بەيرۋت گۋبەرناتورى: جارىلىس شىعىنى 3-5 ميلليارد دوللاردى قۇرادى

بەيرۋت. قازاقپارات - بەيرۋت گۋبەرناتورى مارۆان اببۋد سەيسەنبى كۇنى پورتتا بولعان جارىلىستىڭ شىعىنى 3-5 ميلليارد دوللاردى قۇراعانىن ءمالىم ەتتى، دەپ حابارلايدى قازاقپارات LBC تەلەارناسىنا سىلتەمە جاساپ.

اببۋدتىڭ ايتۋىنشا، وقيعا ورنىنا جىبەرىلگەن 10 ءورت ءسوندىرۋشى مەرت بولعان. سونىمەن قاتار، جۇزدەگەن قالا تۇرعىنى باسپاناسىز قالدى. قۋاتتى جارىلىس بەيرۋت پورتى ماڭىندا، ليۆان اتك بازاسىنا جاقىن جەردە بولدى. جارىلىس تولقىنى ونداعان ءۇي مەن اۆتوكولىكتى قيراتتى، ەل استاناسىنىڭ كوپ بولىگىندەگى عيماراتتاردىڭ تەرەزەسى سىنعان.

جەرگىلىكتى بيلىك وكىلدەرىنىڭ مالىمەتى بويىنشا، 2015 -جىلى كەدەن قىزمەتى تاركىلەپ، قويمادا ساقتالىپ تۇرعان 2,7 مىڭ توننا اممياك سەليتراسىنىڭ دەتوناتسياسى جارىلىسقا سەبەپ بولعان. كەيىنگى مالىمەتتەر بويىنشا، 100 دەن استام ادام قازا تاۋىپ، 4 مىڭنان استام تۇرعىن زارداپ شەكتى. ەلدە ازا تۇتۋ كۇنى جاريالاندى. اپات ايماعى دەپ تانىلعان بەيرۋتتا ەكى اپتالىق توتەنشە جاعداي رەجيمى ەنگىزىلدى.