الماتى وبلىسىنداعى دالا ءورتى: 3 ادام قازا تاۋىپ، 7 ادامدى كۇيىك شالدى
بۇل تۋرالى قازاقستان رەسپۋبليكاسى ىشكى ىستەر مينيسترلىگىنىڭ باسپا ءسوز قىزمەتىنەن حابارلادى.
«الماتى وبلىسى پانفيلوۆ اۋدانى تالدى اۋىلدىق وكرۋگىنىڭ اۋماعىنداعى تاۋلى جەرلەردە دالا ءورتىن ءسوندىرۋ كەزىندە 3 ادام قازا تاپتى. ونىڭ بىرەۋى - جاركەنت ورمان شارۋاشىلىعى مەكەمەسىنىڭ قىزمەتكەرى، قالعان ەكەۋى ءورتتى ءوز كۇشتەرىمەن سوندىرۋگە تىرىسقان جەرگىلىكتى تۇرعىندار. سونىمەن قاتار، 7 ادام ءتۇرلى دارەجەدەگى كۇيىك الدى، ونىڭ ىشىندە 1 ادام اياعىن سىندىردى. زارداپ شەككەندەر لەسنوۆكا اۋىلىنا تىكۇشاقپەن جەتكىزىلدى، ولار ودان ءارى جاركەنت قالاسىنىڭ ورتالىق اۋداندىق اۋرۋحاناسىنا جاتقىزىلادى»، دەلىنگەن حابارلامادا.
وقيعا ورنىندا الماتى وبلىسىنىڭ ت ج د مەن پوليتسيا دەپارتامەنتىنىڭ جەكە قۇرامىنان 59 ادام، 13 تەن استام ارنايى تەحنيكا، سونداي-اق جاركەنت مەملەكەتتىك ورمان مەكەمەسىنىڭ قىزمەتكەرلەرى جۇمىس ىستەۋدە. ءورت وشاعىن سوندىرۋگە ءورت سوندىرۋشىلەر جانە پوليتسيا قىزمەتكەرلەرىمەن بىرگە جەرگىلىكتى تۇرعىندار، سونداي-اق ورمان شارۋاشىلىعى قىزمەتكەرلەرىنەن قۇرىلعان ەرىكتى ورتكە قارسى قۇرىلىمدار جۇمىلدىرىلدى.
«تاۋلى جەردەگى ءورتتى ءسوندىرۋ قيىندىق تۋعىزۋىنا بايلانىستى سۋاعار قۇرىلعىسى بار مي-8 تىكۇشاعى تارتىلدى. جاقىن ماڭدا سۋ الاتىن ايدىن-كول بولماعاندىقتان، اۋە كەمەسى ادامداردى تاسىمالداپ، قورجىندى بۇرىككىشتەردى سۋمەن قامتاماسىز ەتۋ ءۇشىن جۇمىس ىستەدى. تابيعي اپاتپەن كۇرەس اسا قيىن جاعدايدا ءوتتى. كۇردەلى مەتەوجاعدايدا اينالانىڭ كورىنۋى ناشار بولدى، ءورت سوندىرۋشىلەرگە بىرنەشە ەسە دەنە كۇشىن جۇمساۋعا تۋرا كەلدى»، - دەپ اتاپ وتىلگەن قازاقستان رەسپۋبليكاسى ءى ءى م باسپا ءسوز قىزمەتىنىڭ حابارلاماسىندا.
قازىرگى ۋاقىتتا ءورتتى ءسوندىرۋ بويىنشا جۇمىستار جالعاسۋدا. ءورت وشاقتارىن وقشاۋلاۋ ءۇشىن قوسىمشا كۇشتەر مەن قۇرالدار تارتىلدى. وقيعا ورنىنا تاعى ءبىر «قازاۆياقۇتقارۋ» تىكۇشاعى جىبەرىلدى.
«جاعداي قاتاڭ باقىلاۋدا. ىشكى ىستەر مينيسترلىگى توتەنشە جاعدايلاردى جويۋ كەزىندە قازا تاپقان جانە زارداپ شەككەندەردىڭ وتباستارىنا كوڭىل ايتادى»، دەلىنگەن ءى ءى م حابارلاماسىندا.