ەلوردادا تۇنگى ساعات ەكىدە كوشە كەزگەن 3 جانە 5 جاستاعى سابيلەر تابىلدى

نۇر-سۇلتان. قازاقپارات - ەلوردادا پوليتسيا قىزمەتكەرلەرى «جاس ءوسپىرىم» الدىن الۋ ءىس-شاراسى اياسىندا ناشار وتباسىلارعا قاتىستى رەيد جۇرگىزىپ جاتىر، دەپ حابارلايدى قازاقپارات ءتىلشىسى.

قالالىق پوليتسيا دەپارتامەنتىنىڭ مالىمەتىنشە، كامەلەتكە تولماعاندار ءىسى جونىندەگى ينسپەكتورلاردىڭ جۇمىسى بالالار مەن جاس وسپىرىمدەر اراسىنداعى قۇقىقبۇزۋشىلىقتىڭ الدىن الۋمەن عانا شەكتەلمەيدى. ولارعا بالالار مەن جاس وسپىرىمدەردىڭ اتا-انالارمەن دە جۇمىس ىستەۋ جۇكتەلگەن.

«وكىنىشكە وراي اتا-انالاردىڭ بارلىعى بىردەي بالالارىن تاربيەلەۋ ىسىمەن لايىقتى دەڭگەيدە اينالىسپايدى. ىشىمدىككە نەمەسە ەسىرتكىگە ەلىتۋ، بەيادەپ قىلىق تانىتۋ، بالالارعا دورەكىلىك كورسەتۋ سىندى جات قىلىقتاردىڭ ورىن الۋ فاكتىلەرى بار. مۇنىڭ بارلىعى دا كامەلەتكە تولماعانداردى تاربيلەۋ ىسىنە تەرىس اسەرىن تيگىزۋى مۇمكىن»، - دەپ اتاپ وتەدى دەپارتامەنتتەن.

ال نۇر-سۇلتان قالالىق پ د يۋۆەنالدى پوليتسيا ءبولىمىنىڭ باستىعى نەلليا دوسجانوۆا «پوليتسيا ءاربىر بالا وتباسىندا ءومىر ءسۇرۋى ءتيىس!» دەگەن ۇستانىممەن جۇمىس ىستەيتىندىگىن ايتادى.

«ءبىزدىڭ مىندەتىمىز - تاربيە بەرۋدەن جالتاراتىن اكە مەن انانى تۇزەتۋگە بارىنشا مۇمكىن ءىس-شارانى قابىلداۋ. وكىنىشكە وراي، كەز كەلگەن جاعدايدا جۇمىس اڭگىمەسىمەن جانە تۇرعىلىقتى جەردى تەكسەرۋمەن اياقتالا بەرمەيدى. مۇنداي جايتتا ءبىز اتا-انا قۇقىعىن شەكتەۋ نەمەسە ايىرۋ تۋرالى ماسەلەنى كوتەرۋ ارقىلى جاۋاپكەرشىلىككە تارتۋعا ءماجبۇرمىز»، - دەدى ول.

دەپارتامەنت مالىمەتىنشە، ەلوردادا قۇقىق قورعاۋ ورگاندارىنىڭ ەسەبىندە شامامەن 200 وتباسى تىركەۋگە الىنعان. بۇل وتباسىلاردا 425 كامەلەتكە تولماعان بالا تاربيەلەنۋدە.

جىل باسىنان بەرى 2 ازامات اتا-انا قۇقىعىنان ايىرىلسا، 7 ادامنىڭ اتا-انا قۇقىعى شەكتەلىپ وتىر. جالپى ەلوردادا اتا-انانىڭ بالا ءتالىم-تاربيەسىنە نەمقۇرايلى قارايتىندىعىنا قاتىستى فاكتىلەر دە جيىلەپ تۇر.

«ماسەلەن، 15- قىركۇيەك كۇنى تۇنگى ساعات 2 دە 102 نومىرىنە حابارلاسقان قالا تۇرعىنى ءۋاليحانوۆ كوشەسىندە جول بويىندا ەكى بالانىڭ جۇرگەنى تۋرالى حابارلادى.

3 جانە 5 جاستاعى سابيلەر ومىرلىك قيىن جاعدايعا تاپ بولعان بالالاردى قولداۋ ورتالىعىنا ورنالاستىرىلدى. قۇقىق قورعاۋشىلار سابيلەردىڭ ۇيدە جالعىز بولعانىن جانە ءوز بەتتەرىنشە جۇرگەنىن انىقتادى.

ولار تۇنگى ساعات 2 دە ۇيدەن شىعىپ كەتىپ، جول بويىندا جۇرگەن. ال ءدال وسى ۋاقىتتا ولاردىڭ اتا-انالارى كورشىلەرىنىڭ ۇيىندە ىشىمدىك ءىشىپ وتىرعان. پوليتسيا قىزمەتكەرلەرى ولاردىڭ انالارىنا قاتىستى ق ر ا ق ب ت ك 127-بابىمەن اكىمشىلىك حاتتاما تولدىردى. وتباسى يۋۆەنالدى پوليتسيا باقىلاۋىنا الىندى. قازىرگى ۋاقىتتا كامەلەتكە تولماعان بالالاردىڭ انالارىنا قاتىستى اتا-انا قۇقىعىنان ايىرۋ نەمەسە شەكتەۋ ماسەلەسىن قاراستىرۋ ءۇشىن قۇجاتتار جينالىپ جاتىر»، - دەپ اتاپ وتەدى دەپارتامەنتتەن.