قازاقستاندا قولايسىز اۋا رايىنا بايلانىستى 30 ادام كوشىرىلدى
توتەنشە جاعدايلار كوميتەتىنىڭ رەسمي وكىلى رۋسلان يمانقۇلوۆتىڭ ايتۋىنشا، قارلى بوران رەسپۋبليكا جولدارىنداعى قوزعالىستى ايتارلىقتاي قيىنداتقان. مۇنداي اۋا رايى دارىگەرلەر مەن قۇتقارۋشىلارعا تۇسەتىن اۋىرتپالىقتى دا ەسەلەي تۇسكەن. مەديتسينالىق كومەك سۇراپ جۇگىنگەندەردىڭ سانى كۇرت ارتتى.
«وتكەن تاۋلىكتەردە اپاتتار مەديتسيناسى ورتالىعى فيليالدارىنىڭ شۇعىل ارەكەت ەتەتىن بريگادالارى 30 جابىرلەنۋشىنى قاۋىپسىز جەرگە كوشىردى، سونىڭ 5 ەۋى بالا، ال ءۇش ادام اۋرۋحاناعا جاتقىزىلدى»، - دەيدى ر. يمانقۇلوۆ.
اتاپ ايتقاندا، جەدەل قىزمەتكە ارشالى كۇرە جولىنىڭ 42-رازەزىندە كۇزەت بەكەتىندە ءبىر ادام ءۇسىپ قالعانى تۋرالى حابار كەلگەن. شۇعىل جەتكەن بريگادا ونى جىلى جەرگە كوشىرگەن.
استانا-قاراعاندى كۇرە جولىنداعى قىزىلسۋات اۋىلىنان 9 ادام، سونىڭ ىشىندە 5 بالا، ءبىر جۇكتى ايەل قاۋىپسىز جەرگە كوشىرىلدى. سەگىزى تۋىستارىنىڭ ۇيىنە جەتكىزىلسە، جۇكتى ايەل 1№ پەريناتالدىق ورتالىققا جاتقىزىلدى.