تايلاندتا 2 قازاقستاندىق سۋعا باتىپ كەتتى: مۇردەلەردى جەتكىزۋ بويىنشا كەلىسسوز جۇرۋدە
بۇل تۋرالى سىرتقى ىستەر مينيسترلىگىنىڭ رەسمي وكىلى ايبەك سمادياروۆ ءمالىم ەتتى، دەپ حابارلايدى قازاقپارات ءتىلشىسى.
«وكىنىشكە وراي كەشە كەشكىسىن ازاماتىمىز قايتىس بولدى، جۇرەگى توقتاپ قالدى. ارينە، ءۇمىت بولدى. جاس اعزا بولعاندىقتان بارلىعىن جاسادىق. تاي دارىگەرلەرىمەن كەشە سويلەستىك. وسىدان ەكى كۇن ءبىر اكە- شەشىسى پحۋكەتكە ۇشىپ باردى. كونسۋل ولاردىڭ جانىندا، بىرگە تاي دارىگەرلەرمەن سويلەسكەن بولاتىن. 1-ماۋسىم كۇنى اۋرۋحانادان «ازاماتتارىڭىز اۋىر حالدە، جانساقتاۋ بولىمىنە ءتۇستى» دەگەن قوڭىراۋ ءتۇستى. ءبىزدىڭ ازاماتتارىمىزعا ايتارىم ءبىر نارسە عانا - جەرگىلىكتى بيلىك سۋعا تۇسپەۋ تۋرالى حابارلاما بەرسە، سول ەرەجەلەردى ساقتاۋ قاجەت. ويتكەنى، 3 -ماۋسىم كۇنى تۋرا سول جاعاجايدا تاعى ءبىر ازاماتىمىز سۋعا باتىپ كەتتى. ونى قۇتقارىپ ۇلگەرمەدى. ەكەۋىنىڭ دە مۇردەسى قازاقستانعا جەتكىزىلەدى. تۋىستارىمەن جۇمىس ىستەپ جاتىرمىز. قۇجاتتارى راسىمدەلەدى. اۋە كومپانياسىمەن جانە مۇردەنى جەتكىزەتىن وزگە دە كومپانيالارمەن كەلىسسوز جۇرگىزىپ جاتىرمىز»، - دەدى ۆەدومستۆونىڭ رەسمي وكىلى.
ايبەك سمادياروۆ قايتىس بولعان جىگىت قالىڭدىعىن قۇتقارامىن دەپ سۋعا تۇسكەن دەگەن رەسمي اقپاراتتىڭ بولعانىن راستادى.
«ءبىراق، باسىندا ەشكىم بولعان جوق. ونى ايتا المايمىز. نە بولسا دا سۋعا تۇسپەۋ قاجەت. وكىنىشكە وراي تاي قۇتقارۋشىلارىنىڭ اقپاراتىنا سايكەس، سۋعا تۇسپەۋگە قىزىل جالاۋ شىعارىلعان كۇنى ت م د ازاماتتارى ەرەجەنى بۇزىپ سۋعا تۇسەدى ەكەن»، - دەدى ول.
بۇعان دەيىن، سۋعا باتىپ كەتكەن وتانداسىمىزدىڭ جانساقتاۋ بولىمىندە جاتقانى حابارلانعان ەدى.