تۇراقتى جۇمىسى جوق 3,7 مىڭ قازاقستاندىق شاعىن نەسيە الدى

پاۆلودار. قازاقپارات - سەناتور باقىتجان جۇماعۇلوۆ قازاقستان پرەزيدەنتىنىڭ ءتورتىنشى الەۋمەتتىك باستاماسى اياسىندا جۇمىسسىز جۇرگەن جانە ءوزىن-ءوزى جۇمىسپەن قامتىعان ازاماتتارعا شاعىن نەسيە بەرۋگە باعىتتالعان جۇمىستارعا وڭ باعا بەردى، دەپ حابارلايدى قازاقپارات ءتىلشىسى.

«ءتورتىنشى باستاما بويىنشا شاعىن نەسيە كولەمىن ارتتىرۋ ءۇشىن قوسىمشا 20 ميلليارد تەڭگە قاراجات ءبولىنىپ، جالپى سوماسى 62 ميلليارد تەڭگەگە جەتتى. بىلتىر جاعداي مۇلدە باسقاشا ەدى»، - دەدى باقىتجان جۇماعۇلوۆ پاۆلوداردا «نۇر وتان» پارتياسى وبلىستىق اكتيۆىنىڭ وتىرىسىندا.

سەناتوردىڭ ايتۋىنشا، جۇمىسسىز جۇرگەن جانە ءوزىن-ءوزى جۇمىسپەن قامتىعان 14 مىڭ ازاماتقا شاعىن نەسيە بەرۋ جوسپارلانعان. قازىرگە دەيىن 3,7 مىڭ ازاماتقا جالپى سوماسى 21,3 ميلليارد تەڭگە مولشەرىندە نەسيە بەرىلدى.

«جۇمىستىڭ باسى جاقسى باستالدى، ءبىراق قارقىندى كۇشەيتۋ قاجەت. قازىر تامىز، رەسپۋبليكا بويىنشا جوسپارداعىنىڭ 27 پايىزى نەسيە السا، وبلىستا بۇل كورسەتكىش 23  پايىزدى قۇرايدى نەمەسە 148 ادام»، - دەيدى ول.

ب. جۇماعۇلوۆتىڭ ايتۋىنشا، پاۆلودار وبلىسىنداعى جۇمىسسىز جانە ءوزىن-ءوزى جۇمىسپەن قامتىعان ازاماتتاردى شاعىن نەسيەگە تارتۋ قاجەت.