياردقا ەسەپتەپ بەردى. 1999 -جىلى اشىلعان كومپانياسى بۇگىندە الەمنىڭ ەڭ ءىرى ريتەيلەرلەرىنىڭ بىرىنە اينالىپ وتىر.

Bloomberg TV ارناسىنا بەرگەن سۇحباتىندا ميللياردەر قايىرىمدىلىقپەن اينالىسقىسى كەلەتىنىن ايتىپتى. كومپانيادان كەتكەن سوڭ ءبىلىم بەرۋ جوبالارىن قارجىلاندىراتىن قور اشقىسى كەلەدى. بيلل گەيتستىڭ ىزىمەن ءجۇرۋدى قالايدى.

ايتا كەتەيىك، Microsoft Word باعدارلاماسىنىڭ نەگىزىن قالاۋشى بيلل گەيتس 2015 -جىلى افريكاعا بارعان ساپارىنان كەيىن قايىرىمدىلىق قورىمەن اينالىسقىسى كەلەتىنىن ايتقان. ونىڭ ويىنشا، دامىماي قالعان مەملەكەتتەرگە جوعارى تەحنولوگيا ەمەس، تاماق پەن ءدارى- دارمەك كەرەك.

دجەك ما ادال ەڭبەكپەن بايلىققا قول جەتكىزگەن جان. ونداي جانداردىڭ ارتىنان قالار ۇرپاعىنا ايتارى دا مول. سول مول دۇنيەسىنىڭ ءبىر 5 پايىزىن بولسا دا، وقىرمان نازارىنا ۇسىنۋدى ءجون سانادىق. جاڭادان بيزنەس باستاعىسى كەلىپ جۇرگەندەر ءۇشىن تومەندەگى سوزدەر كومەك بولىپ قالار دەگەن نيەتتەمىز.

 

1.بارلىق دۇنيەدەن مۇمكىندىك ىزدەڭىز.

مۇمكىندىكتى جاقىننان ىزدەمەڭىز، الەمدى شارلاڭىز.

2.كەز- كەلگەن نۇسقانى بايقاپ كورىڭىز

مۇمكىندىكتىڭ جاقسى- جامانى بولمايدى. ءبارىن پايدالانىڭىز. ءىس باستاۋعا تۇرارلىق كەڭىستىكتى بايقاساڭىز، ونىڭ تابىستى بولۋى ءۇشىن كۇش جۇمساڭىز. ۇلكەن ماقساتقا قادام ۇساق- تۇيەك ويلاردان باستالادى.

3.ويلانىپ جۇمىس جاساڭىز

ءار باسقان قادامىڭىزدى ساناڭىزعا ءتۇيىپ ءجۇرىڭىز. بۇل ماقساتتىڭ سىزگە قانداي ماڭىزى، پايداسى بار، نەگە ءدال سول ماقساتتى باعىندىرعىڭىز كەلەدى - ۇنەمى ويلانىپ، جاۋاپ ىزدەپ ءجۇرىڭىز.

4.جىلدام قوزعالىڭىز

تابىسقا جەتۋ ءۇشىن باياۋ قوزعالۋدى دوعارىڭىز. ۋاقىتتى دا جەڭە ءبىلىڭىز، باعىندىرىڭىز.

5.باتىل بولىڭىز

دجەك ما كومپانياسىن اشاردا جوبانىڭ شىعىنعا ۇشىرۋى مۇمكىن ەكەنى ءجيى ەسكەرتىلگەن. ءبىراق ميللياردەر تاۋەكەلگە بارىپ، كومپانياسىن اشتى. ەسەسىنە بۇگىن الەمدەگى ەڭ تابىستى كومپانيالاردىڭ ءبىرى.

6.جاستىق شاعىڭىز - ءسىزدىڭ ەڭ ۇلكەن مۇمكىندىگىڭىز

«جاسىڭىز 35 تە، ءبىراق ءالى باي بولماساڭىز، جاستىق شاعىڭىزدى بەكەر وتكىزگەنسىز» ، - دەدى ءبىر سوزىندە ما.

7.كاسىبي دەڭگەيى سىزدەن جوعارى ادامدارمەن جۇمىس ىستەڭىز.

ەگەر ماماندارعا ءجيى اقىل ايتساڭىز، جانىڭىزعا قاجەتسىز ادامداردى جيناعان ەكەنسىز. ءوز سالاسىنىڭ ناعىز مامانى اقىلدى قاجەت ەتپەيدى، سىزدەن وزىپ تۇسەدى.

8.تاباندىلىق - جەڭىس كىلتى

ماقساتقا جەتەر جولدا كوپ قيىندىقتارعا جولىعارىڭىز اقيقات. سونداي ساتتە ساعىڭىز سىنباسىن.

