كونە تىلدەردى بىلۋدەن حالىقارالىق وليمپيادادا قازاقستان وقۋشىلارى 2 «قولا» الدى
مۇنداي جەڭىستى جاڭالىقپەن وقۋ- اعارتۋ ءمينيسترى اسحات ايماعامبەتوۆ Facebook-تەگى پاراقشاسىندا ءبولىستى، دەپ حابارلايدى قازاقپارات ءتىلشىسى.
«قازاقستاننىڭ حالىقارالىق وليمپيادالارداعى جەڭىستەرى ءوز جالعاسىن تاۋىپ جاتىر. وقۋشىلارىمىز لينگۆيستيكا بويىنشا وتكەن حالىقارالىق وليمپيادادا العاش رەت بىردەن 2 قولا مەدال جەڭىپ الدى. بۇعان دەيىن كوماندانىڭ ەڭ ۇزدىك ناتيجەسى 1 قولا مەدال بولاتىن. وسى جولى ايدا داۋلەتوۆا مەن داريا پەرەسىپكينا وتكەن جىلداردىڭ رەكوردىن جاڭارتتى»، - دەپ جازدى اسحات ايماعامبەتوۆ. ۆەدومستۆو باسشىسىنىڭ مالىمەتىنشە، مەن ارالىندا وتكەن زياتكەرلىك سايىسقا الەمنىڭ 36 ەلىنەن 200 وقۋشى قاتىسقان. ءبىرىنشى بولىمدە وقۋشىلار ۋبىح، چام، نسۋ، ارابانا، الاباما تىلدەرىندە 5 تاپسىرما ورىنداعان. ەكىنشى ءبولىم مانجۋر تىلىنە ارنالدى. مينيستر جۇلدەگەر بولعان وقۋشىلاردى قۇتتىقتادى.
«قۇرمەتتى ايدا، داريا! سىزدەر الەمدەگى دارىندى وقۋشىلارعا ارنالعان ەڭ كۇردەلى زياتكەرلىك وليمپيادالاردىڭ بىرىندە جوعارى ماراپاتتارعا يە بولدىڭىزدار. بىلتىر ەل قورجىنىنا قولا جۇلدە اكەلگەن داريامەن كەزدەسىپ، قۇتتىقتاعانىمىز ەسىمدە. بويلارىڭىزداعى ەرۋديتسيا، اقىل- پاراسات، تاباندىلىق جانە قاجىرلى ەڭبەكتەرىڭىز جاڭا جەڭىستەرگە جەتەلەي بەرسىن! ۇستازدارىڭىزعا كاسىبي شەبەرلىكتەرى جانە اتا- انالارىڭىزعا قولداۋ كورسەتكەندەرى ءۇشىن العىس ايتامىن»، - دەپ لەبىزىن ءبىلدىردى مينيستر.
قوسا كەتسەك، بۇعان دەيىن قازاقستاندىق وقۋشىلار حالىقارالىق وليمپيادالاردا بەس پاننەن 21 مەدال جەڭىپ العانىن جازىپ ەدىك.