قازاقستاندا 2 مىڭعا جۋىق ادام دوكتورانتۋراعا تۇسۋگە ءوتىنىش بەرگەن

نۇر-سۇلتان. قازاقپارات - ءوتىنىش قابىلداۋ 5- شىلدە مەن 5- تامىز ارالىعىندا جۇرگىزىلدى.

وقۋعا ءتۇسۋ ءۇشىن ءبىر عانا جوعارى وقۋ ورنىن جانە ءبىر ءبىلىم باعدارلاماسىن تاڭداۋعا بولادى. ەمتيحاندار 20- تامىزعا دەيىن جالعاسادى. دوكتورانتۋراعا گرانتقا جانە اقىلى نەگىزدە وقۋعا ءتۇسۋ شەگى - 75 بال، دەپ حابارلايدى قازاقپارات.

وتكەن جىلدان باستاپ دوكتورانتۋراعا ءتۇسۋ ەمتيحانى ەلەكتروندى فورماتتا وتكىزىلىپ كەلەدى.

ۇمىتكەرلەر كومپيۋتەردە ەسسە جازادى، دوكتورانتۋرادا وقۋعا دايىندىق بويىنشا تەست جانە ءبىلىم باعدارلاماسىنىڭ بەيىنى بويىنشا ەمتيحان تاپسىرادى.

«ءتۇسۋ ەمتيحاندارىنىڭ ءبىرىنشى كەزەڭى جوعارى وقۋ ورىندارىندا سۇحباتتاسۋ فورماتىندا جۇرگىزىلەدى. ەكىنشى كەزەڭى تەستىلەۋ ورتالىقتارى بازاسىندا ەلەكتروندىق فورماتتا وتەدى. بولاشاق دوكتورانتتار جوعارى وقۋ ورىندارى بەكىتەتىن تاقىرىپتار بويىنشا ەسسە جازادى. ەسسەنى باعالاۋ، دوكتورانتۋرادا وقۋعا دايىندىق تەستى جانە بەيىندى ەمتيحانداردىڭ ناتيجەلەرى ارقىلى الىنعان بالدار جيناقتالىپ، قابىلداۋ ەمتيحانىنىڭ قورىتىندى باعاسى شىعارىلادى»، - دەپ اتاپ ءوتتى مينيسترلىكتىڭ جوعارى جانە جوعارى وقۋ ورنىنان كەيىنگى ءبىلىم دەپارتامەنتىنىڭ ديرەكتورى گۇلجان جاراسوۆا.

جالپى، وقۋعا ءتۇسۋ ەمتيحانىنىڭ ەڭ جوعارى كورسەتكىشى - 100 بال.

ونىڭ ىشىندە سۇحباتتاسۋ – 20، ەسسە - 10 بال، دوكتورانتۋرادا وقۋعا دايىندىعىن انىقتاۋعا ارنالعان تەست – 30، بەيىندى ەمتيحان سۇراقتارى - 40 بال.

بيىل العاش رەت دوكتورانتۋراعا ءتۇسۋ ءۇشىن شەت ءتىلىن مەڭگەرگەنى تۋرالى سەرتيفيكاتتان بولەك قازتەست جۇيەسى بويىنشا مەملەكەتتىك ءتىلدى مەڭگەرگەنىن راستايتىن سەرتيفيكات ۇسىنۋ قاجەت.

دوكتورانتۋرا بويىنشا مەملەكەتتىك ءبىلىم تاپسىرىسىنا كەلەتىن بولساق، 2022-2023 وقۋ جىلىنا PhD ماماندارىن دايارلاۋعا ارنالعان مەملەكەتتىك گرانت سانى - 1890.

دوكتورانتۋراعا «ماگيستر» دارەجەسى جانە كەمىندە توعىز اي جۇمىس ءوتىلى بار نەمەسە مەديتسينالىق ماماندىق بويىنشا رەزيدەنتۋرادا وقۋىن اياقتاعان تۇلعالار قابىلدانادى.