الەمنىڭ 30 ەلىندە «ۇلى دالا. ماڭگىلىك ەل» اتتى دەرەكتى فيلمنىڭ ءتۇسىرىلىمى باستالماق
ول جوبادا 40-50 بولىمنەن تۇراتىن ۇلى دالاداعى مەملەكەتتىڭ قۇرىلۋى تۋرالى دەرەكتى فيلم ءتۇسىرۋ جوسپارلانعان. فيلم قازاقستان رەسپۋبليكاسى تاۋەلسىزدىگىنىڭ 25 جىلدىعىنا ارنالعان.
فيلمگە قاجەتتى ماتەريال جيناۋ - ءساۋىر ايىنان باستالىپ، وسى جىلدىڭ قاراشا ايىنا دەيىن سوزىلماق.
اتالعان دەرەكتى فيلم رەسەي فەدەراتسياسىندا، اتاپ ايتقاندا ومبى، ورىنبور، استراحان قالالارىندا، سونىمەن قاتار باشقۇرتستان، داعىستان، قىرىم، كاراشاي-شەركەس، قاباردين- بالقار رەسپۋبليكالارىندا، ستاۆروپول ايماعى، تاتارستان، شەشەنستان، مونعوليا، قىتاي حالىق رەسپۋبليكاسى، قىرعىزستان، وزبەكستان، تۇركىمەنستان، ازەربايجان، ۋكراينا، رۋمىنيا، مولداۆيا، ماجارستان، بولگاريا، حورۆاتيا، ارمەنيا، گرۋزيا، سيريا، مىسىر، ءۇندىستان، يزرايل، پالەستينا، فرانسيا، گەرمانيا، يتاليا ەلدەرىندە جانە ەلىمىزدىڭ استانا، الماتى، قوستاناي، اقتوبە، پاۆلودار، سەمەي، وسكەمەن، تاراز، شىمكەنت، قىزىلوردا، اقتاۋ، اتىراۋ، ورال قالالارىندا تۇسىرىلەدى دەپ جوسپارلانۋدا.
دەرەكتى فيلمدە جوعارىدا اتالىپ وتكەن ەلدەردەگى اتاقتى عالىمدار مەن زەرتتەۋشىلەرمەن سۇحباتتار، تاريحي جانە ارحەولوگيالىق ەسكەرتكىشتەر كورسەتىلمەك. ساپار ىسقاق ۇلىنىڭ ايتۋىنشا، بۇل فيلم قازاقستاننىڭ باي تاريحى مەن مادەنيەتىن، اتا-بابالاردىڭ ەرلىگىن جان-جاقتى اشۋعا باعىتتالعان.
«ءبىزدىڭ ماقساتىمىز - قازاق سالت-اتتىنىڭ، تۇلپارىنىڭ تۇياعى باسقان جەرلەردى كورسەتۋ. قازاققا، ونىڭ ىشىندە جاستارعا ءبىزدىڭ بابالارىمىزدىڭ قانشالىقتى باتىر بولعاندىعىن، وزىق بولعاندىعىن، ءبىلىمدار بولعاندىعىن، سول زامانداردا قانشالىقتى وركەنيەتتى ەل بولعانىمىزدى ايتىپ جەتكىزۋ، ولار بىزگە قانداي مۇرا قالدىردى - وسىنىڭ بارلىعىن ەكسپەديتسيا بارىسىندا دەرەكتى رەپورتاج رەتىندە پاش ەتكىمىز كەلەدى»، - دەپ اتاپ ءوتتى س. ىسقاق ۇلى تىلشىلەرگە بەرگەن سۇحباتىندا.
فيلم ءتۇسىرىلىمى ءبىر جىلعا تاياۋ مەرزىمدە تۇسىرىلمەك جانە وندا جوبا اۆتورلارى ەۋروپانى، ءۇندىستاندى، قىتايدى باعىندىرعان بابالار جايىندا تىڭ ماتەريالدار ۇسىنباق.
«ءبىزدىڭ تاريحىمىز 550 جىلمەن شەكتەلمەيدى، بۇل ءبىزدىڭ بەرجاعىنداعى عانا تاريحىمىز. ءبىزدىڭ تاريح ءبىزدىڭ زامانىمىزعا دەيىنگى داۋىرلەردەن باستاۋ الاتىنى ءسوزسىز. سوندىقتان ءبىز ارىدەن باستايمىز. ءبىزدىڭ زامانىمىزعا دەيىنگى 300-400 جىل بۇرىن جەتىسۋ ايماعىندا ساقتار وركەنيەتى دۇركىرەپ تۇردى، ساپار بارىسىندا سوندا بولامىز، سونان سوڭ موڭعوليا جەرىندەگى كوك تۇركىلەر ءداۋىرى تۋرالى تۇسىرەمىز. ءۇندىستاندا بولدىق. وندا بابىر حانمەن بىرگە قىپشاقتار دا بارعانى ءمالىم. ولاردىڭ ىشىندە جاۋىنگەرلەر، قولباسشىلار عانا ەمەس، قولونەرشىلەرىمىز، اقىندارىمىز، ءبي-شونجارلارىمىز دا بارعان. ءۇندىستاننىڭ سولتۇستىك كاشمير ايماعىن مۇحاممەد حايدار دۋلاتي باسقارعانىن ءبىرى بىلسە، ءبىرى بىلمەيدى. حايدار دۋلاتي تۋرالى دا تۇسىرەمىز»، - دەيدى س. ىسقاق ۇلى.
ساپار ىسقاق ۇلى - الەمنىڭ 6 قۇرلىعىنىڭ 125 تەن استام ەلدەرىندە بولىپ، وڭتۇستىك پوليۋس (انتاركتيكا) مەن سولتۇستىك پوليۋس (اركتيكا) باعىندىرعان تانىمال ساياحاتشى، مەتسەنات. 2014-جىلى «Queen Elizabeth 6» كەمەسىمەن الەمدى كەزىپ، 27 ەلدەرىندە «ەكسپو-2017» جالاۋىن جەلبىرەتكەن بولاتىن. 2015-جىلى وڭتۇستىك جانە ورتالىق امەريكا، ءۇندى مۇحيتى ەلدەرىندە بولىپ، كوپتەگەن كەزدەسۋلەر وتكىزدى.
بۇل - كەزدەسۋلەردە وسى ەلدەردىڭ ۇكىمەت وكىلدەرى، بيزنەس، تۋريزم، ب ا ق قۇرالدارىنىڭ وكىلدەرىنە الدىمىزداعى «ەكسپو-2017» تۋرالى، جالپى قازاقستان رەسپۋبليكاسى تۋرالى ايتىلدى. بۇل - ساياحاتتاردىڭ ناتيجەسى «حابار» ارناسىندا «تۋر دە حابار» اتتى 53 باعدارلاما كورسەتىلدى.
اۆتور: جاسۇلان جولدىبايەۆ