9.قارىم- قاتىناسىڭىز مۇمكىندىكتەرىڭىزدەن ماڭىزدى

قيىن كەزەڭدە دە، تابىستى ساتتە دە باسشى سابىرلى، سەنىمدى بولۋ كەرەك.

10.بيزنەس پەن ساياساتتى ارالاستىرماڭىز

كاپيتال - جانايىن دەپ تۇرعان كۇل، ال ساياسات - جانىپ تۇرعان سىرىڭكە. ەكەۋىن بايلانىستىرساڭىز، سالدارى وزىڭىزگە ۇناماۋى مۇمكىن.

11.باسەكەلەستەرىڭىزدى قۇرمەتتەڭىز

وزىڭىزگە باسەكەلەس كومپانياعا قۇرمەت تانىتىڭىز. بارىنە بەرىلەتىن مۇمكىندىك بىردەي. ءسىزدىڭ باسەكەلەسىڭىز دە ءسىز سەكىلدى ادام بالاسى، ول دا قاتەلەسۋگە قۇقىلى.

12.جەڭىمپازدار جىلامايدى

 كوڭىل- كۇيىڭىزدى تۇسىرەتىن ساتسىزدىكتەر مىندەتتى تۇردە بولادى. ال ولارعا ارىزدانا بەرسەڭىز، قيىندىقتار ەشقاشان تاۋسىلمايدى.

 13. ءبىر جاعدايدى اينالشىقتاپ ءجۇرىپ الماڭىز

قانداي وتباسىندا، قانداي ورتادا تۋعانىڭىز، قاي جەردە ءبىلىم العانىڭىز، جۇمىس تاجىريبەڭىز ماڭىزدى ەمەس، كەز كەلگەن جاعدايعا قاراماستان جەتىستىككە جەتە الاسىز. قايدا جانە كىممەن باستاعانىڭىز ەمەس، ءسىزدىڭ شىدامدىلىعىڭىز، جىگەرىڭىز، رۋحىڭىز ماڭىزدى.

 14. ءوز مەنىڭىزدى ءتيىمدى پايدالانىڭىز

ءسىزدىڭ قىزمەتىڭىز امبيتسياڭىزدىڭ جول نۇسقاۋشىسى بولۋى كەرەك. ءوز ماقساتىڭىزعا ءتيىستى كوڭىل ءبولىپ، جولدان اداسپاي جەتۋگە تىرىسىڭىز

15.ماقساتى ءبىر كوماندا جيناڭىز

مانىڭ پىكىرىنشە، ەگەر كوماندانى سۇيرەپ جۇرەتىن تەك ءسىز بولساڭىز، تابىستى تۇسىڭىزدە كورە بەرسەڭىز بولادى. ماقساتى ءبىر، بىردەي ويلاي الاتىن كوشباسشىلاردى جيناڭىز. قىزمەتكەرىڭىز ءسىز ءۇشىن ەمەس، ورتاق ماقساتتارىڭىز ءۇشىن جۇمىس ىستەسىن.

16.ورنىڭىزعا ادام دايىنداپ قويىڭىز

كومانداڭىز سىزگە عانا بايلانىپ قالماسىن، ءوزىڭىزدىڭ بىلگەنىڭىزدى قول استىڭىزداعى قىزمەتكەرلەرگە دە ۇيرەتىڭىز. ۋاقىت وتە كەلە مىندەتىڭىزدىڭ جارتىسىن سولارعا تابىستاپ جۇرە بەرەسىز، ءتىپتى باسقا دا جوبالارمەن وزدىگىنشە اينالىسا الاتىنىنا سەنىمدى بولاسىز.

17.ەر مىنەزدى، قايراتتى، قىراعى باسشى بولىڭىز

بەرىك، باتىلدىق، الداعىنى بولجاي بىلەتىن كورەگەندىلىك - تابىستى باسشىنى وزگەلەردەن ەرەكشەلەيتىن قاسيەتتەر. وزگەلەرى قيىندىقتان باسقانى كورمەيتىن دۇنيەدەن باسشى مۇمكىندىك ىزدەيدى.

18.شەشىمدەردى اقىلداسىپ قابىلداڭىز

تابىستى باسشى ءوز قىزمەتكەرلەرىنەن اقىلدى بولماۋى مۇمكىن. كەز كەلگەن شەشىمدى قابىلداردا جانىندا اقىل قوساتىن كاسىبي مامانداردىڭ بولعانى ءجون.

19.مىقتىلىق قيىندىقتاردان كەيىن كەلەدى

ادام بىردەن جىگەرلى، قايسار بولمايدى. جولىندا كەزدەسەتىن قيىندىقتار ادامدى مىقتى ەتەدى. باسىن تاۋەكەلگە تىگەتىن ادام عانا ءتۇبى جەڭىسكە جەتە الادى.

