ەلوردادا كوپقاباتتى ۇيلەردىڭ بالكونىنا 300-دەن استام تۋ ءىلىندى
كوپقاباتتى ۇيلەردىڭ بالكونىنا تۋ ءىلۋ اكسياسى جىل سايىن ەلىمىزدە 4- ماۋسىمدا اتاپ وتىلەتىن مەملەكەتتىك رامىزدەر كۇنى مەرەكەسىنە ارنالدى.
«بۇكىل اۋداندارعا 330 تۋ بەرىلدى. ونىڭ 150- ءى سارى ارقا اۋدانىنا ءبولىندى. قالا بويىنشا تۋ ءىلۋ جۇمىسىنا شامامەن 50 ادام قاتىستى»، - دەپ ءمالىم ەتتى استانا قالالىق جاستار ساياساتى ماسەلەلەرى باسقارماسىنىڭ باسپا ءسوز قىزمەتىنەن.
ۇيىمداستىرۋشىلاردىڭ اتاپ وتۋىنشە، ءىس- شارانىڭ ماقساتى - قالا تۇرعىندارىنا مەرەكەلىك كوڭىل- كۇي سىيلاۋ، وتانعا، مەملەكەتتىك رامىزدەرگە دەگەن سۇيىسپەنشىلىك پەن ماحاببات سەنىمدەرىن نىعايتۋ.
«قارسىلىق تانىتقاندار بولعان جوق، تۇرعىندار بۇل چەللەندجدى وتە جاقسى قابىلدادى. ءبىزدىڭ باستى ماقساتىمىز ورىندالدى دەپ ويلايمىز»، - دەدى باسقارما باسپا ءسوز حاتشىسى انەل مانسۇر.
ايتا كەتەيىك، بۇگىن مەملەكەتتىگىمىزدىڭ سيمۆولدارىنىڭ قابىلدانعانىنا 31 جىل تولىپ وتىر. 2007 -جىلى 4 -ماۋسىمدا قابىلدانعان «قازاقستان رەسپۋبليكاسىنىڭ مەملەكەتتىك رامىزدەرى تۋرالى» كونستيتۋتسيالىق زاڭعا سايكەس جىل سايىن 4 -ماۋسىم قازاقستان رەسپۋبليكاسىندا مەملەكەتتىك رامىزدەر كۇنى رەتىندە مەرەكەلەنەدى.
اۆتور:
مارلان جيەمباي