اسحات ايماعامبەتوۆ: 3,2 ميلليون وقۋشى قاشىقتان وقىپ جاتىر
بۇل تۋرالى ق ر ءبىلىم جانە عىلىم ءمينيسترى اسحات ايماعامبەتوۆ ايتتى، دەپ حابارلايدى قازاقپارات ءتىلشىسى.
«بۇگىن ەلىمىزدەگى وقۋشىلار ءۇشىن ءتورتىنشى توقسان باستالدى. بۇل توقسان ءبىز ءۇشىن ەرەكشە، سەبەبى قاشىقتىقتان وقىتۋ بويىنشا العاش رەت جۇمىستى باستاپ وتىرمىز. قىسقا مەرزىم ىشىندە دايىندىق جۇمىستارىن جۇرگىزگەن بولاتىنبىز. ءبىلىم سالاسى ءۇشىن، ءبارىمىز ءۇشىن بۇل ۇلكەن ەمتيحان، سونىمەن قاتار ۇلكەن مۇمكىندىك. وسى تاجىريبەدەن كەيىن ءبىلىم سالاسى وزگەرەتىنى ايدان انىق. قىسقا مەرزىم ىشىندە ارىپتەستەرىمىز جاڭا قۇزىرەتتىلىك الىپ، قاشىقتىقتان وقىتۋ فورماتىنا وتە جىلدام بەيىمدەلدى»، - دەيدى ق ر ءبىلىم جانە عىلىم ءمينيسترى اسحات ايماعامبەتوۆ ورتالىق كوممۋنيكاتسيالار ورتالىعىندا «توتەنشە جاعداي كەزىندە قاشىقتان وقىتۋدىڭ جاڭا فورماتتارى» تاقىرىبىندا وتكەن ونلاين بريفينگتە.
ول بۇگىنگى ءبىرىنشى كۇننىڭ نەگىزگى ناتيجەسىنە توقتالىپ ءوتتى. «وڭاي بولماسا دا، قاشىقتىقتان وقۋ فورماتىنا كوشتىك. بىرىنشىدەن، 3,2 ميلليون وقۋشى ءارتۇرلى باعىت بويىنشا قاشىقتىقتان وقۋدى باستادى. كەيبىرى ارنايى دايىندالعان ينتەرنەت باعدارلاماسى نەگىزىندە وقۋىن باستاسا، باسقالارى تەلەارنا ارقىلى وقۋدى باستادى. ينتەرنەت جۇيەسى ارقىلى بىرنەشە ينتەرنەت پلاتفورما ارقىلى جۇمىس جۇرگىزىپ وتىرمىز. ونىڭ ىشىندە ءبارىمىز ۇيرەنىپ قالعان كۇندەلىك، دارىن- ونلاين جانە تاعى دا باسقا پلاتفورمالار بار. جالپى ينتەرنەتتى قولدانۋ ارقىلى قاشىقتىقتان وقۋعا كوشكەندەر سانى بۇگىنگى كۇنى 2,4 ميلليون وقۋشىعا جەتتى. كۇندەلىك پلاتفورماسىندا ءبىر كۇن ىشىندە 2,2 ميلليون وقۋشى تاڭعى ساعات 07:00-دەن قازىرگى ۋاقىتقا دەيىن جۇمىس ىستەۋدە. بۇگىن تەك كۇندەلىك پلاتفورماسىنىڭ وزىندە 32 ميلليون سەسسيا ءوتتى. مۇنداي بۇرىن سوڭدى بولماعان. دارىن- ونلاين قوسىمشاسىن تىركەلىپ، دايىندالعان ۆيدەونى قاراپ، ءبىلىم الۋعا بولادى. ۆيدەو ساباقتار بىتكەننەن كەيىن ناقتى سول ءپان بويىنشا بەرىلەتىن سۇراقتارعا جاۋاپ بەرۋگە بولادى. جاۋاپ قاتە بولسا ۆيدەونى قايتادان قاراپ، قاتەلىكتەرمەن جۇمىس ىستەۋگە مۇمكىندىكتەر قاراستىرىلعان. دارىن- ونلاينعا 300 مىڭعا جۋىق وقۋشى تىركەلىپ، ءبىلىم الۋدا»، - دەيدى ول.
«ۇستازدار مەن وقۋشىلارعا تانىمال پلاتفورمالاردىڭ ءبىرى - Bilimland.kz . وسى پلاتفورمادا بۇگىن 400 مىڭنان استام وقۋشى جۇمىس ىستەدى. بۇل پلاتفورما ارقىلى وقۋ جوسپارى شەڭبەرىندە ءتيىستى سۇراقتار بەرىلەدى جانە قاتەلەرمەن جۇمىس ىستەيدى. ودان كەيىن قايتادان ءۇش دەڭگەيلى تاپسىرمالار بەرىلەدى. كەرەك بولسا استىندا فورۋمدار بولىپ، مۇعالىمدەر ول جەردە تاپسىرمالارىن بەرە الادى»، - دەيدى ق ر ءبىلىم جانە عىلىم ءمينيسترى اسحات ايماعامبەتوۆ.
ول پلاتفورمالاردا تەحنيكالىق اقاۋلار بولعانىن دا ايتتى. «ەكى رەت اقاۋ بولىپ، ەكى رەت تە ءتيىستى جۇمىستاردى جۇرگىزدىك. 32 ميلليون سەسسيا بولعاننان كەيىن ماسەلەلەر تۋىندادى، ءبىراق ول ماسەلەلەر شەشىلدى. بۇل پلاتفورما كۇنى بويى دا، قازىر دە جۇمىس ىستەپ تۇر. تەحنيكالىق ماسەلەلەر بويىنشا ارىپتەستەرىمىزدىڭ جۇمىسىن كورىپ وتىرمىز. بۇل باعىتتاردا ۇلكەن اۋقىمدى، ماڭىزدى جۇمىستار جاسالدى. سونىڭ ناتيجەسىن بۇگىن كورىپ وتىرمىز. تەحنيكالىق اقاۋلارعا قاراماستان وقۋشىلار اتالعان پالتفورمالار بويىنشا جۇمىس ىستەۋلەرىنە مۇمكىندىك بولدى. كۇنى- ءتۇنى جۇمىس ىستەگەن ارىپتەستەرىمىزگە ءبىلىم جانە عىلىم مينيسترىلىگى اتىنان ۇلكەن العىسىمدى ايتقىم كەلەدى»، - دەيدى ول.