شەتەلدە تۇراتىن 300 گە جۋىق قازاق بالاسى دەمالۋ ءۇشىن بۋرابايعا كەلدى
اۋىسىمىعا جينالعان بالالاردىڭ اراسىندا الەمنىڭ كوپتەگەن ەلدەرىنەن كەلگەن قازاق دياسپوراسىنىڭ وكىلدەرى دە بار، دەپ حابارلايدى قازاقپارات ءتىلشىسى.
«تۋعان جەر - التىن بەسىك» تاقىرىبىمەن اشىلعان حالىقارالىق بالالار قۇرىلتايىنا رەسەي، قىتاي، وزبەكستان، قىرعىزستان سياقتى كورشى مەملەكەتتەردەگى قازاق دياسپورالارىنان بارلىعى 288 بالا كەلگەن. دەمالۋشىلاردىڭ دەنى - ءوز ورتاسىندا وقۋ وزاتى جانە ءتۇرلى دارىن يەسى.
اۋىسىمنىڭ اشىلۋىندا ءسوز سويلەگەن اقپارات جانە قوعامدىق دامۋ ۆيتسە- ءمينيسترى مارات ءازىلحانوۆ شەتەلدەگى قازاق بالالارىنىڭ قازاقستانعا كەلىپ، دەمالۋىنا جانە انا ءتىلىن ۇيرەنۋىنە بارلىق جاعداي جاسالىپ جاتقانىن اتاپ ءوتتى.
«بيىل وسىمەن ونىنشى جىل قاتارىنان «بالداۋرەن» رەسپۋبليكالىق وقۋ- ساۋىقتىرۋ ورتالىعىندا شەتەلدەگى قازاق دياسپورالارىنىڭ بالالارى كەلىپ دەمالۋدا. بۇل جولى 300-گە جۋىق شەتەلدەگى قازاق بالالارىن قابىلداپ وتىرمىز. ولاردىڭ دەمالۋىنا بارلىق جاعداي جاسالعان. «بالداۋرەننىڭ» ءبىر اۋىسىمدا 600 بالانى قابىلداۋعا مۇمكىندىگى بار. سوندىقتان، كەلەر جىلى سىرتتان كەلەتىن قازاق بالالارىنىڭ سانىن ودان ءارى ارتتىرۋ جوسپارلاپ وتىرمىز»، - دەپ اتاپ ءوتتى ۆيتسە- مينيستر.
دۇنيەءجۇزى قازاقتارى قاۋىمداستىعى وكىلدەرىنىڭ ايتۋىنشا، بۇل جۇمىس ق ر تۇڭعىش پرەزيدەنتى نۇرسۇلتان نازاربايەۆتىڭ باستاماسىمەن شەتەلدەگى قازاق ديسپورلارىن قولداۋ ماقساتىندا قولعا الىنىپ، ونداعى جەتكىنشەكتەرگە انا ءتىلىن ۇيرەتۋدى كوزدەيدى.
«ەلىمىزدىڭ تۇڭعىش پرەزيدەنتى - ەلباسى نۇرسۇلتان نازاربايەۆ دۇنيەءجۇزى قازاقتارىنىڭ V قۇرىلتايىندا شەتەلدەگى اعايىندى اتامەكەندى ۇمىتپاي، ونى ءاردايىم قۇرمەت تۇتۋعا شاقىرا وتىرىپ، وسى جولدا شەتەلدەگى قانداستارىمىزعا قولداۋ كورسەتۋدىڭ تەتىكتەرىن انىقتاۋدى تاپسىرعان بولاتىن. وسى باعىتتاعى شارالار اياسىندا دۇنيەءجۇزى قازاقتارىنىڭ قاۋىمداستىعى مەن
«وتانداستار» قورى ق ر ءبىلىم جانە عىلىم مينيسترلىگىنىڭ قولداۋىمەن شەت ەلدەردە تۇراتىن قازاق دياسپوراسى وكىلدەرىنىڭ جاس جەتكىنشەكتەرىنە ارناپ ارنايى بالالار ورتالىعىن ۇيىمداستىرۋدا»، دەپ اتاپ ءوتتى ماۋسىمىنىڭ اشىلۋىندا دۇنيەءجۇزى قازاقتارى قاۋىمداستىعى ءتوراعاسىنىڭ ورىنباسارى ارعىن وسپانوۆ.
