پرەزيدەنت ۇكىمەتكە 2 ايدىڭ ىشىندە حالىقتىڭ تابىسىن ارتتىرۋ باعدارلاماسىن دايىنداۋدى تاپسىردى
«جۇمىسقا ورنالاستىرۋدى قاجەت ەتەتىن ازاماتتاردىڭ ناقتى سانىن انىقتاۋ كەرەك. ۇكىمەتكە «اتامەكەن» پالاتاسىمەن بىرگە ەكى ايدىڭ ىشىندە حالىقتىڭ تابىسىن ارتتىرۋ جونىندەگى باعدارلاما ازىرلەۋدى تاسىرامىن. ۇكىمەتكە الەۋمەتتىك كودەكستىڭ ۋاقىتىندا قابىلدانۋىن قامتاماسىز ەتۋ قاجەت»، - دەدى پرەزيدەنت.
ونىڭ ايتۋىنا قاراعاندا، مەملەكەتتىڭ الەۋمەتتىك ساياساتى وسى قۇجاتتىڭ اياسىندا پاندەميا تاۋەكەلدەرى مەن قوردالانعان پروبلەمالاردى ەسكەرە وتىرىپ بەيىمدەلۋى كەرەك.
«الەۋمەتتىك كودەكس جاڭا قوعامدىق كەلىسىمنىڭ نەگىزگى ەلەمەنتىنە اينالۋعا ءتيىس»، - دەدى مەملەكەت باسىشسى پارلامەنت ءماجىلىسىنىڭ وتىرىسىندا.
ەسكە سالساق، ق ر پرەزيدەنتى قاسىم-جومارت توقايەۆ پارلامەنت ءماجىلىسىنىڭ وتىرىسىندا ق ر پرەمەر-ءمينيسترى لاۋازىمىنا ءاليحان سمايىلوۆتىڭ كانديداتۋراسىن ۇسىنىپ، ونى ءماجىلىس قابىلدادى. پرەزيدەنت جۋىقتا قازاقستاندى ساياسي ترانسفورماتسيالاۋ جونىندەگى جاڭا ۇسىنىستارىن جاريالايتىنىن ايتقان. سونداي-اق، ول 7-قاڭتاردا حالىققا جاساعان ۇندەۋىندە ۇكىمەتكە بۇگىنگى ءماجىلىس وتىرىسىندا ناتقى تاپسىرمالار بەرەتىنىن ايتقان ەدى.
«ۇكىمەت مەنىڭ 11-قاڭتاردا ماجىلىستە ايتاتىن سوزىمە قاتىستى ناقتى شەشىمدەر قابىلداۋى كەرەك»، - دەگەن مەملەكەت باسشىسى.
اۆتور: ەسىمجان ناقتىباي