نازاربايەۆ ۋنيۆەرسيتەتىنەن وقىپ شىققان تۇلەكتەر سانى 3,5 مىڭ ادامعا جەتتى

نۇر-سۇلتان. قازاقپارات - نازاربايەۆ ۋنيۆەرسيتەتىندە سالتاناتتى تۇردە V وقۋ ءبىتىرۋ ءراسىمى ءوتىپ جاتىر، دەپ حابارلايدى قازاقپارات ءتىلشىسى.

سالتاناتتى شاراعا ق ر تۇڭعىش پرەزيدەنتى - ەلباسى، «نازاربايەۆ ۋنيۆەرسيتەتى»، «نازاربايەۆ قورى»، «نازاربايەۆ زياتكەرلىك مەكتەپتەرى» جوعارى قامقورشىلىق كەڭەسىنىڭ ءتوراعاسى نۇرسۇلتان نازاربايەۆ قاتىسادى.

«وسىلايشا، نازاربايەۆ ۋنيۆەرسيتەتىنەن وقىپ شىققان تۇلەكتەرىمىزدىڭ سانى 3,5 مىڭ ادامعا جەتتى. سىزدەر ەلدىڭ دامۋى جولىندا ۇلكەن ءرول اتقاراسىزدار. مەن وتە قۋانىشتىمىن. ەلباسى نۇرسۇلتان نازاربايەۆ جاقىندا عانا پرەزيدەنتتىك لاۋازىمىنان كەتەتىنىن جاريا ەتكەن ەدى. مىنە، سول سەبەپتى سىزدەر قازاقستاننىڭ جاڭا تاريحي كەزەڭىنە اياق باسىپ كەلەسىزدەر»، - دەدى نۋ پرەزيدەنت شيگەو كاتسۋ.

بيىل اتالمىش ۋنيۆەرسيتەتتەگى تۇلەكتەر سانى - 963 ستۋدەنت. ونىڭ ىشىندە 565 ستۋدەنت باكالاۆريات باعدارلاماسى بويىنشا، 378 ستۋدەنت ماگيستراتۋرا باعدارلاماسى، 14 ى - مەديتسينا دوكتورى جانە 6 ستۋدەنت دوكتورانتۋرا باعدارلاماسى بويىنشا وقۋ بىتىرۋدە.

تۇلەكتەردىڭ كوپشىلىگى عىلىم جانە تەحنولوگيالار مەكتەبىنىڭ (270 تۇلەك)، ينجەنەريا مەكتەبىنىڭ (225 تۇلەك)، گۋمانيتارلىق جانە الەۋمەتتىك عىلىمدار مەكتەبىنىڭ (168) باكالاۆريات باعدارلاماسىنىڭ ستۋدەنتتەرى. ماگيسترلىك باعدارلاما بويىنشا جوعارى بيزنەس مەكتەبىن 82 ستۋدەنت، جوعارى ءبىلىم بەرۋ مەكتەبىن 80 تۇلەك، جوعارعى مەملەكەتتىك ساياسات مەكتەبىن 49 تۇلەك، ينجەنەريا مەكتەبىن 70 تۇلەك، عىلىم جانە تەحنولوگيالار مەكتەبىن 34 تۇلەك، گۋمانيتارلىق جانە الەۋمەتتىك عىلىمدار مەكتەبىن 19 تۇلەك، مەديتسينا مەكتەبىن 27 تۇلەك، تاۋ- كەن ءىسى جانە جەر تۋرالى عىلىم مەكتەبىن 20 تۇلەك اياقتاعان.

 

نازاربايەۆ ۋنيۆەرسيتەتىنىڭ مەكتەپتەرى ا ق ش، ۇلى بريتانيا، سينگاپۋر سياقتى الەمنىڭ جەتەكشى وقۋ ورىندارىنمەن ارىپتەستىكتە ازىرلەنگەن باكالاۆريات، ماگيستراتۋرا جانە دوكتورانتۋرا باعدارلامالارى بويىنشا وقىتۋ جۇرگىزەدى. ءتيىمدى اكادەميالىق ورتانى قۇرۋ جانە ەلدىڭ ادامي كاپيتالىن دامىتۋ ماقساتىندا ۋنيۆەرسيتەتكە ستۋدەنتتەردى وقىتۋ ءۇشىن ءارتۇرلى ەلدەردىڭ ۇزدىك ۇلتتىق جانە حالىقارالىق زەرتتەۋشىلەرى جۇمىسقا شاقىرىلعان. ۋنيۆەرسيتەتتىڭ وقىتۋشى- پروفەسسورلار قۇرامى مەن عىلىمي قىزمەتكەرلەرى الەمنىڭ 53 ەلىنەن كەلگەن.

قازىرگى تاڭدا نازاربايەۆ ۋنيۆەرسيتەتىندە 4663 ستۋدەنت وقىپ جاتىر. ونىڭ 2927 ى باكالاۆريات باعدارلاماسى، 994 ى ماگيستراتۋرا باعدارلاماسى بويىنشا، ال 742 ى دايىندىق باعدارلاماسىندا وقۋدا.