ن. نازاربايەۆ: 30 مىڭ اۋىل تۇرعىنىن كاسىپكەرلىككە ۇيرەتەمىز
«بيىل «اتامەكەن» پالاتاسىنىڭ قۇرىلعانىنا 5 جىل تولدى. وسى ۋاقىتتىڭ ىشىندە بۇل بىرلەستىك بيزنەس قاۋىمداستىعىنىڭ مۇددەسىن قورعايتىن تاۋەلسىز ينستيتۋت رەتىندە قالىپتاستى. ۇلتتىق پالاتا كاسىپكەرلەر مەن مەملەكەتتىك ورگاندار اراسىنداعى ءتيىمدى ىنتىماقتاستىققا دانەكەر بولا ءبىلدى. «اتامەكەن» ەلىمىزدىڭ تۇراقتى دامۋىنا ءوز ۇلەسىن قوسا بەرەدى دەپ سەنەمىن»، - دەلىنگەن ەلباسىنىڭ قۇتتىقتاۋىندا.
ءوز سوزىندە پرەزيدەنت وتاندىق بيزنەستى دامىتۋدىڭ ارقاسىندا دۇنيەجۇزىلىك بانكتىڭ رەيتينگىسىندە 36-ورىنعا دەيىن كوتەرىلگەنىمىزدى ەرەكشە اتاپ ءوتتى. ينۆەستيتسيالىق كليمات تا جاقسارىپ كەلەدى. سالىق جانە كەدەنگە قاتىستى جاڭا نورمالار كۇشىنە ەندى. بۇدان بولەك، كاسىپكەرلىكتى رەتتەۋگە قاتىستى وزگەرىستەر قابىلداندى. زاڭنامادا وتاندىق كاسىپكەرلەردىڭ ۇسىنىستارى بارىنشا ەسكەرىلدى.
«اتالعان جۇمىس جالعاسا بەرەدى. ال «اتامەكەن» ۇلتتىق كاسىپكەرلەر پالاتاسى مەن بيزنەسمەندەر وسى جۇمىسقا بەلسەنە اتسالىسۋى قاجەت. ءبىزدىڭ ستراتەگيالىق ماقساتىمىز - 30 دامىعان مەملەكەتتەردىڭ قاتارىنا قوسىلۋ. ول ءۇشىن ىشكى جالپى ونىمدەگى شاعىن جانە ورتا بيزنەستىڭ ۇلەسىن 50 پروتسەنتكە ارتتىرۋ قاجەت.
بۇدان بولەك، ءبىز جاڭا تەحنولوگيالار مەن يننوۆاتسيالاردى كەڭىنەن دامىتۋعا بەت الدىق. ال بەس الەۋمەتتىك باستاما اياسىندا شاعىن نەسيەلەردى قارجىلاندىرۋ كولەمى ارتىپ وتىر. «باستاۋ» سياقتى ماڭىزدى جوبالار قولعا الىندى. بيىل اتالعان باستاما اياسىندا 30 مىڭ اۋىل تۇرعىندارىن كاسىپكەرلىككە ۇيرەتۋ كوزدەلگەن. وسى شارالار 160 ەلدى مەكەن مەن 40 شاعىن قالانى قامتيدى. وسىنىڭ بارلىعىن ىسكە اسىرۋ ءۇشىن ۇكىمەت پەن «اتامەكەننىڭ» بىرلەسكەن جۇمىسى قاجەت»، - دەپ اتاپ كورسەتتى ن. نازاربايەۆ.