بيىل شەتەلدىكتەردىڭ قاتىسۋىمەن قۇنى 3,7 ميلليارد دوللار بولاتىن 36 جوبا ىسكە استى – ق ر س ءى م
بۇل تۋرالى ق ر سىرتقى ىستەر مينيسترلىگىنىڭ رەسمي وكىلى ايبەك سمادياروۆ ايتتى، دەپ حابارلايدى قازاقپارات ءتىلشىسى.
«پاندەمياعا بايلانىستى الەم پروتەكتسيونيزمگە، سانكتسيالارعا جانە ساۋدا قارسىلىعىنا بايلانىستى ءوزىنىڭ كوپجاقتى ساۋدا جۇيەسى ءۇشىن ۇلكەن سىناقتارعا تاپ بولدى. تيىسىنشە، ەكونوميكالىق ديپلوماتياعا جانە شەتەلدىك ينۆەستيتسيالاردى تارتۋعا ەرەكشە نازار اۋدارىلادى. تاۋەلسىزدىك جىلدارى قازاقستان شامامەن 400 ميلليارد دوللار ينۆەستيتسيا تارتتى»، - دەدى ول مينيسترلىكتىڭ وسى جىلعى جۇمىسىن قورىتىندىلاۋعا ارنالعان باسپا ءسوز ءماسليحاتىندا.
ونىڭ اتاپ وتۋىنشە، ەلىمىزدىڭ سىرتقى ىستەر مينيسترلىگى مەن ەلشىلىكتەر وتاندىق ءونىمدى شەتەلدىك نارىقتاردا ىلگەرىلەتۋگە جاردەمدەسۋ، ەكسپورت-يمپورتتىڭ ءوزارا ءتيىمدى پروتسەسى اياسىندا جاڭا ارىپتەستەرمەن سەنىمدى ىسكەرلىك بايلانىستار ورناتۋ، قازاقستانعا شەتەلدىك ينۆەستيتسيالاردى تارتۋ بويىنشا جۇمىس جۇرگىزىپ جاتىر.
«وسى جىلدىڭ باسىنان بەرى شەتەلدىكتەردىڭ قاتىسۋىمەن جالپى سوماسى 3,7 ميلليارد دوللار بولاتىن 36 ينۆەستيتسيالىق جوبا پايدالانۋعا بەرىلدى. 3,8 مىڭنان استام جۇمىس ورنى قۇرىلدى. بۇل رەتتە وسى جىلدىڭ سوڭىنا دەيىن كەمىندە 5 جوبا پايدالانۋعا بەرىلەدى دەپ كۇتىلەدى. ەكونوميكانىڭ ءتۇرلى سالالارىندا ۇسىنىلعان ينۆەستيتسيالىق جوبالاردىڭ جالپىۇلتتىق پۋلىمەن جان-جاقتى جۇمىس جۇرگىزىلىپ جاتىر. بۇگىنگى تاڭدا پۋل الەمنىڭ 30 دان استام ەلىنەن جالپى سوماسى 32,1 تريلليون تەڭگەگە ينۆەستيتسيا تارتاتىن 932 جوبادان تۇرادى جانە شامامەن 130 مىڭ جۇمىس ورنىن قۇرۋدى كوزدەيدى»، - دەدى ايبەك سمادياروۆ.