سونىمەن قاتار، شارادا «وتانداستار» قورىنىڭ ۆيتسە- پرەزيدەنتى ماعاۋيا سارباسوۆ پەن رەسەي فەدەراتسياسىنىڭ قازاقستانداعى ەلشىلىك كەڭەسشىسى كيريلل تيلليابيەۆ حالىقارالىق بالالار قۇرىلتايىنىڭ ءتيىمدى تۇستارىنا توقتالدى.
«رەسەي فەدەراتسياسىندا رەسمي ەسەپ بويىنشا ءبىر جارىم ميلليونعا جۋىق قازاق جەرگىلىكتى جۇرتپەن تاتۋ- ءتاتتى تىرشىلىك ەتۋدە. ولاردىڭ تۋىپ- وسكەن جەرى - رەسەي توپىراعى بولعانىمەن، تاريحي وتانى - قازاقستان»، - دەدى كيريلل گەنناديەۆيچ. - مەنىڭ ويىمشا بالكىم ودان دا كوپ بولۋى مۇمكىن. اۋمالى- توكپەلى تالاي زامان ءوتتى عوي. ءبىز ەجەلدەن دوستىق قارىم- قاتىناستاعى ەلمىز. وسى بالالار مەملەكەتتەرىمىزدىڭ اراسىنداعى شىنايى دوستىقتى ودان دا بەكىتە تۇسەتىن ۇرپاق».
«بالداۋرەندە» تىنىعۋعا كەلگەن قانداستارىمىزدىڭ بالالارى وزدەرىنىڭ العاشقى اسەرى تۋرالى ايتتى. سونىڭ ءبىرى - رەسەيدىڭ يۆانوۆ وبلىسىنان كەلگەن مەكتەپ وقۋشىسى ءامينا جاقسىلىقوۆا «بالداۋرەن» وزىنە ۇنايتىنىن جانە وسىندا ءۇشىنشى رەت كەلىپ وتىرعانىن اتاپ ءوتتى.
«مەن رەسەيدەن كەلدىم. ءبىز يۆانوۆ وبلىسىنىڭ يۆانوۆ قالاسىندا تۇرامىز. «بالداۋرەنگە» ءۇشىنشى رەت كەلىپ وتىرمىن. ماعان «بالداۋرەن» قاتتى ۇنايدى. وسى جەردە ءارتۇرلى ەلدەردەن كەلگەن قازاق بالالارىمەن تانىستىم. ەگەر مۇمكىندىك بولىپ جاتسا، وسى جەرگە تاعى دا كەلەر ەدىم»، - دەيدى ءامينا جاقسىلىقوۆا.
ال، موڭعوليا ەلىنەن كەلگەن 9-سىنىپ وقۋشىسى ايدانا دوسىمبەك «بالداۋرەن» انا ءتىلىن جەتىلدىرۋگە كومەكتەسەتىنىن ايتۋدا.
«مەن موڭعوليا استاناسى - ۇلان- باتىردا تۇرامىن. وندا قازاق مەكتەپتەرى جوق. مەن موڭعول تىلىندە ءدارىس بەرەتىن مەكتەپتە وقيمىن. ءبىراق موڭعوليادا بىزدەر، قازاقتار ءوزارا انا تىلىمىزدە سويلەسەمىز. قازاقستاندا ءبىزدىڭ كوپتەگەن تۋىستارىمىز تۇرادى، ولاردىڭ كوپشىلىگىن تانيمىن. «بالداۋرەندە» العاش رەت بولىپ تۇرمىن، ماعان قاتتى ۇنادى، تاعى دا كەلگىم كەلەدى. بارلىعى 24 بالا كەلدىك. مەنىڭ وسى لاگەرگە باراتىنىمدى ەستىگەن سىنىپتاستارىمنىڭ باسىم كوپشىلىگىنىڭ كەلگىلەرى كەلدى. بۇل مەنىڭ ويىمشا، ودان ارعى وقۋىما ءارى ءتىل ءبىلۋىمدى جەتىلدىرۋگە كومەكتەسەدى»، - دەدى ايدانا دوسىمبەك.
ەكى اپتالىق جازعى دەمالىس ماۋسىمىندا شەتەلدەن كەلگەن قازاق بالالارىنىڭ بەلسەندى دەمالۋىنا، ءارتۇرلى مادەني جانە سپورت شارالارىنا قاتىسۋىنا، ەڭ باستىسى - انا ءتىلىن مەڭگەرۋىنە مۇمكىندىكتەر ۇسىنىلادى.
اۆتور: اسلان وسپانوۆ