بىلتىر اراق-شاراپ ساتىلىمى 2 ەسە ارتقان

None
استانا. قازاقپارات - باس پروكۋرور بەرىك اسىلوۆ زاڭدىلىقتى، قۇقىقتىق ءتارتىپ پەن قىلمىسقا قارسى كۇرەستى قامتاماسىز ەتۋ جونىندەگى ۇيلەستىرۋ كەڭەسىنىڭ وتىرىسىندا تۇندە اراق-شاراپ ساتۋعا سالىنعان تىيىمنىڭ پايداسى از ەكەنىن ايتتى، دەپ حابارلايدى قازاقپارات ءتىلشىسى.

«بالالار اراسىنداعى قىلمىس پەن ولاردىڭ قۇقىعىنا قول سۇعۋ پروبلەماسى وزەكتى بولىپ تۇر. تۇرمىستىق كيكىلجىڭ سەبەبىنەن تۋىنداعان قىلمىستار قوعامدا رەزونانس تۋعىزىپ ءجۇر. ونىڭ باستى تريگگەرى - جۇمىسسىزدىق، الەۋمەتتىك تۇرعىدان قامسىزداندىرىلماۋ، تابىستىڭ ازايۋى، كوشى- قون جانە ماسكۇنەمدىك»، - دەدى بەرىك اسىلوۆ.

باس پروكۋروردىڭ ايتۋىنشا، ءار قالادا اراق-شاراپتى تۇندە ساتىپ الۋعا بولاتىن جاسىرىن ورىندار بار.

«بىلتىردىڭ وزىندە عانا ۋىتتى الكوگولدىڭ ساتىلىم كولەمى ەكى ەسەدەي ارتقان. الكوگولدى تۇنگى ۋاقىتتا ساتۋعا سالىنعان تىيىمنان پايدا بولماي تۇر. ءار قالادا الكوگولدى ءتۇننىڭ كەز كەلگەن ۋاقىتىندا ساتىپ الۋعا بولاتىن جاسىرىن ورىندار بار جانە كوپشىلىككە ءمالىم. ءبىز شىمكەنت، الماتى سياقتى 8 وڭىرگە شىعىپ، احۋالدى زەرتتەدىك. وكىلەتتى ورگانداردىڭ قىزمەتىندەگى جۇيەلى پروبلەمالاردى انىقتادىق»، - دەدى باس پروكۋرور.

سوڭعى جاڭالىقتار