20.ىنتامەن، ىجداھاتتىلىقپەن ۇقىپتى جۇمىس ىستەڭىز

تابىستىڭ فورمۋلاسى قاراپايىم - ماقساتىڭىزعا جەتەلەر جولدا ۇقىپتى بولعانىڭىز ابزال.

21.باسەكەلەستىكتە ادال ەرەجەلەرگە باعىنىڭىز

باسەكەلەسىڭىزگە دۇشپان دەپ قارايتىن بولساڭىز، ءسىز دە بىرەۋگە دۇشپان بولاسىز. اشىق جانە ادال باسەكەلەسىڭىز.

22.باسەكەلەستەرىڭىزدى تەڭ كورىڭىز

ءسىز سەكىلدى باسەكەلەسىڭىز دە نولدەن باستادى. ءوزىڭىزدى كىم- كىمنىڭ الدىندا بولماسىن بيىك ۇستاڭىز.

23.تۇتىنۋشى ءبىرىنشى ورىندا تۇرۋى ءتيىس

ءسىزدىڭ ەنەرگياڭىز دا، ۋاقىتىڭىز دا شەكتەۋلى. سول سەبەپتى باسىمدىققا يە دۇنيەلەردى ءبىرىنشى ورىنعا قويىڭىز. ول ءسىزدىڭ تۇتىنۋشىڭىز، ەكىنشى كەزەكتە ارىپتەستەرىڭىز، سوسىن اكتسيونەرلەرگە كوڭىل ءبولىڭىز. كاسىپكەرلەردىڭ كوبى اكسيونەرلەرىنىڭ مۇددەسىن ماڭىزدى ەتىپ الادى. تاجىريبە جۇزىندە بۇل ءادىستىڭ ءتيىمسىز ەكەنى دالەلدەنگەن.

24.اشكوز ءارى ساراڭ بولماڭىز

ءبارىڭىز ءىس باستاردا ءبىرىنشى كەزەكتە اقشا تابۋدى كوزدەيسىز، كوپ تابىس تابۋعا ۇمتىلاسىز. ماقسات جولىندا اقشا تابۋدى ەمەس، امبيتسياڭىزبەن جۇمىس ىستەڭىز. ساراڭدىق ءتۇزۋ جولدان اداستىرادى.

25.كوڭىلىڭىزگە جاعاتىن اداممەن جۇمىس ىستەڭىز

قول استىڭىزعا قىزمەتكەر الاردا كاسىبيلىگىنە عانا نازار اۋدارماڭىز. كاسىبي مامان بولا تۇرا مىنەزى كوڭىلىڭىزدەن شىقپاسا، كومانداڭىزعا جايلى بولماسا، ول اداممەن وتكىزگەن ءار سەكۋندىڭىز بەكەر.

 26. ءوز باسىڭىزبەن ويلانىڭىز

وزگەلەردىڭ پىكىرى ماڭىزدى ەمەس، ءوزىڭىزدى عانا تىڭداڭىز.

27.جۇرەگىڭىزدى تىڭداڭىز

ينتۋيتسياڭىزعا سەنىڭىز، ول الدامايدى.

«تەگىن» - ەڭ قىمبات ءسوز

باسەكەلەستەرىڭىزگە ونىمدەرىڭىزدى تەگىن تاراتۋ ارقىلى، كومپانياڭىزدى شىعىنعا ۇشىراتاسىز، اقشاڭىزدى، يدەيالارىڭىزدى، ينتەللەكتۋالدىق جەكە مەنشىگىڭىزدى وزگەنىڭ قولىنا تەگىننەن تەگىن قالاي بەرىپ قويعانىڭىزدى بايقاماي قالاسىز.

29.جۇمىسقا كوڭىل بولە وتىرىپ، ءومىردىڭ راحاتىن سەزىنىڭىز.

ءومىر دەگەن تەك جۇمىستان تۇرمايدى. جان مەن تانگە دە كۇتىم كەرەك، جاقىندارىڭىزبەن، دوستارىڭىزبەن كوبىرەك ۋاقىت وتكىزۋگە تىرىسىڭىز.

 30. ءوز امبيتسياڭىزدان باس تارپاڭىز

باستاعان ءىسىڭىزدى اياقتاماساڭىز، جەڭىلىپ قانا قويماي، ءوز- وزىڭىزدەن باس تارتقانىڭىز دەپ ءبىلىڭىز. ارمانىڭىزعا جەتۋ جولىندا تەز بەرىلسەڭىز، ءوزىڭىزدىڭ مۇمكىندىكتەرىڭىزدى دە كورە المايسىز. بولماي بارا جاتقان كۇننىڭ وزىندە ستراتەگياڭىزدى وزگەرتىڭىز، جولىڭىزدى باسقا ارناعا بۇرىڭىز، ءبىراق ەشقاشان دا كەرى قايتپاڭىز.

 

«قامشى» سىلتەيدى

  

سوڭعى جاڭالىقتار