تاراز مەكتەپتەرىندە 300 گە جۋىق پەداگوگ جەتىسپەيدى
بۇل تۋرالى قازاقپارات 24.kz سايتىنا سىلتەمە جاساپ حابارلايدى.
وسىعان وراي شاھاردا بوس جۇمىس ورىندارىنىڭ جارمەڭكەسى ءوتتى. يگى باستاماعا قاتىسقان 76 جۇمىس بەرۋشى 380 بوس جۇمىس ورنىن ۇسىنعان. ونىڭ 288- ءى پەداگوگيكالىق، ال 100-گە جۋىعى تەحنيكالىق قىزمەتكەرلەرگە تيەسىلى ماماندىقتار. ال جۇمىس ىزدەپ كەلۋشىلەردىڭ سانى 1000-عا جەتتى. مۇمكىندىكتى ءمۇلت جىبەرمەۋگە تىرىسقان جۇمىسسىز ازاماتتار ءتيىستى مەكەمەلەرگە جولداما الىپ، باقتارىن سىناپ كورمەك.
«قازىرگى تاڭدا 60 مەكتەپتىڭ بارلىعىنىڭ بوس ورىندار بويىنشا وتىنىشتەرى ءتۇستى. سوسىن جاڭاعى بالاباقشالارىمىزدان ءتۇسىپ جاتىر. ءبىزدىڭ قالامىز بويىنشا ماتەماتيكا، ورىس ءتىلى ماماندارى تاپشى بولىپ تۇر. جانە باستاۋىش سىنىپ مۇعالىمدەرى جەتىسپەيدى. وسىعان بايلانىستى ءبىز بۇگىنگى جارمەڭكەدە ولاردىڭ بارلىقتارىن شىعارىپ وتىرمىز» دەيدى قالالىق جۇمىسپەن قامتۋ ورتالىعىنىڭ ديرەكتورى ەلدوس كەڭەسبەكوۆ.