استانادا 30 مىڭنان استام «اقىلدى» شامدار ورناتىلادى
كوشەنى جارىقتاندىرۋ جەكەنىڭ قولىنا وتپەك. وسىعان وراي، قالا اكىمدىگى وتىن-ەنەرگەتيكالىق كەشەنى جانە كوممۋنالدىق شارۋاشىلىق باسقارماسى ارقىلى كوشەنى «اقىلدى» جارىقتاندىرۋمەن قامتاماسىز ەتۋ ءۇشىن مەملەكەتتىك-جەكەشەلىك ارىپتەستىك ارقىلى كونكۋرس جاريالايدى.
وتىن-ەنەرگەتيكالىق كەشەنى جانە كوممۋنالدىق شارۋاشىلىق باسقارماسىنىڭ وتىن-ەنەرگەتيكالىق رەسۋرس ءبولىمىنىڭ باسشىسى ماقسات ەسماعۇلوۆتىڭ ايتۋىنشا، قازىرگى تاڭدا قالا كوشەلەرىن ءتۇرلى تيپتەگى ءبىرىڭعاي ستاندارتى جوق شامدار جارىقتاندىرۋدا.
«كەيبىر جەرلەرگە ەنەرگيا ۇنەمدەيتىنى ورناتىلعان، كەيبىر جەرلەردە ەسكى تيپتەگىسى ورناتىلعان، ال قازىر بارلىق جەرگە بىردەي ەتىپ جارىقتاندىرۋ ورناتۋ قاجەت. ول ءۇشىن اۋدان اكىمدىكتەرىنىڭ بىرلىگىندە تۇرعان 30 مىڭنان استام ەسكى شامداردى اۋىستىرۋ جوسپارلانىپ وتىر»، - دەپ ءتۇسىندىردى ول.
ونىڭ ايتۋىنشا، ولار تەك ەنەرگيا عانا ۇنەمدەپ قويمايدى، ەڭ باستىسى «اقىلدى» شامدار.
«شامنىڭ اۆتوماتتى رەجىمدە جانىپ، ءسونىپ تۇرۋىنا باسىمدىق بەرەتىن جۇيە ورناتىلادى. وسىلاي جانىپ-ءوشىپ تۇراتىنىن رەتتەيتىن ارنايى جارىق داتچيگى بولادى. سونداي-اق ديسپەتچرلىك پۋنكت تە قۇرىلادى، ولار اۆتوماتتى رەجىمدە قاي ۋچاسكەدە شام ءسونىپ قالدى، قاي جەردە اپات بولدى، قاي جەردە جارىق جوق، شام قايدا كۇيىپ كەتتى، سونىڭ ءبارىن ديسپەتچەرلىك پۋنكتتە باقىلاپ تۇرۋعا بولادى»، - دەدى م. ەسماعۇلوۆ.
قازىرگى تاڭدا م ج ءا- جوباسىنىڭ كونكۋرستىق قۇجاتىن ازىرلەۋ اياقتالدى. كونكۋرس بۇگىن جاريالانادى دەپ كوزدەلگەن. وعان بىلىكتىلىك تالاپتارىنا جاۋاپ بەرە الاتىن بارلىق الەۋەتتى قاتىسۋشىلار جبەرىلەدى. كونكۋرستىڭ قۇجاتتىق كوشىرمە پاكەتتەرىن قالالىق «Astana Invest» ينۆەستيتسيالاردى دامىتۋ ورتالىعىنان كونكۋرستىڭ وتەتىنىن جاريالاعاننان كۇننەن باستاپ تەگىن الۋعا بولادى. وتىنىشتەردى قابىلداۋ 31- شىلدەگە دەيىن جالعاسادى.
كونكۋرستىڭ جەڭىمپازىمەن كەلىسىمشارتقا قول قويۋدى قىركۇيەكتىڭ سوڭىنا تامان جوسپارلاپ وتىر. وسىدان كەيىن جەكەمەنشىك ارىپتەس قۋات كوزىن ۇنەمدەيتىن شامداردى ورناتۋعا كىرىسۋى ءتيىس.