جەڭىلدەتىلگەن كرەديت: كاسىپورىندار كولىكتى 2 ايدا جەتكىزۋى ءتيىس

استانا. قازاقپارات - كولىك الۋعا جەڭىلدىكپەن نەسيە بەرۋ باعدارلاماسىنا «سارىارقا اۆتوپروم» ج ش س مەن «Hyundai Trans Kazakhstan» ج ش س قاتىسادى. جەڭىلدەتىلگەن نەسيە الاتىن ادامنىڭ ءوتىنىمى ماقۇلدانسا، بۇل كومپانيالار 60 كۇن ىشىندە اۆتوكولىكتى جەتكىزۋى ءتيىس، دەپ حابارلايدى قازاقپارات ءتىلشىسى.

اتاپ ايتقاندا، باعدارلاما ارقىلى كولىك الۋعا ءوتىنىم بەرەتىن ادامدار الدىمەن اۆتوموبيل قۇراستىرۋ كاسىپورنىن تاڭداۋى كەرەك. ءوتىنىم تاپسىرىلعاننان كەيىن تاڭداۋ جاسالعان كاسىپورىندى وزگەرتۋگە بولمايدى.

«وسى باعدارلامانىڭ ەرەجەسى بويىنشا كولىك شىعاراتىن كاسىپورىندار اۆتوموبيلدى 60 كۇننىڭ ىشىندە جەتكىزۋى كەرەك. كولىك الاتىن ادام اۆتوسالونعا كەلىپ، وزىنە كەرەك مودەلدى، كومپلەكتاتسياسىن، ءتۇسىن تاڭدايدى. ەگەر بۇل اۆتوكولىك ءدال سول قالادا بولسا، قۇجاتتاردى بانك ماقۇلداعاننان كەيىن، ءاۆتوموبيلدى بىردەن الىپ كەتەدى»، - دەدى قازاقستاننىڭ اۆتوموبيل بيزنەسى قاۋىمداستىعىنىڭ مەملەكەتتىك رەتتەۋ جونىندەگى ديرەكتورى قايرات ەلامانوۆ

ونىڭ ايتۋىنشا، ەكى اي ىشىندە جەتكىزىلەتىن كولىكتى برونداۋ مۇمكىندىگى بولادى.

«كەيبىر كومپلەكتاتسيالار بويىنشا كولىكتەردى جەتكىزۋ مەرزىمى ەكى ايدان اسىپ كەتۋى ىقتيمال. وسى ورايدا كليەنت بالاما نۇسقاسىن تاڭداي الادى»، - دەدى قاۋىمداستىق وكىلى.

سونىمەن قاتار ول بىلتىر اتالعان باعدارلامانى جۇزەگە اسىرۋ بارىسىندا وتكىزىلگەن اۆتوكولىكتەردىڭ ورتاشا قۇنى 7,8 ميلليون تەڭگە شاماسىندا بولعانىن ايتتى. بۇل تۇرعىدا ادامداردى اسا قىمبات كولىكتەر قىزىقتىرمايتىنى بايقالدى.

بۇدان بۇرىن حابارلانعانداي، بيىلعى 6-اقپاندا ساعات 10 دا «ونەركاسىپتى دامىتۋ قورى» ا ق («قازاقستاننىڭ دامۋ بانكى» ا ق ەنشىلەس ۇيىمى) كولىك الۋعا جەڭىلدىكپەن پايىزى تومەن نەسيە بەرۋ باعدارلاماسى بويىنشا وتىنىمدەردى قابىلداۋ ءۇشىن جاڭا پلاتفورمانى ىسكە قوسادى. وتىنىمدەردى قابىلداۋ www.autonesie.kz رەسمي سايتى ارقىلى جۇرگىزىلەدى. وسى ورايدا بۇل پلاتفورما كەلەسى اپتادا ىسكە قوسىلعان كەزدە 761 ادام تىركەلە الادى.

ايتا كەتەيىك، ادامدارىڭ وتىنىمدەرى ءۇش سەبەپ بويىنشا قابىلدانباۋى مۇمكىن.