رەمبراندتتىڭ 30 ميلليون ەۋروعا باعالانعان سۋرەتىن بۇرىن 500 ەۋروعا ساتىپ العان

نۇر-سۇلتان. قازاقپارات – بەلگيانىڭ لەج قالاسىنىڭ تۇرعىنى 10 جىل بۇرىن باردا تانىمايتىن ادامنان 500 ەۋروعا ساتىپ العان سۋرەتتىڭ قۇنى 30 ميلليون ەۋرو تۇراتىنىن ەندى عانا ءبىلدى، دەپ حابارلايدى قازاقپارات The Brussels Times گازەتىنە سىلتەمە جاساپ.

«شامامەن 10 جىل بۇرىن ەر ادام گەرستال قالاسىنداعى بارلاردىڭ بىرىندە قارجىلاي قينالىپ جۇرگەن اداممەن كەزدەيسوق جولىعىپ، اڭگىمەلەسكەن. ارتىنشا بەلگيالىق ازامات ءوزىنىڭ جاڭا تانىسىنا قارجىلاي كومەكتەسۋ ءۇشىن ودان يۋسۋس بەينەلەنگەن سۋرەتتى 500 ەۋروعا ساتىپ العان»، - دەپ جازادى باسىلىم.

ارتىنان ەر ادام سۋرەتتى ءوزىنىڭ ونەرگە قىزىعاتىن تانىسىنا كورسەتكەن. ول بۇل سۋرەتتى ساتىپ الىنعان باعاسىنان الدەقايدا قىمبات ەكەندىگىن ايتقان. سۋرەت ساراپتاماعا جىبەرىلىپ، قۇنى 30 ميلليون ەۋرو دەپ باعالاندى. مامانداردىڭ ايتۋىنشا، تۋىندىدا رەمبراندت ۆان رەيننىڭ جۇمىستارىنا ءتان ەرەكشەلىك بار.

رەمبراندت (رەمبراندت حارمەنس ۆان رەين، 1606-1669 -جىلدار) - گوللانديالىق سۋرەتشى، ورنەكشى، ساۋلە مەن كولەڭكە شەبەرى، گوللانديالىق سۋرەت ونەرىنىڭ التىن عاسىرىنىڭ ءىرى وكىلى.