وتىز ءۇش مەملەكەتتىڭ 300 گە جۋىق بالۋانى ەلوردادا وتەتىن الەم بىرىنشىلىگىندە كۇش سىناسادى
ۇيىمداستىرۋشىلارىڭ ايتۋىنشا، الەمدىك دوداعا 33 مەملەكەتتەن 300 گە جۋىق سپورتشى (ەرلەر مەن ايەلدەر) قاتىسادى دەپ جوسپارلانعان. «داۋلەت» سپورت كەشەنىندە وتەتىن بايراقتى باسەكە بارىسىندا ەرلەر 6 سالماق دارەجەسىنجە، ايەلدەر 6 سالماق دارەجەسىندە كۇش سىناسادى.
بارلىعى 12 سالماق دارەجەسىندە جۇلدەلەر ساراپقا سالىنادى.
«قازاق كۇرەسىنەن الەم چەمپيوناتى بىرىككەن كۇرەس الەمى (United World Wrestling) ۇيىمىنىڭ 2019 -جىلعا ارنالعان رەسمي كۇنتىزبەسىنە ەنگەن جانە جارىستار تولىقتاي UWW رەسمي وكىلدەرى مەن حالىقارالىق دارەجەدەگى تورەشىلەرىنىڭ قاتىسۋىمەن وتكىزىلمەك»، دەلىنگەن حابارلامادا.
الەم بىرىنشىلىگىنىڭ سالتاناتتى اشىلۋى جوعارىدا اتالعان سپورت كەشەندە 20- جەلتوقسان كۇنى ساعات 16.00-گە جوسپارلانعان.
ەل جانكۇيەرلەرى Qazsport تەلەارناسى ارقىلى دودالى جارىستىڭ بەلدەسۋلەرىن تاماشالاي الادى.
الەم چەمپيوناتى اياسىندا الىس-جاقىن شەت ەلدەردىڭ وكىلدەرىنىڭ قاتىسۋىمەن دۇنيەجۇزىلىك «قازاق كۇرەسى» فەدەراتسياسىنىڭ حالىقارالىق كونگرەسى وتەدى. جيىننىڭ كۇن تارتىبىندە فەدەراتسيا القا مۇشەلەرىنىڭ سايلانۋى جانە باسقا دا ماسەلەلەر قاراستىرىلماق.
حالىقارالىق كونگرەسس «بەيجىڭ پالاس» قوناق ءۇيىنىڭ «Silk way» ءماجىلىس زالىندا 19-جەلتوقساندا ساعات 11.00-دە باستالادى.
جارىستى ۇيىمداستىرۋشىلار - بىرىككەن كۇرەس الەمى UWW، نۇر-سۇلتان قالاسىنىڭ اكىمدىگى، دۇنيەجۇزىلىك «قازاق كۇرەسى» فەدەراتسياسى.