ەلىمىزدىڭ 3 وبلىسىندا تابيعاتتىڭ توسىن مىنەزىنەن 160 تان استام عيمارات زارداپ شەكتى
بۇل تۋرالى ق ر ءى ءى م توتەنشە جاعدايلار كوميتەتى جەدەل شتابىنىڭ وكىلى ليۋبوۆ ابلانوۆا ايتتى، دەپ حابارلايدى قازاقپارات ءتىلشىسى.
«اقمولا، قوستاناي جانە سولتۇستىك قازاقستان وبلىستارىنىڭ 2 قالاسى مەن 22 اۋدانىندا ەكپىنى سەكۋندىنا 30 مەترگە دەيىن جەتكەن قاتتى داۋىلدىڭ سالدارىنان 160 تان استام عيمارات پەن قۇرىلىستىڭ شاتىرى قيرادى. سونداي-اق اقمولا جانە قوستاناي وبلىستارىنىڭ 9 اۋدانىندا ەلەكتر جەلىلەرى زاقىمدانعان. زاقىمدالعان نىساندار مەن ماتەريالدىق شىعىنداردىڭ كولەمى قازىرگى تاڭدا انىقتالىپ جاتىر»، - دەيدى ول. سونىمەن قاتار ول اقمولا وبلىسىنىڭ بۋراباي اۋدانىندا قاتتى داۋىلدان ءبىر ادام قازا بولعانىن ەسكە سالدى.
«بۇگىنگى كۇنى اۋا رايىنىڭ قولايسىزدىعىنا بايلانىستى اقمولا، قوستاناي جانە سولتۇستىك قازاقستان وبلىستارىندا 12 رەسپۋبليكالىق جانە قوستاناي وبلىسىندا 20 وبلىستىق ماڭىزى بار اۆتوجول جابىلدى. اۋا رايىنىڭ ناشارلاۋىنا بايلانىستى توتەنشە جاعدايلار كوميتەتى مەن وڭىرلەردەگى جەدەل شتابتىڭ جۇمىسى جالعاسىپ جاتىر»، - دەيدى ليۋبوۆ ابلانوۆا.
اۆتور: مارلان جيەمباي