قازاقستان كومىرىنەن فارماتسيەۆتيكالىق جانە حيميالىق ءونىمنىڭ 300-گە جۋىق ءتۇرى وندىرىلەدى
بۇل تۋرالى رەسپۋبليكالىق تاۋ- كەن ءوندىرۋشى جانە تاۋ- كەن مەتاللۋرگيالىق كاسىپورىندار قاۋىمداستىعىنىڭ اتقارۋشى ديرەكتورى نيكولاي رادوستوۆەتس ايتتى، دەپ حابارلايدى قازاقپارات ءتىلشىسى.
«كومىرىمىز، اسىرەسە شۇباركول كومىرى باسەكەگە وتە قابىلەتتى. ودان فارماتسيەۆتيكالىق جانە حيميالىق ءونىمنىڭ 300-گە جۋىق ءتۇرى وندىرىلەدى. كومىردىڭ از جاعىلۋىنا بايلانىستى ءوندىرىس كولەمى قىسقارعان جاعدايدا كومىر كەنشىلەرىنە نە ىستەۋ كەرەكتىگىن ەشكىم ايتقان جوق. بىزگە كومىر كەنىشتەرىنىڭ توڭىرەگىنە ينۆەستورلار كەلۋى ءۇشىن ەركىن ەكونوميكالىق اۋماق قۇرۋعا مۇمكىندىك بەرىڭىزدەر»، - دەدى ول ەلوردادا ءوتىپ جاتقان تاۋ- كەن مەتاللۋرگيالىق كونگرەسى اياسىندا ۇيىمداستىرىلعان بريفينگىدە.
ونىڭ اتاپ وتۋىنشە، اتالعان ەركىن ەكونوميكالىق ايماققا كەلگەن ينۆەستورلارعا سالىقتان جانە ودان باسقا دا جەڭىلدىكتەر بەرۋ قاجەت.
«ولار 5-10 جىل بويى سالىقتى مۇلدەم تولەمەي- اق قويسىن. ءبىراق، ولار كومىرىمىزدەن ءبىز قازىر ساتىپ الىپ وتىرعان حيميالىق جانە فارماتسيەۆتيكالىق ونىمدەردى شىعارا باستايدى. ءبىز قوسىلعان قۇنى ءبىرشاما ونىمدەردى ساۋدالايتىن بولامىز»، - دەدى نيكولاي رادوستوۆەتس.
اۆتور: مارلان جيەمباي