بۇگىن 3,6 ميلليون وقۋشى ءۇشىن سوڭعى قوڭىراۋ سوعىلدى
بۇل تۋرالى قازاقپارات ب ع م سىلتەمە جاساپ حابارلايدى. ول تۇلەكتەردى مەكتەپ ءبىتىرۋ كۇنىمەن قۇتتىقتاپ، پەداگوگتەرگە ەڭبەكتەرى جانە اتا- انالارعا بالالارعا كورسەتكەن قولداۋلارى ءۇشىن العىس ايتتى.
«بۇگىنگى تاڭدا وقۋشىلارىمىز ءبىلىمىمىزدى، ەلىمىزدى حالىقارالىق ارەنادا لايىقتى تانىتىپ ءجۇر. مىسالى، مەنىڭ قاسىمدا كۇنى كەشە عانا فرانتسيادان ورالعان دۇنيەجۇزىلىك گيمنازيادانىڭ ءۇش جەڭىمپازى تۇر. ولار وسى مەكتەپتە وقيدى. وقۋشىلارىمىز 86 مەدال جەڭىپ الىپ، الەمنىڭ 70 ەلىنىڭ اراسىنان وزىپ شىعىپ، 3-ورىنعا يە بولدى. ال جەڭىپ العان مەدالداردىڭ سانى ارتىپ كەلەدى. ال ەندى تۇلەكتەر ءومىردىڭ جاڭا كەزەڭىن باستاعالى تۇر. مەكتەپتى بىتىرسەڭىز دە، وقۋ مەن ىزدەنىس جولىندا ەشقاشان توقتاماۋ كەرەك. ءبىلىم - ەشقاشان قۇنىن جوعالتپايتىن، قۇنسىزدانۋدان قورىقپايتىن بايلىق. الدا ەمتيحاندار كۇتىپ تۇر. ۇ ب ت ەرەسەك ومىردەگى ەڭ وڭاي ەمتيحان ەكەنىن بىلسەڭىزدەر ەكەن. ول ءۇشىن ءبىز بيىلعى تۇلەكتەرگە ءبىرقاتار جەڭىلدىك جاسادىق. ەندى سىزدەر ۇ ب ت- نى ەكى رەت تاپسىرىپ، گرانتقا ۇمىتكەر بولا الاسىزدار. بيىل پرەزيدەنتتىڭ قولداۋىنىڭ ارقاسىندا گرانتتار سانىن كوبەيتىپ وتىرمىز. اتاپ ايتقاندا، ۋنيۆەرسيتەتتەردە وقۋعا 73 مىڭعا دەيىن جانە كوللەدجدەردە وقۋعا 128 مىڭعا دەيىن گرانت بولدىك. جالپى العاندا مەملەكەت سىزدەردىڭ بولاشاققا سەنىممەن قاراۋلارىڭىز ءۇشىن ءتيىستى شارالاردى قابىلداپ جاتىر»، - دەدى ءبىلىم جانە عىلىم ءمينيسترى اسحات ايماعامبەتوۆ تۇلەكتەرگە.
سونداي- اق مينيستر وسكەلەڭ ۇرپاققا ءبىلىم مەن تاربيە بەرىپ جۇرگەن ۇستازدار مەن اتا- انالارعا بالالارعا كورسەتىپ جۇرگەن قولداۋلارى ءۇشىن العىس ايتتى.
«ءبىزدىڭ وقۋشىلار، مۇعالىمدەر مەن اتا- انالار ىندەت سىناعىنان ابىرويمەن ءوتتى. قىركۇيەكتە «مەكتەپتى اشۋ كەرەك پە؟» دەگەن ماسەلە قىزۋ تالقىلاندى. ال ەندى قابىلدانعان شەشىمنىڭ دۇرىستىعىنا ەش كۇمان جوق. پەداگوگتەرىمىزدىڭ قاجىرلى ەڭبەگىنىڭ ارقاسىندا ءبىز بۇكىل الەم جانە ءبىلىم بەرۋ جۇيەسى باسىنان وتكەرگەن قيىن كەزەڭدەردى ەڭسەرە الدىق. ارىپتەستەرىمە ەڭبەكتەرى مەن بالالارىمىزعا كورسەتىپ جاتقان قولداۋلارى ءۇشىن العىس ايتامىن. ارينە پاندەميا كەزىندە وڭاي بارىنە بولعان جوق. دەگەنمەن ۇستاز ەڭبەگىنىڭ قانشالىقتى ماڭىزدى جانە قۇندى ەكەنىن تۇسىنگەن اتا- انالار ۇلكەن قولداۋ كورسەتتى»، - دەپ اتاپ ءوتتى اسحات ايماعامبەتوۆ.
جالپى بيىل ەلىمىزدە 3,6 ميلليون وقۋشى ءۇشىن سوڭعى قوڭىراۋ سوعىلدى. ونىڭ ىشىندە 170 مىڭنان استام 11 (12) سىنىپ تۇلەكتەرى، 302 مىڭنان استام 9-سىنىپ وقۋشىلارى. «التىن بەلگى» توسبەلگىسىنە 8139 ۇزدىك وقۋشى ۇمىتكەر. سونداي- اق بيىل 393 مىڭنان استام وقۋشى 1-سىنىپتى اياقتادى.