وتاندىق ماشينا جاساۋشىلاردىڭ ەكسپورت كولەمى 2 ميلليارد ا ق ش دوللارىنا جەتتى
22 قىركۇيەك 16:42

وتاندىق ماشينا جاساۋشىلاردىڭ ەكسپورت كولەمى 2 ميلليارد ا ق ش دوللارىنا جەتتى

استانا. قازاقپارات - مەملەكەت باسشىسى قاسىم-جومارت توقايەۆ قازاقستان ماشينا جاساۋشىلارىنىڭ X فورۋمىنا قۇتتىقتاۋ حاتىن جولدادى، دەپ حابارلايدى قازاقپارات ءتىلشىسى.

مەملەكەت باسشىسى قاسىم-جومارت توقايەۆتىڭ قۇتتىقتاۋ ءسوزىن فورۋمنىڭ اشىلۋىندا پرەمەر-مينيستر ءاليحان سمايىلوۆ وقىپ بەردى.

«قۇرمەتتى جيىنعا قاتىسۋشىلار! سىزدەردى قازاقستان ماشينا جاساۋشىلارىنىڭ X فورۋمىنىڭ اشىلۋىمەن قۇتتىقتايمىن! بۇل - مەملەكەت پەن بيزنەس وكىلدەرىن وسى سالانى دامىتۋدىڭ تىڭ تاسىلدەرىن تابۋعا جۇمىلدىراتىن بەدەلدى ديالوگ الاڭى. ەلىمىزدە وڭدەۋ ونەركاسىبىنە جانە ماشينا جاساۋ ىسىنە قولداۋ كورسەتىلىپ، قولايلى جاعداي جاسالىپ وتىر. سونىڭ ناتيجەسىندە قازاقستان كومپانيالارى جۇك جانە جولاۋشىلار ۆاگوندارى، اۆتوكولىك، اۆتوبۋس، ەلەكتروۆوز، ترانسفورماتور سياقتى جاڭا ونىمدەر شىعارۋدى مەڭگەرىپ كەلەدى»، - دەلىنگەن ق ر پرەزيدەنتىنىڭ قۇتتىقتاۋ سوزىندە.

سونىمەن بىرگە، ەكسپورتقا باعىتتالعان ءوندىرىستى دامىتۋعا جانە جەرگىلىكتى تاۋار وندىرۋشىلەردى قولداۋعا ارنالعان باعدارلاما جۇزەگە اسىرىلا باستادى. «ونەركاسىپتىك ساياسات تۋرالى» زاڭ قابىلدانىپ، وسى سالانىڭ نەگىزى باسىمدىقتارى جانە دامۋ باعدارى ايقىندالدى.

«بۇگىندە وتاندىق ماشينا جاساۋشىلار ءوز ونىمدەرىن سىرتقى نارىققا دا شىعارىپ جاتقانى قۋانتادى. ەكسپورت كولەمى قازىردىڭ وزىندە 2 ميلليارد ا ق ش دوللارىنا جەتتى. بۇل سالانىڭ الەۋەتىن تولىق پايدالانۋ ارقىلى ەلىمىزدىڭ ەكونوميكاسىن وركەندەتۋگە، تەحنولوگياسىن دامىتۋعا جانە الەۋمەتتىك وزگەرىستەر جاساۋعا جول اشىلادى دەپ سەنەمىن. بارشاڭىزعا تولاعاي تابىس تىلەيمىن!» - دەيدى ق. توقايەۆ.

ايتا كەتەيىك، 22-23- قىركۇيەك كۇندەرى استانادا قازاقستان ماشينا جاساۋشىلارىنىڭ X فورۋمى جانە ماشينا جاساۋ مەن مەتال وڭدەۋ جونىندەگى «Kazakhstan Machinery Fair 2022» ەكىنشى حالىقارالىق مامانداندىرىلعان كورمەسى وتەدى.

فورۋم ماشينا جاساۋ سالاسىنىڭ وڭىرلىك جانە حالىقارالىق كاسىپورىندارى تاپ بولىپ وتىرعان سىن-تەگەۋرىندەردىڭ كەڭ اۋقىمىن شەشەتىن پىكىرتالاس الاڭى رەتىندە ءوزىن تانىتتى. ونىڭ شەڭبەرىندە ەكونوميكانى ءارتاراپتاندىرۋ، يمپورتتى الماستىرۋ جانە جاڭا ەكونوميكالىق ساياسات تەتىكتەرى تالقىلانادى.

جاڭالىقتار